A ummi cazin ah kal

A ummi cazin ah kal

Tuanbia 38: Mingiatu 12

Tuanbia 38: Mingiatu 12
Israel mingiatu pawl nih thingthei an put lio

Hi mi hna nih an rak putmi thingthei hi zoh tuah u. Khi mitsur tlai bor khi zeitluk in dah a ngan zoh hmanh u. Lang in minung pahnih nih put khim in a rit. Cun theipi le taleti hna zong hi zoh hmanh u. Hi aa dawhmi thingthei hna cu khuazei i a chuakmi dah an si? Kanaan ram in a chuakmi an si. Kanaan ram cu Abraham, Isak le Jakob an rak um bal nak hmun a si ti kha philh hlah u law. Sihmanhsehlaw cuka ah cun mangṭam a rak tlun caah Jakob cu a innchungkhar dihlak he Izipt ram ah aa rak i ṭhial. Khi hnu kum 216 ah Moses nih Israel mi hna cu Kanaan ram ah a rak hruai ṭhan hna. Cun Israel mi hna cu Kadesh an timi hmun pakhat kha an rak phan.

Kanaan ram ah cun mi ṭhalo an rak um. Cucaah Moses nih mingiatu 12 a rak thlah hna i; ‘Khika ram ah minung zeizat dah an um i zei tluk ṭhawng mi dah an si ti va ngia tuah u. A vawlei cu thlaici cin nak ah a ṭha hnga maw ti zong va zoh tuah u. Cun a chung in a chuak mi thingthei cheukhat zong rak chuahpi hrimhrim u,’ a ti hna.

Mingiatu hna cu Kadesh i an rak phanh ṭhan tik ah Moses sin ah cun: ‘A ṭha taktak mi ram pakhat a si ko,’ tiah an chimh. A ṭhatnak fian ter awk ah a thingthei cheu khat kha Moses cu an hmuhsak. Asinain mingiatu 10 nih cun: ‘Khika i a um mi minung hna cu an ngan ngai ngai i an ṭhawng ngaingai. An ram lak awk kan i zuam ah cun an kan thah dih ko lai,’ tiah an ti.

Israel mi hna cu khi bia an theih tik ah an ṭih ngaingai. ‘Izipt ram ah maw hika ramcar chung ah hin maw thi u sih law a ṭha deuh ko hnga. Ral tuknak chung ah kan thi dih lai i kan nupile le kan fale cu tlaih an si dih ko cang lai. Cucaah Moses zaka ah hin hruaitu thar pakhat thim u sih law Izipt ram ah cun kir ṭhan ko u sih!’ an ti.

Sihmanhsehlaw mingiatu pahnih nih cun Jehovah kha an i bochan i, mi hna kha daih ter awk an zuam hna. An min cu Joshua le Kaleb an si. Annih nih cun: ‘Ṭih hlah u. Jehovah cu kan sin ah a um ko. Ram cu fawi tein kan lak khawh ko lai,’ tiah an ti hna. Sihmanhsehlaw mi hna nih cun an ngai hna lo. Joshua le Kaleb hmanh kha thah an rak duh hna.

Cucaah Jehovah cu a thin a rak hung ngaingai i, Moses sin ah: ‘Mi hna lak i kum 20 le a cunglei vialte cu Kanaan ram chung ah an lut kho lai lo. Izipt ram le ramcar chung i ka rak tuah mi khuaruahharnak vialte an hmuh dih ko cang nain atu tiang keimah kha an ka zum kho rih lo. Cucaah hmanung bik mi a thih hlan tiang ramcar chung ah kum 40 chung an vai lai. Joshua le Kaleb lawnglawng Kanaan ram chung ah cun an lut lai,’ tiah a rak chimh.

Nambar 13:1-33; 14:1-38.



Biahalnak hna

  • Hmanthlak chung i mitsur tlai bor hi zeitindah na hmuh, mah cucu khuazei in dah a chuakmi a si?
  • Zeicah Moses nih mingiatu 12 kha Kanaan ram ah a thlah hna?
  • Mingiatu 10 nih Moses thawng theihter awk i an rak kir tikah zeidah an chim?
  • Mingiatu pahnih nih Jehovah an i bochannak kha zeitindah an rak langhter, an min hodah a si?
  • Zeicah Jehovah cu a thin a hun i Moses kha zeidah a chimh?

Biahalnak dang hna

  • Nambar 13:1-33 rel.

    Ram ngiatu dingin thimmi cu ahote dah an si i annih cu zei tinvo ṭha dah an rak hmuh? (Nam. 13:2, 3, 18-20)

    Zeiruangah Joshua le Kaleb cu mingiatu dang hna he an hmuhning aa dan, mah nih khan zeidah a kan cawnpiak? (Nam. 13:28-30; Matt. 17:20; 2 Kor. 5:7)

  • Nambar 14:1-38 rel.

    Vawlei i Jehovah a ai-awhtu hna ralchanh in phunzainak he aa tlaiin zei ralrinpeknak dah biapi in kan chiah lai? (Nam. 14:2, 3, 27; Matt. 25:40, 45; 1 Kor. 10:10)

    Jehovah cu a salle pumpak pakhat cio cungah siaherhnak a ngei ti kha Nambar 14:24 nih zeitindah a langhter? (1 Si. 19:18; Ptb. 15:3)