A ummi cazin ah kal

A ummi cazin ah kal

Tuanbia 22: Josef Thong A Tla

Tuanbia 22: Josef Thong A Tla

Josef cu Izipt lei an kalpi lio ah hin kum 17 lawng a rak si rih. Cuka ah cun Potifar an timi pa sin ah amah cu an rak zuar. Potifar cu Izipt siangpahrang Faraoh caah rian ṭuantu pakhat a rak si.

Thonginn chung i Josef

Josef cu a bawipa Potifar caah rian cu fakpi in a rak ṭuan. Cucaah Josef cu a hung upat deuh tik ah, Potifar nih cun amah cu a inn chung dihlak zohkhenhtu ah a chiah. A si ah cun zeicahdah Josef cu hi thonginn chung ah hin a um kun? Cucu Potifar nupi ruang ah a si.

Josef cu a hung upat tik ah, mi dawh ngai pakhat ah a cang i, Potifar nupi nih amah he it seh ti a rak duh. Sihmanhsehlaw Josef nih cun cucu a ṭha lo ti a hngalh i a rak duh lo. Cutik ah Potifar nupi cu a thin a hung ngaingai. Cucaah a vapa inn i a rak ṭin tik ah, a hlen i: ‘Khi mi ṭhalo pa Josef nih hramhram in ka sin ah ih awk ah aa zuam,’ tiah a chimh. Potifar nih cun a nupi cu a zumh i, Josef cung ah a thin a hung ngaingai ve. Cucaah Josef cu thong ah a thlak.

Thonginn uktu bawi nih cun a rauh hlan ah Josef cu mi ṭha a si ti a hngalh colh. Cucaah thongtla dang vialte uktu ah a chiah. A hnu ah Faraoh cu a hrai putu bawi le changreu sertu bawi cung ah a thin ahung i thong ah a thlak ve hna. Zankhat cu cu hna pahnih cu mang pakhat veve an rak manh. Sihmanhsehlaw a sullam cu an rak hngal hna lo. A thaizing ah Josef nih :‘Nan mang cu ka chim tuah u,’ tiah a ti hna. Cun an chimh tik ah, Pathian bawmhnak thawng in Josef nih cun an mang sullam cu a rak chimh hna.

Hrai putu bawi sin ah cun Josef nih: ‘Nithum hnu ah thong chung in chuah na si lai i Faraoh a hrai putu bawi na ṭuan ṭhan lai,’ a rak ti. Cucaah Josef nih: ‘Na chuah tik ah keimah kong kha Faraoh sin ah va chim te law, hika hmun in kachuah khawh nak hnga ka bawm ve te,’ tiah a ti rih. Sihmanhsehlaw changreu sertu bawi sin ah cun Josef nih: ‘Ni thum hnu ah Faraoh nih na lu an tan te lai,’ tiah a rak ti.

Nithum hnu ah cun Josef nih a rak chim bantuk tein a tlung taktak. Faraoh nih changreu sertu bawi a lu cu a tan ter hna. Asinain hrai putu bawi cu thong chung cun an chuah i siangpahrang a rian kha ṭuan hram a thok ṭhan. Sihmanhsehlaw hrai putu bawi nih cun Josef kong cu a philh dih ai! Amah kong kha Faraoh cu a chim ti lo i, Josef cu thong chung ah cun a tang rih ko.

Genesis 39:1-23; 40:1-23.



Biahalnak hna

  • Josef cu Izipt lei an kalpi lio ah kum zeizat dah a si i cuka a phak tikah zeidah a cang?
  • Zeitindah Josef cu thonginn a phanh?
  • Josef cu thonginn chungah zei ṭuanvo dah an pek?
  • Thonginn chungah, Josef nih Faraoh a hrai putu bawi le changreu sertu bawi caah zeidah a rak tuahpiak hna?
  • Hrai putu bawi thonginn in an chuah hnu ah zeidah a cang?

Biahalnak dang hna

  • Genesis 39:1-23 rel.

    Josef chan lio ah zuanzamnak kha hrial awkah Pathian nawlbia ah ṭial a rak si rih lo nain Potifar nupi sinin zam awkah amah cu zeinihdah a forh? (Gen. 2:24; 20:3; 39:9)

  • Genesis 40:1-23 rel.

    Hrai putu bawi a mang le Jehovah nih Josef a lehpiak mi mang a sullam kha a tawinak in chim. (Gen. 40:9-13)

    Changreu sertu bawi nih zei mang dah a manh i a sullam cu zeidah a si? (Gen. 40:16-19)

    Nihin zumhawktlak le a fimmi sal bu nih Josef lungputning kha zeitindah an i zohchunh? (Gen. 40:8; Salm 36:9; Johan 17:17; Lam. 17:2, 3)

    Genesis 40:20 nih chuahni lawmhnak puai kong i Khrihfa hmuhnak kha zeitindah a ceuter? (Pct. 7:1; Mar. 6:21-28)