A ummi cazin ah kal

A ummi cazin ah kal

Tuanbia 36: Sui Cawfa Kong

Tuanbia 36: Sui Cawfa Kong

Aw, aw! Mi hna cu zeidah an tuah lengmang? Cawfate sin ah thla an cam lengmang ai! Zeicahdah cuti cun an rak tuah?

Moses cu tlang cung ah caan saupi a va um tik ah, mi hna nih cun: ‘Moses cu zei a can kan hngal ti lo. Cucaah hi ram in a kan hruaitu ding ah pathian pakhat in ser u sih! an rak ti.

Moses nih lungtlap pahnih a hlonh

‘A ṭha ko,’ tiah Moses u Aaron nih khan a ti hna. ‘Nan sui tumbul kha i phoih u law ka sin ah rak pu dih u,’ a ti hna. Mi hna nih an sui tumbul cu an rak put tik ah, Aaron nih a tit hnu ah a thlet i sui cawfa pakhat ah a ser. Cun mi hna nih: ‘Hi cu Izipt ram in a kan chuahtertu kan Pathian a si!’ tiah an au. Cutik ah Israel mi hna cu puai nganpi pakhat an tuah i sui cawfa cu an biak.

Jehovah nih mah cu a hmuh tik ah a thin a hung ngaingai. Cucaah Moses sin ah: ‘Khulrang in vung ṭum. Mi hna cu ṭhalo ngai in an nung cang. Annih nih ka nawlbia kha an philh dih cang i sui cawfa hmai ah an kun dih cang,’ tiah a ti.

Mi nih sui cawfa an biak lio

Moses cu khulrang in a vung ṭum. An pawng a vung phanh tik ah, hi hmanthlak i bantuk hin a rak hmuh hna. Mi hna cu sui cawfa velchum ah hla an sa i an lam len ko! Moses cu a thin a hung tuk hringhran i, an cung i nawlbia aa ṭialnak lungtlap pahnih cu a hlonh i an kuai dih cikcek. Cu hnu ah sui cawfa cu a lak i a tit. Cun dip lak in a rial.

Mi hna cu a ṭha lo ngaimi thil kha an tuah cang. Cucaah Moses nih pa cheukhat kha nan vainam i lak u tiah a ti hna. ‘Sui cawfa a biami mi ṭha lo vialte cu an thi dih lai,’ tiah Moses nih a rak ti. Cucaah khi mi hna nih cun minung 3,000 kha an thah hna! A hmaan lomi Pathian dang zeihmanh biak lo in, Jehovah pakhat lawng kha biak awk ah kan i ralrin a hau ti cu mah nih hin a langhter lo maw?

Exodus 32:1-35.



Biahalnak hna

  • Hmanthlak chungah mi hna cu zeidah an tuah, zeicah cuticun an tuah?
  • Zeiruangah Jehovah cu a thin a hun i mi hna nih an tuahmi kha a hmuh tikah Moses nih zeidah a tuah?
  • Moses nih pa cheukhat kha zei tuah awk dah a chimh hna?
  • Mah tuanbia in zei cawn awk dah kan i lak lai?

Biahalnak dang hna

  • Exodus 32:1-35 rel.

    Mah kong nih a hmaanmi biaknak le a hmaan lomi biaknak i cawhnak cung i Jehovah lungput kha zeitindah a langhter? (Ex. 32:4-6, 10; 1 Kor. 10:7, 11)

    Khrihfa hna nih laam le hlasak ti bantuk nuamhnak tuahnak an i thimnak kongah zeidah an i ralrin awk a si? (Ex. 32:18, 19; Efe. 5:15, 16; 1 Johan 2:15-17)

    Levi miphun hna nih dinnak dirkamhnak ah a ṭhami zohchunhawk zeitindah an rak langhter? (Ex. 32:25-28; Salm 18:25)