A ummi cazin ah kal

A ummi cazin ah kal

Tuanbia 43: Joshua Hruaitu ah A Cang

Tuanbia 43: Joshua Hruaitu ah A Cang

Moses cu Israel mi hna he Kanaan ram ah luh a duh ve. Cucaah: ‘Jehovah, keimah kha Jordan tiva cu tan in a ṭhami ram kha ka hmuh ter ve ko,’ tiah a hal. Sihmanhsehlaw Jehovah nih: ‘A za cang! Hi kong cu chim ṭhan ti hlah!’ tiah a leh. Zeicaahdah Jehovah nih cutin a ti nan hngal maw?

Zeicahtiah Moses nih lung a tuk lio i a cangmi thil ruang ah a si. Amah le Aaron nih Jehovah kha an thangṭhat lo ti cu philh hlah u. Lungpi chung in ti a chuahtertu cu Jehovah a si tiah mi hna kha an chim hna lo. Hi ruang ah hin Jehovah nih annih cu Kanaan ram chung ah kan luh ter kho hna lai lo tiah a ti hna.

Cucaah Aaron a thih hnu thla tlawmpal ah, Jehovah nih Moses cu: ‘Joshua kha au law tlangbawi Eleazar le mi hna hmaika ah dir ter tuah. Cuka ah mi zapi hmai ah cun, Joshua cu an hruaitu thar a si ti an zapi in an hngalh dih awk ah chim hna,’ tiah a ti. Moses zong nih Jehovah nih a fial bantuk tein hi hmanthlak i nan hmuh bantuk te hin a tuah.

Moses nih Joshua hruaitu a si a thanh

Cu hnu ah Jehovah nih Joshua cu: ‘Ṭhawng law, ṭih hlah. Nangmah nih Israel mi hna cu ka kamh mi hna Kanaan ram ah na hruai hna lai i na sin ah kan umpi lai,’ tiah a ti.

Khi hnu ah Jehovah nih Moses cu Moab ram chung i Nebo tlang par ah kai awk a fial. Cuka hmun in cun Moses nih Jordan tiva ral lei a zoh i aa dawh mi Kanaan ram cu a hmuh khawh. Jehovah nih: ‘Abraham, Isak le Jakob an tefa pawl pek awk in bia ka kammi ram cu mah hi a si. Kan hmuh ter cang, sihmanhsehlaw a chung ah cun kan luh ter kho lai lo,’ tiah a ti.

Cuka Nebo tlang par ah cun Moses cu a thi. Amah cu kum 120 a si. Amah cu a ṭhawng rih ko i, a mit zong a ṭha rih ko. Moses a thih caah mi hna cu an ngaih a chia ngaingai i an ṭap. Sihmanhsehlaw an hruaitu thar caah Joshua kha an ngeih caah an i lawm ko.

Nambar 27:12-23; Deuteronomi 3:23-29; 31:1-8, 14-23; 32:45-52; 34:1-12.



Biahalnak hna

  • Hmanthlak chungah Moses he a dir ṭimi pa pahnih hna hi ahodah an si?
  • Jehovah nih Moses kha zeidah a chimh?
  • Zeicah Moses cu Nebo tlang par ah a kai i Jehovah nih amah cu zeidah a chimh?
  • Moses a thih ah kum zeizat dah a si?
  • Zeiruangah mi hna cu an ngaih a chiat, sihmanhsehlaw zei thil nih dah an lung a lawmhter hna?

Biahalnak dang hna

  • Nambar 27:12-23 rel.

    Joshua nih Jehovah sinin a ngan ngaimi zei rian dah a hmuh i Jehovah nih nihin ah a mi hna a zohkhenhnak hna kha zeitindah a langhter? (Nam. 27:15-19; Lam. 20:28; Heb. 13:7)

  • Deuteronomi 3:23-29 rel.

    Zeiruangah Jehovah nih Moses le Aaron kha biakammi ram ah luhnak nawl a pek hna lo, mah in khan zeidah kan i cawn khawh? (Deut. 3:25-27; Nam. 20:12, 13)

  • Deuteronomi 31:1-8, 14-23 rel.

    Moses nih a thih lai ah Israel mi hna sin i a chimmi bia nih toidawr tein Jehovah dantatnak a cohlannak kha zeitindah a langhter? (Deut. 31:6-8, 23)

  • Deuteronomi 32:45-52 rel.

    Pathian Bia cu kan nunnak ah zeitindah hmual a ngeih awk a si? (Deut. 32:47; Lev. 18:5; Heb. 4:12)

  • Deuteronomi 34:1-12 rel.

    Moses nih Jehovah kha a sining bak in a hmu bal lo nain Jehovah he an i pehtlaihnak kongah Deuteronomi 34:10 nih zeidah a langhter? (Ex. 33:11, 20; Nam. 12:8)