A ummi cazin ah kal

A ummi cazin ah kal

Tuanbia 12: Minung nih Innsang Nganpi an Sak

Tuanbia 12: Minung nih Innsang Nganpi an Sak

Kum tampi a rak liam. Noah a fapale hna nih tefa tampi an rak ngei. Cun an fale cu an hung upa i tefa an rak ngei ṭhan ve. Tlawmpal ah cun vawlei cung ah minung tampi an hung um.

Cu hna lak i pakhat cu Noah a tuchin a simi Nimrod a rak si. Amah cu mi ṭhalo, saram he minung he a rak pel hna i a rak that tu hna a si. Nimrod nih cun mi dang vialte kha uk awk ah amah le amah cu siangpahrang ah aa ser. Pathian nih Nimrod cu a rak duh hrim lo.

Cu lio caan i minung vialte cu holh phunkhat an rak hmang. Nimrod nih cun mi vialte kha a uk khawh nak hnga hmunkhat ah um ter dih a rak duh hna. Cucaah zeidah a rak tuah nan hngal maw? Mi hna kha khuapi pakhat ser in a chung ah innsang nganpi pakhat a rak sakter hna. Mi hna nih tlakrawh an rak sermi hi hmanthlak ah hin zoh hna hmanh u.

Jehovah Pathian cu hi inn an sakmi cu a rak duh hrimhrim lo. Pathian nih cun mi hna kha khua zakip ah i ṭhial hna seh law vawlei dih lak ah um hna seh ti a rak duh. Sihmanhsehlaw mi hna nihcun: ‘Ra u! Khuapi pakhat le a chung ah innsang pakhat a par van tong in sa u sih. Cutik lawng ah kan min cu a thang lai!’ an rak ti. Mi hna nih cun Pathian min thangṭhatter kha duh lo in, anmah min thangṭhat ter kha an rak duh.

Cucaah Pathian nih an inn saknak kha a rak ngol ter hna. Zeitindah mah cu a rak tuah nan hngal maw? Mi hna kha holh phunkhat lawng an hmannak in khan chikkhat te ah holh a phunphun a rak chim ter hna. Inn satu hna cu pakhat le pakhat an holh an rak i thei ti lo. Cu ruang ah cun an khuapi cu Babel, a si lo ah Babilon tiah an ti. A sullam cu “Tuainak” ti a si.

Cu caah mi hna cu Babel in khan an rak i ṭhen. Holh phunkhat a hmang mi kha bukhat ah an i kawm cio i vawlei hmun dangdang cio ah khan an rak kal cio.

Genesis 10:1, 8-10; 11:1-9.

Rianṭuantu pawl nih innsang nganpi an sak lio


Biahalnak hna

  • Nimrod cu ahodah a si, Pathian nih zeitindah a rak hmuh?
  • Hmanthlak chung i mi hna nih zeicah tlakrawh an ser?
  • Zeiruangah inn an sakmi cu Jehovah nih a rak duh lo?
  • Zeitindah innsang an sakmi kha Pathian nih a rak ngolter hna?
  • Khuapi cu zeitindah an auh i mah a min sullam cu zeidah a si?
  • Mi kha Pathian nih an holh a rak danter hna hnu ah zeidah a cang?

Biahalnak dang hna

  • Genesis 10:1, 8-10 rel.

    Nimrod nih zei a sining dah a rak langhter, mah nih khan zei ralrinnak dah a kan pek? (Ptb. 3:31)

  • Genesis 11:1-9 rel.

    Innsang an saknak hnulei ah zei timhnak dah a um, an i timhnak a rak rawhnak cu zeiruangah a si? (Gen. 11:4; Ptb. 16:18; Johan 5:44)