A ummi cazin ah kal

A ummi cazin ah kal

Tuanbia 18: Jakob Haran ah A Kal

Tuanbia 18: Jakob Haran ah A Kal

Jakob nih bia a ruah lengmangmi hi mi hna hi aho an si nan hngal hna maw? Ni tampi a kal hnu in Jakob nih annih cu tikhor pakhat pawng ah a ton hna. Annih cu an tuu an rak khalh lengmang lio a si. Jakob nih: ‘Nannih cu khuazei in dah nan si?’ tiah a hal hna.

‘Haran khua mi kan si’ tiah an leh.

‘Laban kha nan hngal maw?’ tiah Jakob nih a hal hna.

‘Kan hngalh ko, zohhmanh, kakhin a fanu Rachel a tuu hna he a ra lio khi,’ tiah an leh. Khika i lam hlatpi ah Rachel a rat khi nan hmu kho maw?

Jakob le Rachel an i ton lio

Jakob nih a pu Laban a tuu hna he Rachel a rat lengmangmi kha a hmuh tik ah, tuu hna nih ti an din khawh nak hnga tikhor cung i lung kha a va ṭhial. Cun Jakob nih Rachel cu a hnamh i aho a si kha aa hngalhter. Rachel cu a lung aa lawm ngai i, inn ah a va kal i a pa Laban kha a va chimh.

Laban cu Jakob a inn i a um lai kha a lung aa lawm ngaingai ve. Cun Jakob nih Rachel kha ka ṭhit lai tiah a hal tik ah, Laban cu a lung aa lawm ngaingai. Sihmanhsehlaw, Jakob cu a lo chung ah kum sarih chung Rachel caah rian ṭuan a rak fial. Rachel cu a rak duh tuk caah Jakob nih cun a rak ṭuan ve ko. Asinain i ṭhitnak ding caan a phanh tik ah, zeidah a rak cang ti nan hngal maw?

Laban nih a fanu upa deuh Leah kha Rachel can ah a rak pek ai. Kum sarih chung na rian kan ṭuan piak rih lai tiah a hna a tlak hnu ah Laban nih Jakob cu Rachel kha a nupi caah a rak pek. Khi lio caan ah cun Pathian nih pa kha nupi pakhat nak tam ngeihnak nawl a rak pek hna. Sihmanhsehlaw atu cu, Baibal nih a chim bang in, pa pakhat nih nupi pakhat lawng ngeih awk a si cang.

Genesis 29:1-30.



Biahalnak hna

  • Hmanthlak chung i kum no minu pakhat cu ahodah a si i Jakob nih mah minu caah zeidah a rak tuahpiak?
  • Jakob nih Rachel ṭhitnak nawl hmuh awkah zei tuah dah a rak duh?
  • Jakob nih Rachel ṭhitnak ding caan a phak tikah Laban nih zeidah a rak tuah?
  • Jakob nih Rachel kha a nupi ca in ṭhit awkah zei tuah ding dah a hna a rak tlak?

Biahalnak dang hna

  • Genesis 29:1-30 rel.

    Laban nih a rak hlen nain Jakob nih upat awk tlak a si kha zeitindah a rak langhter i mah in khan zeidah kan i cawn khawh? (Gen. 25:27; 29:26-28; Matt. 5:37)

    Ngaknu tlangval i duhnak men le dawtnak an i thleidannak kha Jakob hmuhtonnak nih zeitindah a langhter? (Gen. 29:18, 20, 30; Sol. 8:6)

    Jakob nupi an hung si hnu ah fapa a hrin piakmi nu pali cu ahodah an si? (Gen. 29:23, 24, 28, 29)