A ummi cazin ah kal

A ummi cazin ah kal

Tuanbia 19: Jakob Chungkhar Nganpi A Ngei

Tuanbia 19: Jakob Chungkhar Nganpi A Ngei
Jakob le a fapale

Hi chungkhar nganpi hi zoh hna hmanh u. Hi hna cu Jakob a fapale 12 an si. Cun fanu zong a ngei hna. A fale an min cu nan hngal bang hna maw? An min cheukhat cu zoh hmanh u sih.

Leah nih Reuben, Simeon, Levi le Judah a hrin hna. Rachel nih fa ka ngei lo ti a hmuh tik ah a ngaih a rak chia ngaingai. Cucaah a salnu Bilhah kha Jakob cu a pek i, Bilhah nih cun fapa pahnih Dan le Naftali a hrin hna. Cun Leah zong nih a salnu Zilpah kha Jakob cu a pek ve i, Zilpah nih cun Gad le Asher kha a hrin ve hna. Leah cu a donghnak ah fapa pahnih Issakhar le Zebulun kha a hrin hna.

A hnu bik ah Rachel cu fa pakhat a rak ngei kho ve. Josef tiah min a sak. A hnu ah Josef kong cu tampi kan hngalh te lai, zeicahtiah a biapi ngaingai pakhat ah a rak cang. Hi fapa 11 hna cu Rachel a pa Laban sin i a rak um lio ah Jakob nih a hrin mi hna an si.

Jakob nih fanu hna zong a ngeih hna. Sihmanhsehlaw Baibal nihcun a fanu pakhat a min lawng a chim. Amah min cu Dinah a si.

Jakob nih Laban sin in chuah in, Kanaan ram i kal awk aa rak i timhnak caan a hung phan. Cucaah a innchungkhar nganpi le a tuu­run nganpi le a cawrun hna cu a rak khawmh hna i a sau ngaimi khual tlawnnak cu aa rak i thawh.

Jakob le a chungkhar hna Kanaan ram an phanh ṭhan nak in tlawmpal ah Rachel nih fapa dang pakhat a hrin ṭhan. Cucu an khual tlawn lio ah cun a rak si. Rachel cu a fahrin a rak fah tuk caah a hrin khawh cangka a rak thi. Asinain ngakchiapate tu cu a rak nung. Jakob nih Benjamin tiah min a sak.

Israel miphun dihlak cu Jakob a fapale 12 chung in an chuah caah an min cu hngalh zungzal kan duh hna. Angaite in cun Israel phun 12 hna cu Jakob a fapale 10 le Josef a fapale pahnih an min in auh an si. Hi ngakchia hna an chuah hnu kum tampi tiang Isak cu a rak nung ko rih i, a tule hi tluk in an tam caah hin a lung aa rak i lawm ngai lai. Sihmanhsehlaw a tunu Dinah cu zeitindah a rak si zoh rih hmanh u sih.

Genesis 29:32-35; 30:1-26; 35:16-19; 37:35.



Biahalnak hna

  • Jakob nih a nupi hmasa Leah sinin a ngeihmi fapa paruk hna i an min cu hodah an si?
  • Leah salnu Zilpah nih Jakob a hrin piakmi fapa pahnih hna cu hodah an si?
  • Rachel salnu Bilhah nih Jakob a hrin piakmi fapa pahnih hna min cu hodah an si?
  • Rachel fapa pahnih cu ahodah an si, a pahnihnak fapa a hrin lio ah zeidah a cang?
  • Hmanthlak chung ningin Jakob nih fapa pa zeizat dah a ngeih hna i annih chungin zei miphun dah a chuak?

Biahalnak dang hna

  • Genesis 29:32-35; 30:1-26; le 35:16-19 rel.

    Jakob fapa 12 hna min nih a langhter bantukin Hebru ngakchia pa hna kha hlan lio chan ah zeitindah an min an sak tawn hna?

  • Genesis 37:35 rel.

    Baibal nih Dinah min lawng a chim nain, Jakob nih fanu pakhat nak tam a ngei lai ti kha zeitindah kan theih khawh? (Gen. 37:34, 35)