A ummi cazin ah kal

A ummi cazin ah kal

Tuanbia 14: Pathian nih Abraham Zumhnak a Hneksak

Tuanbia 14: Pathian nih Abraham Zumhnak a Hneksak

Kahin Abraham cu zeidah a tuah ti nan hngal maw? Namte aa put i a fapa kha thah aa timmi a lo. Zeicahdah mah cu a rak tuah hnga? Hmasa bik ah Abraham le Sarah nih an fapa cu zeitindah an rak hmuh ti kha zoh hmanh u sih.

Abraham nih Isak pekchanh a timh lio

Annih cu fapa pakhat nan ngei lai tiah Pathian nih bia a kam hna ti kha philh hlah u law. Sihmanhsehlaw mah cu a si kho lai lomi a lo, zeicahtiah Abraham le Sarah cu an tar tuk cang. Asinain Abraham nih cun a si kho lomi thil zong Pathian cu a tuah khawh ko tiah a rak zumh. Cucaah zeitindah a rak si?

Pathian nih biakamnak a tuah hnu in kumkhat bak a rak luan. Cun Abraham cu kum 100 a rak si i Sarah cu kum 90 a si tik ah Isak an timi fapa pakhat an rak ngei. Pathian nih a biakamnak cu a rak tlin ter.

Sihmanhsehlaw Isak cu a hung upat deuh tik ah, Jehovah nih Abraham zumhnak cu a rak hneksak. ‘Abraham!’ tiah a rak auh i, Abraham nih cun: ‘Bawipa, ka ngaih ko,’ tiah a rak leh. Cu tik ah Pathian nih: ‘ Na fapa pakhat lawngte na ngeih mi Isak kha la law kan hmuhsak lai mi tlang ah kal u. Cuka ah cun na fapa kha na thah lai i khangh thawinak ah na ka pek lai,’ tiah a rak ti.

Abraham nih a fapate cu a dawt tuk hringhran caah khi bia a theih tik ah Abraham cu a ngaih a chia ngaingai! Cun Abraham a tefa pawl cu Kanaan ram ah an um te lai tiah Pathian nih bia a rak kam mi zong kha philh hlah u. Isak a thih ah cun cu biakamnak cu zeitindah a tlin khawh hnga? Abraham cu a sullam a thei kho hrimhrim lo. Asinain Pathian bia cu a rak ngaih ṭhiamṭhiam ko.

Abraham nih tlang cung a va phak tik ah a fapa Isak cu hri in a ṭem i a sermi theng cung ah khan a chiah. Cun namte cu a lak i a fapa cu thah aa rak i tim. Sihmanhsehlaw mah lio te ah cun Pathian vancungmi nih: ‘Abraham, Abraham!’ tiah a run auh. Cun Abraham nih: ‘A si, hika ah ka um ko! tiah a rak leh.

‘Ngakchiapa kha zeihmanh harnak pe hlah, a cung ah zeihmanh zong tuah fawn hlah,’ tiah Pathian nih a ti. ‘Fapa pakhat lawngte na ngeih mi hmanh pek sian lo in na ka um piak lo caah, atu cu na ka zumh taktak ti kha ka hngalh,’ tiah Pathian nih a ti.

Zeitluk a nganmi zumhnak dah Abraham nih Pathian cung ah a ngeih ruat hmanh u! Jehovah a tuah khawh lo mi thil a um lo i, Isak zong kha thihnak in Jehovah nih a thawh ter khawh ṭhan ko lai tiah a rak zumh. Sihmanhsehlaw Abraham nih Isak kha that tak tak seh ti Pathian nih a rak duhmi a si lo. Cucaah Pathian nih an pawngte i a um mi burbuk chung ah khan tuu pakhat kha aa ngerhter i, Abraham kha a fapa can ah mah tuu in khan thawinak tuah awk ah a rak chimh.

Genesis 21:1-7; 22:1-18.



Biahalnak hna

  • Pathian nih Abraham sinah zei biakamnak dah a tuah i a biakamnak kha zeitindah a rak tlinter?
  • Hmanthlak ah kan hmuh bantukin, Pathian nih Abraham zumhnak kha zeitindah a rak hneksak?
  • Pathian nawl pekmi a ruang kha Abraham nih a rak hngalthiam lo nain zeidah a rak tuah?
  • Abraham nih a fapa kha thah awkah namte a lak tikah zeidah a cang?
  • Abraham i Pathian a zumhnak cu zeitluk indah a rak ṭhawn?
  • Khangh thawinak caah Abraham kha Pathian nih zeidah a rak pek, zeitindah a rak pek?

Biahalnak dang hna

  • Genesis 21:1-7 rel.

    Zeiruangah Abraham nih a fapa Isak kha niriatnak ni ah a cuarpar a tan? (Gen. 17:10-12; 21:4)

  • Genesis 22:1-18 rel.

    Isak nih a pa Abraham nawl a ngaihnak kha zeitindah a langhter i mah nih khan sullam a ngei deuhmi hmailei ah a cang laimi thil pakhat kha zeitindah a rak langhter chung? (Gen. 22:7-9; 1 Kor. 5:7; Fil. 2:8, 9)