A ummi cazin ah kal

A ummi cazin ah kal

Tuanbia 34: Rawl Phun Thar

Tuanbia 34: Rawl Phun Thar

Mi hna cu vawlei in zeidah an char lengmang ti nan hngal maw? Hawhra tlang bantuk a si. A rang i a pan te i a hmete fawn. Asinain hawhra tlang cu a si lo; ei awk phunkhat a rak si.

Israel mi nih manna an char lio

Israel mi hna nih Izipt ram in an chuahnak in thlakhat lawng a rak si rih. Ramcar chung ah an rak um. Eidin a rak har ngaingai. Cucaah mi hna cu: ‘Izipt ram ah khan Jehovah nih rak kan that seh law kan duh deuh ko hnga. Cuka ah cun kan duhmi rawl paoh kan rak hmuh khawh rih,’ tiah an zai.

Cucaah Jehovah nih: ‘Van in rawl ka sur ter lai,’ tiah a rak ti. Cun a chim bantuk in Jehovah nih a rak tuah. A thaizing ah Israel mi hna nih vawlei i a tlami a rangmi thil cu an hmuh hna i, pakhat le pakhat cu: ‘Mah hi zeidah a si?’ tiah an i hal.

Moses nih: ‘Mah hi cu Jehovah nih ei awk ah an pekmi hna rawl a si,’ tiah a ti hna. Mi hna nih cun mah cu MANNA tiah an auh. Cucu khuaihliti he tuahmi chang bantuk he aa lo.

‘Mi pakhat cio nih nan ei khawh hnga zat cio in nan char lai,’ ti in Moses nih mi hna cu a chimh hna. Cucaah zing fate mah ti cun an rak tuah. Cun ni a linh tik ah cun, vawlei i a tangmi manna cu a rak tii dih.

Moses nih: ‘Aho hmanh nih manna cu thaizing ca tiang nan i chiah lai lo,’ tiah zong a chimh hna. Sihmanhsehlaw mi cheukhat nih cun an rak ngai lo. Zeidah a cang ti nan hngal maw? An i chiahmi manna cu a thaizing ah cun tholung an khat dih i an thu dih!

Asinain zarhkhat ah nikhat cu Jehovah nih manna kha let hnih in nan char lai a ti hna. Cucu niruknak ni a si. Cun Jehovah nih a cheu cu a thaizing tiang nan chiah lai, zeicahtiah a ni sarihnak ni ahcun zeihmanh ka tlak ter lai lo tiah a ti hna. A ni sarihnak ni tiang manna cu an chiah tik ah, tholung he a khat lo i a thut zong a thu fawn lo! Hi zong hi khuaruahharnak dang pakhat a si ve!

Israel mi hna ramcar chung i an um chung kum vialte cu Jehovah nih manna in cun a rak cawm hna.

Exodus 16:1-36; Nambar 11:7-9; Joshua 5:10-12.



Biahalnak hna

  • Hmanthlak chungah mi hna nih an char lengmang mi hi zeidah a si i zeitindah an auh?
  • Moses nih mi hna kha manna charnak kongah zei lamhruainak dah a pek hna?
  • Niruknak ni ah mi hna kha zei tuah awk dah Jehovah nih a chimh hna, zeicah?
  • Manna kha ni sarihnak ni tiang an chiah tikah Jehovah nih zei khuaruahharnak dah a tuah?
  • Zei caan tiang dah Jehovah nih a mi hna kha manna in a rak cawm hna?

Biahalnak dang hna

  • Exodus 16:1-36 ; Nambar 11:7-9 rel.

    Exodus 16:8 nih Khrihfabu chungah theocratic rian a tlaitu pawl upat a herhnak kong ah zeidah a langhter? (Heb. 13:17)

    Ramcar chungah Israel mi hna cu Jehovah kha i bochan awkah zeitindah nifa tein theihter an rak si? (Ex. 16:14-16, 35; Deut. 8:2, 3)

    Jesuh nih manna kha zei hmelchunhnak sullam in dah a chim i mah “vancung changreu” in ṭhatnak zeitindah kan hmuh? (Johan 6:31-35, 40)

  • 2. Joshua 5:10-12 rel.

    Israel mi nih kum zeizat tiang dah manna an ei, zeitindah mah in khan a rak hneksak hna i mah kongin zeidah kan i cawn khawh? (Ex. 16:35; Nam. 11:4-6; 1 Kor. 10:10, 11)