A ummi cazin ah kal

A ummi cazin ah kal

Tuanbia 44: Rahab Nih Mingiatu A Thuh Hna

Tuanbia 44: Rahab Nih Mingiatu A Thuh Hna

Hi mi hna cu harnak an phan. Rianrang in an tlik lo ah cun thah an si ko lai. Annih cu Israel mi, mingiatu an si. Anmah a bawm lengmangmi hna minu cu Rahab a si. Rahab cu Jeriko khua ralhau cung i an sakmi inn pakhat chung ah a um. Hi mi hna cu zeicahdah harnak an phanh ti cu kan zoh hmanh lai.

Israel mi hna cu Jordan tiva kha tan in Kanaan ram chung ah an va luh lai te ah a si. Sihmanhsehlaw an luh hlan ah, Joshua nih mingiatu pahnih kha a thlah hmasa hna. ‘Va kal u law ram le Jeriko khua kha va zoh tuah u,’ tiah a ti hna.

Rahab le Israel mi mingiatu pahnih

Mingiatu hna cu Jeriko khua chung an luh tik ah, Rahab a inn chung ah an lut. Sihmanhsehlaw mi pakhat nih Jeriko siangpahrang kha: ‘Israel mi pahnih tuzan ah ram kha ngiatthlai awk ah hika ah an ra lut,’ tiah a va chimh. Siangpahrang nih mah cu a theih tik ah, Rahab sin ah mi a thlah hna i, annih nih: ‘Na inn chung i a ummi hna kha ra chuahpi hna,’ tiah an ti. Sihmanhsehlaw Rahab nih cun mingiatu hna cu inn cung ah a rak thuh hna. Cun: ‘Ka inn ah mi cu an ra taktak ko, sihmanhsehlaw khuazei in an rat cu ka hngal lo. Khua a muih hnik cang caah, kutka khar a si hlan ah, annih cu an chuak ṭhan. Khulrang in nan dawi hna ah cun nan phak ko hna lai!’ tiah a ti hna. Cucaah mi hna nih cun an hnulei in an dawi hna.

An chuah hnu in, Rahab cu inn cung ah cun khulrang in a kai. ‘Jehovah nih hi ram cu an pek hna lai ti kha ka hngalh. Izipt ram in nan chuah lio ah Rili Sen kha zeitindah Jehovah nih a rak kao ter i, siangpahrang Sihon le Og kha zeitindah nan rak thah hna ti kha kan rak theih cang. Nan cung ah zangfahnak ka langh ter cang bantuk in nannih zong nih ka cung ah zangfahnak langh ter awk ah zangfahnak in bia ka kam u, kapa le kanu le ka ṭale le ka naule kha khamh ko hna u,’ tiah a ti hna.

Mingiatu hna nih kan in khamh ko hna lai tiah bia cu an kam ve. Asinain Rahab nih a tuah hngami cu a um ve. ‘Hi hrisen hi la law na thlalangawng ah hin na hren lai, cun na rualchan vialte kha na inn chung ah na pumh dih hna lai. Cun Jeriko lak awk ah kan ra kir tik ah na hrisen kha na thlalangawng ah kan hmuh lai i, na inn chung i a ummi paoh ahohmanh kan that hna lai lo,’ tiah mingiatu hna nih an ti. Mingiatu hna cu Joshua sin ah an phak ṭhan tik ah a cangmi thil kong vialte kha an chimh dih.

Joshua 2:1-24; Hebru 11:31.



Biahalnak hna

  • Rahab cu khuazei ah dah a um?
  • Hmanthlak chung i mi pahnih hi ahodah an si i, zeiruangah Jeriko khua chungah an luh?
  • Jeriko siangpahrang nih Rahab kha zei tuah dah a fial i Rahab nih zeitindah a leh?
  • Rahab nih pa pahnih hna kha zeitindah a bawmh hna i zei zaangfahnak dah a hal hna?
  • Mingiatu pahnih nih Rahab kha zei bia dah an kamh?

Biahalnak dang hna

  • Joshua 2:1-24 rel.

    Israel mi hna nih Jeriko an doh tikah Exodus 23:28 ah ṭialmi Jehovah biakamnak kha zeitindah a tlin? (Josh. 2:9-11)

  • Hebru 11:31 rel.

    Rahab i zohchunhawk nih zumhnak ngeih a biapitnak kha zeitindah a langhter khun? (Rom 1:17; Heb. 10:39; Jeim 2:25)