A ummi cazin ah kal

A ummi cazin ah kal

Tuanbia 28: Bawhte Moses Khamh A Sinak Kong

Tuanbia 28: Bawhte Moses Khamh A Sinak Kong

Bawhte hmete a ṭap lengmang i, ngaknu nu a kut kha aa hun i tlaihmi hi zoh tuah u. Amah cu Moses a si. Hi aa dawh ngaimi ngaknu cu aho a si nan hngal maw? Izipt mi bawi fanu, Faraoh a fanu a si.

Faraoh fanu nih Moses a hmuh

Moses a nu nih a fate cu thlathum tiang a rak thuh, zeicahtiah Izipt mi nih an thah lai kha a rak duh lo. Sihmanhsehlaw Moses cu an hmuh ve te lai ti kha a rak hngalh caah amah khamh awk ah cun hitin a rak tuahmi a si.

Bawm pakhat kha a lak i ti a luh khawh lonak ding in a rak tuah. Cu hnu ah Moses cu cu bawm chung ah cun a rak chiah i, bawm cu Nile Tiva kam ramkung sangpipi lak ah khan a va chiah. Moses a unu Miriam cu a pawng in a cung ah zeidah a tlung te lai ti zoh awk ah an conghter.

A rauh hlan ah Faraoh a fanu cu Nile Tiva lei ah khan kholh awk ah a rung. Ram sangpipi lak ah bawmte cu a hmuh colh ve. A salnu pakhat kha a auh i: ‘Kal law khi bawm khi va ka lak piak tuah,’ tiah a fial. Siangpahrang fanu nih khi bawm cu a hun tik ah, aa dawh ngaimi bawhte cu a hmuh ai! Ngakchiapate Moses cu a ṭap lengmang i, siangpahrang fanu nih cun a zangfak ngaingai. Thah ding cu a rak duh hrimhrim lo.

Cun Miriam nih cun a hun naih hna. Amah cu hmanthlak chung ah hin nan hmuh khawh ko. Miriam nih Faraoh fanu cu: ‘Hi bawhte an zohkhenh piak tu ding ah Hebru minu pakhat in kan auh piak lai maw?’ tiah a va hal.

‘Zangfahnak in va au ko,’ tiah siangpahrang fanu nih cun a ti.

Cucaah Miriam cu khulrang in a nu va chimh awk ah a va tli. Moses a nu cu siangpahrang fanu sin ah a rat tik ah, siangpahrang fanu nih cun: ‘Hi ngakchiapa hi i lak law va ka cawm piak, na cawm man cu kan pek te lai,’ tiah a ti.

Cucaah Moses a nu nih cun amah fapa lila cu a cawm. A hnu ah Moses a upat tik ah, Faraoh fanu sin ah cun a va pek i, Faraoh fanu nihcun amah fapa bantuk in aa cawm. Cubantuk lam in Moses cu Faraoh inchung ah a rak ṭhang.

Exodus 2:1-10.



Biahalnak hna

  • Hmanthlak chung i bawhte cu ahodah a si i a tlaihmi hi aho kut dah a si?
  • A nu nih Moses kha thahnak in khamh awkah zeidah a rak tuah?
  • Hmanthlak chung i ngakchia nute cu ahodah a si i zeidah a rak tuah?
  • Faroah fanu nih bawhte kha a hmuh tikah Miriam nih zei ruahnak dah a rak cheuh?
  • Moses a nu kha siangpahrang fanu nih zeidah a chimh?

Biahalnak dang hna

  • Exodus 2:1-10 rel.

    Moses bawhte a si lio ah cawnpiak le chimhhrin awkah zeitindah a nu nih caanṭha a ngeih i mah nih khan nihin nu le pa hna caah zei zohchunhawk dah a pek hna? (Ex. 2:9, 10; Deut. 6:6-9; Ptb. 22:6; Efe. 6:4; 2 Tim. 3:15)