A ummi cazin ah kal

A ummi cazin ah kal

Tuanbia 24: Josef nih A U le A Hneksak Hna

Tuanbia 24: Josef nih A U le A Hneksak Hna

Josef nih a u le cu hlan lio bang in an ṭha lo ti hnga maw ti hngalh a rak duh. Cucaah hitin a ti hna: ‘Nannih cu mingiatu nan si ko. Kan ram a dernak zon kawl ah nan ra ko.’

Annih nih: ‘Kan si hrimhrim lo. Kannih cu mi ṭha kan si ko. Kan zapi hin unau lawngte kan si. Kannih cu 12 kan si. Sihmanhsehlaw pa khat cu a um ti lo i, a hniangbikpa cu inn ah kan pa sin ah a um,’ tiah an ti.

Josef nih an bia a zum lo bang in aa umter. A u Simeon kha thong ah a thlak i, a dang vialte cu rawl kha a phorh ter hna i inn ah a tlunter hna. Sihmanhsehlaw annih cu: ‘Nan rat ṭhan tik ah nan nau hniang bik cu nan ratpi cang lai,’ tiah a ti hna.

A u le cu Kanaan ram an phak ṭhan tik ah, a cangmi thil vialte kha an pa Jakob cu an chimh dih. Jakob cu a ngaih a chia ngaingai. ‘Josef cu a um ti lo i, atu cu Simeon zong a um ve ti lo. Ka fapa hniangbik Benjamin cu kalpi awk ah nawl kan pe kho hna lo,’ tiah a rak ti. Sihmanhsehlaw an rawl a dih dengmang tik ah cun, Jakob nih Benjamin cu rawl an hmuh ṭhan khawh nak ding ah kalpinak nawl a pek ṭhan hna.

Atu cu a u le an rat kha Josef nih a hmuh ṭhan hna. A naupa Benjamin a hmuh caah a lung aa lawm ngaingai. Asinain anmah lak ah aho hmanh nih hi a biapi ngai mi pa hi Josef a si ti cu an hngal lo. Josef nih a u le 10 kha phundang in a hneksak ṭhan hna.

A u le an songkhoi ah rawl khat tein rawn piak hna u tiah a salle kha a fial hna. Sihmanhsehlaw anmah kha hngalh ter lo in a ngun hrai kha Benjamin a songkhoi chung ah a chiah piak. An kal i lam hla nawn an phanh hnu ah Josef nih a sal le kha a dawi ter ṭhan hna. An phanh tik hna ah sal hna nih cun: ‘Zeicah kan bawipa a ngun hrai nan fir?’ tiah an ti hna.

‘A hrai cu kan fir hrimhrim lo. Kan lak i pakhat khat sin ah cu hrai cu nan hmuh ah cun cupa cu thah si ko seh,’ tiah an unau rual in an ti dih.

Cucaah sal hna nih cun an songkhoi vialte ah khan an kawl dih i hika i nan hmuh bang hin Benjamin a songkhoi chung ah hrai cu an hmuh. Sal hna nih cun: ‘A dang cu nan kal kho, sihmanhsehlaw Benjamin cu ra kan zul seh,’ an ti hna. A u le 10 nih cun atu ah zeidah an rak tuah lai?

An zapi in Josef a inn ah cun Benjamin he an rak kir ṭhan dih. Josef nih a u le cu: ‘Nannih cu nan kal kho ko, sihmanhsehlaw Benjamin cu ka sal ah kahin a um ko lai,’ tiah a ti hna.

Cutik ah Judah nih: ‘Hi ngakchiapa tel lo in inn ah ka kir ah cun ka pa cu a thi ko lai, zeicahtiah amah cu a dawt tuk mi a si. Cucaah zangfahnak in ngakchiapa cu kal ter ko law, keimah tu hi na sal ah cun ka chia deuh ko,’ tiah a ti.

Josef nih cun a u le cu an lungthin an i thleng cang ti kha a hngalh khawh cang. Annih cu mi ṭhalo le zangfahnak a ngei lomi an si ti lo. Atu cu Josef nih zeidah a rak tuah zoh hmanh u sih.

Genesis 42:9-38; 43:1-34; 44:1-34.

Josef ule sualpuh an si lio


Biahalnak hna

  • Zeicah Josef nih a ule kha mi ngiatu nan si tiah sual a puh hna?
  • Jakob nih a fapa hniangbik Benjamin kha Izipt ah zeicah a kalter?
  • Josef ngun hrai cu Benjamin songkhoi chungah zeitindah a phak?
  • Judah nih Benjamin luatnak hmuh awkah zeitindah a nawl hna?
  • Josef ule cu zeitindah an i thlen?

Biahalnak dang hna

  • Genesis 42:9-38 rel.

    Genesis 42:18 i Josef bia cu nihin Jehovah bupi chungah ṭuanvo a ngeimi hna caah zeitindah a ṭhami ralrinpeknak a si? (Neh. 5:15; 2 Kor. 7:1, 2)

  • Genesis 43:1-34 rel.

    Reuben cu fater a si nain, Judah cu a unau hna aiawh in biachimtu ah a cang ti cu zeitindah a fian? (Gen. 43:3, 8, 9; 44:14, 18; 1 Chan. 5:2)

    Zeitindah Josef nih a ule kha hlangfang tein a hneksak hna, zeiruangah? (Gen. 43:33, 34)

  • Genesis 44:1-34 rel.

    A ule nih an hngalh nakhnga lo Josef nih zeitindah aa langhter? (Gen. 44:5, 15, ; Lev. 19:26)

    Josef a ule nih a hmasa i an nau cungah an ngeihmi nahchuahnak lungthin atu an ngeih ti lo kha zeitindah an langhter? (Gen. 44:13, 33, 34)