A ummi cazin ah kal

A ummi cazin ah kal

Tuanbia 42: Laa nih Bia A Chim

Tuanbia 42: Laa nih Bia A Chim

Laa pakhat nih bia a chimmi na thei bal maw? ‘Thei bal hlah, saram cu bia an chim kho lo,’ na ti ko lai. Sihmanhsehlaw Baibal nih cun bia a chimmi laa pakhat kong a chim. Zeitindah a rak si kan zoh hmanh lai.

Vancungmi

Israel mi hna Kanaan ram chung i an luh lai te ah a rak si. Moab siangpahrang Balak cu Israel mi hna kha a rak ṭih ngai hna. Cucaah Israel mi hna kha chiatserh awk ah Balaam an ti mi mifim ngai pa pakhat kha a rak kawh. Balak nih cun Balaam cu tangka tampi kan pek lai tiah bia a kam. Cucaah Balaam cu a laa cu aa cit i Balak sin ah cun a kal.

Jehovah nih Amah a miphun chiatserh awk ah Balaam cu a duh piak lo. Cucaah vainam saupi pakhat he a vancungmi pakhat kha lam cung ah dir in Balaam kha kham awk ah a rak thlah. Balaam nih cun vancungmi cu a hmu kho lo, asinain a laa nih cun a hmuh ko. Cucaah laa cu vancungmi kha hrial awk ah heh tiah aa rak i zuam i, a donghnak ah laa cu lam cung ah a rak bawk ko. Cutikah Balaam cu a thin a hung ngaingai i a laa cu fung pakhat in a tuk.

Cutikah Jehovah nih Balaam a laa nih a sin ah bia a chimmi kha a theih ter. ‘Na ka tuk nak hnga caah na cung ah zeidah ka rak tuah cang?’ tiah laa nih cun a hal.

Laa aa citmi Balaam

‘Mihrut bantuk ah na ka can ter cang, vainam rak i ken ning law kan thah ko cang hnga!’ tiah Balaam nih a leh.

‘Hi bantuk in na cung ah a hlan ah ka tuah bal maw?’ tiah laa nih a hal.

‘Tuah bal hlah,’ tiah Balaam nih a leh.

Cutik ah Jehovah nih Balaam cu vainam he lam cung ah a dirmi vancungmi cu a hmuh ter. Vancungmi nihcun: ‘Zeicahdah na laa cu na tuk? Na lam kham awk ah ka ra cang, zeicahtiah Israel kha chiatserh ah na kal awk aa tlak lo nain na kal caah a si. Na laa nih khan ka sin in rak pial hlah seh law, amah cu thah lo in nangmah tu kha kan thah cang hnga,’ tiah a ti.

Balaam nih: ‘Ka sual cang. Lam cung i na dir kha ka hngalh lo caah a si,’ tiah a ti. Cuhnu ah vancungmi nih Balaam cu a thlah i, Balaam cu Balak sin ah cun a kal. Israel mi hna kha chiatserh awk ah aa zuam ṭhan ṭhiamṭhiam, sihmanhsehlaw Jehovah nih voi thum tiang Israel mi cu thluachuah a pek ter lehlam hna.

Nambar 21:21-35; 22:1-40; 23:1-30; 24:1-25.



Biahalnak hna

  • Balak cu ahodah a si i, zeicah Balaam kha a kawh?
  • Zeicah Balaam a laa cu lam cungah a bawh?
  • Laa nih a chimmi zei bia dah Balaam nih a theih?
  • Vancungmi nih Balaam kha zei bia dah a chimh?
  • Balaam nih Israel mi hna chiatserh aa zuam tikah zeidah a cang?

Biahalnak dang hna

  • Nambar 21:21-35 rel.

    Amor Siangpahrang Sihon le Bashan Siangpahrang Og kha Israel mi nih zeicah an tei hna? (Nam. 21:21, 23, 33, 34)

  • Nambar 22:1-40 rel.

    Balaam nih zei lungput a ngeih ruangah Israel mi hna kha chiatserh awk aa zuam, mah in khan zei i cawn awk dah kan hmuh khawh? (Nam. 22:16, 17; Ptb. 6:16, 18; 2 Pit. 2:15; Judas 11)

  • Nambar 23:1-30 rel.

    Balaam nih Jehovah a biami bantukin bia a chim ko nain zeitindah a tuahsernak nih phundang in a langhter? (Nam. 23:3, 11-14; 1 Sam. 15:22)

  • Nambar 24:1-25 rel.

    Mah Baibal kong nih Jehovah aa timhnak a tling hrimhrim lai ti kan zumhnak kha zeitindah a ṭhawnter? (Nam. 24:10; Isa. 54:17)