A ummi cazin ah kal

A ummi cazin ah kal

Tuanbia 27: Siangpahrang Ṭhalo nih Izipt A Uk

Tuanbia 27: Siangpahrang Ṭhalo nih Izipt A Uk

Hika i mi hna nih hin mi cu hramhram in rian an fial hna. Rian ṭuantu pakhat kha saphaw hrihrual in a tuk chih mipa hi zoh hmanh u! Rian ṭuantu pawl cu Jakob innchungkhar mi hna an si i, Israel miphun tiah auh an si. Anmah kha hramhram in rian a fial tu hna cu Izipt miphun an si, Israel miphun hna cu Izipt miphun an sal ah an cang. Zeitindah mah cu a rak si?

Izipt mi nih Israel mi an hrem hna

Kum tampi chung cu Jakob a innchungkhar mi hna cu Izipt ram ah dai tein an rak um. Siangpahrang Faraoh dah ti lo in cun Izipt ram ah a lianngan bikmi Josef nih annih cu a rak zohkhenh hna. Sihmanhsehlaw a hnu ah cun Josef cu a rak thi. Cun Israel miphun a rak duh lomi Faraoh dang pakhat cu Izipt ram ah siangpahrang a hung si.

Cucaah hi a ṭha lomi Faraoh nih Israel miphun cu sal ah a can ter hna. Cu hlei ah a puarhrang mi le a ṭha lo mi pawl kha anmah uktu ah a rak chiah hna. Israel mi hna kha Faraoh caah khuapi hna kha an sak ter hna i fakpi in rian an ṭuan ter hna. Sihmanhsehlaw Israel mi hna cu an karh chin lengmang ko. Tlawmpal hnu ah cun Izipt mi hna cu Israel mi hna hi an tam tuk lai i an ṭhawng tuk lai ti an phang cang.

Izipt mi nih Israel mi an hrem hna

Faraoh nih zeidah a rak tuah nan hngal maw? Fa a hringmi Israel nu hna a bawmtu sayama pawl kha a auh hna i: ‘An hrin mi ngakchia pa paohpaoh cu nan thah hna lai,’ tiah a ti hna. Sihmanhsehlaw khi nu hna cu miṭha an si caah ngakchia a chuakmi kha an that hna lo.

Cucaah a mi vialte kha hi nawlbia hi a pek hna: ‘Israel mi pa ngakchia vialte kha va that dih hna u. Nu ngakchia lawnglawng nan va nunh hna lai,’ a ti. Ṭih a nung ngaimi nawlbia a si ko lo mei? Ngak chiapa pakhat cu zeitindah a rak luat ti zoh rih hmanh u sih.

Exodus 1:6-22.



Biahalnak hna

  • Hmanthlak chungah saphaw hrihrual aa put mipa cu ahodah a si i a tukmi pa cu ahodah a si?
  • Josef a thih hnu ah Israel mi cu zei ah dah an can?
  • Izipt mi hna nih Israel mi hna kha zeicah an ṭih hna?
  • Faroah nih Israel nu hna fahrin a bawmtu nu pawl kha zei nawlbia dah a pek hna?

Biahalnak dang hna

  • Exodus 1:6-22 rel.

    Jehovah nih Abraham sinah bia aa kam mi kha zeiti lam indah a rak tlinter? (Ex. 1:7; Gen. 12:2; Lam. 7:17)

    Hebru nau a hrintertu nu hna nih nunnak man a ngeihnak an upat kha zeitindah an langhter? (Ex. 1:17; Gen. 9:6)

    Nau a ngeihtertu nu hna cu Jehovah sin i zumhawktlak an si caah zei thluachuah dah an hmuh? (Ex. 1:20, 21; Ptb. 19:17)

    Biakammi Abraham Tefa kong he aa pehtlaiin Jehovah timhnak kha khenkham awkah Satan nih zeitindah aa zuam? (Ex. 1:22; Matt. 2:16)