A ummi cazin ah kal

A ummi cazin ah kal

Tuanbia 23: Faraoh A Mang

Tuanbia 23: Faraoh A Mang

Kum hnih zong a luan cang, Josef cu thong chung ah cun a tang rih ko. Hrai putu bawi nih cun amah cu a philh diam cang. Cu hnu ah zankhat cu Faraoh nih theihtlei ngai a simi mang pahnih a manh i, a sullam zeidah a si hnga tiah a khuaruah a rak har. Hika i a ih ko hi nan hmu maw? A thaizing cu Faraoh nih a mifim hna kha a auh hna i a mang cu a chimh hna. Sihmanhsehlaw a mang sullam cu an chim kho lo.

Cutik lawng ah cun hrai putu bawi nih Josef kha a lung ah a hung chuak. Amah nih Faraoh sin ah cun: ‘Thong chung i ka um lio ah khan khika ah mang sullam a chim kho mipa pakhat a rak um,’ tiah a chimh. Khulrang in Faraoh nih cun Josef cu thong chung in cun a va chuah ter colh hna.

Faraoh nih Josef kha a mang cu a chimh: ‘A thau i aa dawh ngaimi caw pasarih ka hmuh hna. Cun a der ngai i a ruh lawng a tangmi caw pasarih zong ka hmuh ve hna. Cun a dermi nih cun a thaumi cu an ei dih hna.

Faraoh mang a manh lio

‘Ka mang pahnihnak ah cun facang kung pakhat chung in facang a khat i a hmin mi favui pasarih an hung chuah kha ka hmuh. Cu hnu ah acar i thlep selsul in a um mi favui pasarih kha ka hmuh ṭhan hna. Cun favui chia pasarih nih cun favui ṭha pasarih kha an dolh dih hna,’ tiah a ti.

Cutik ah Josef nih Faraoh cu: ‘Cu mang pahnih nih cun sullam pakhat an ngei. Caw thau pasarih le favui ṭha pasarih nih cun kumsarih an langh ter i, caw der pasarih le favui chia pasarih nih cun a dang kum sarih an langhter ve. Izipt ram chung ah kum sarih chung rawl tampi a vui lai. Cun kum sarih chung rawl tlawmte lawng a vui ṭhan lai.

Cucaah Josef nih Faraoh cu: ‘Mifim pakhat in thim law ngeih kum kumsarih chung ah rawl khonnak uktu bawi ah chia. Cuti na tuah lawng ah rawl a harnak pam kum kumsarih chung ah mi hna cu an thi lai lo,’ tiah a rak chimh.

Cu ruahnak cu Faraoh nih a rak duh ngai. Cucaah Josef cu rawl khongtu le chiatu ding ah a rak thim. Josef cu Faraoh dah ti lo in cun Izipt ram chung ah a biapi bikmi a si.

Khi hnu kum riat ah, mangṭam tlun lio caan ah, Josef nih mi cheukhat an rat kha a hmuh hna. Annih cu aho an si nan hngal hna maw? Annih cu amah a u le 10 kha an rak si! An umnak Kanaan ram ah rawl a um ti lo caah an pa Jakob nih Izipt ram ah a rak thlah hna. Josef nih cun a u le cu a hngalh ko hna nain annih nih cun amah kha an hngal ti lo. Zeicah ti nan hngal maw? Josef cu a upa cang i thilpuan phundang aa hruk cang caah a si.

Josef nih ngakchia a rak si lio ah a u le nih kun piak awkah a sin ah an ra tiah mang a rak manh mi kha a hun hngalh ṭhan. Mah kong nan relmi cu nan hngal ti maw? Cucaah Josef nih cun sullam ṭha ruang ah Pathian nih amah cu Izipt ah a ka thlah ti kha a hngalh. Josef nih cun zei a rak tuah lai tiah dah nan ruah? Zoh hmanh u sih.

Genesis 41:1-57; 42:1-8, 50:20.



Biahalnak hna

  • Zankhat cu Faraoh nih zeidah a ton?
  • Zeiruangah hrai putu bawi nih a donghnak ah Josef kha a hun hngalh ṭhan?
  • Hmanthlak nih a langhter bantukin Faraoh mang pahnih cu zeidah a si?
  • Josef nih mang sullam kha zeitindah a chim?
  • Josef cu Faraoh chim loin Izipt ram ah a biapi bikmi zeitindah a si?
  • Zeiruangah Josef a ule cu Izipt ram ah an rak rat, zeicah annih nih amah cu an hngalh ti lo?
  • Zei a mang dah Josef nih a hun hngalh ṭhan i zeinih dah mah a mang kha hngalh awkah a bawmh?

Biahalnak dang hna

  • Genesis 41:1-57 rel.

    Zeitindah Josef nih Jehovah sinah a lungthin a chiah, nihin Khrihfa hna nih zei ti lam in dah Josef i zohchunhawk kha i cawn khawh a si? (Gen. 41:16, 25, 28; Matt. 5:16; 1 Pit. 2:12)

    Izipt ram ah ngeihpi kum dih in mangṭam kum nih a hun zulhnak nih nihin Jehovah a miphun le Khrihfaram hna i thlarau lei an sining aa thleidannak kha zeitindah a langhter? (Gen. 41:29, 30; Amos 8:11, 12)

  • Genesis 42:1-8 le 50:20 rel.

    Ram ramkhat i phunglam a si ahcun Jehovah a bia mi hna nih mi pakhat kha a rian caah upatnak le hmaizahnak in a hmai ah kunpiak cu a palh maw? (Gen. 42:6)