A ummi cazin ah kal

A ummi cazin ah kal

Tuanbia 16: Isak Nupi Ṭha a Ngei

Tuanbia 16: Isak Nupi Ṭha a Ngei

Hika hmanthlak i minu hi ahodah a si nan hngal maw? Amah min cu Rebekah a si. Cun ton awk in a rat hnawh mi pa cu Isak a si. Amah cu Isak nupi ding a si. Mah cu zeitindah a rak si khawh?

Hitin a si. Isak a pa Abraham nih a fapa Isak caah nupi ṭhate pakhat ṭhit piak a rak duh. Kanaan ram i mi hna cu a hmaan lomi pathian an biak caah cuka ram i nu hna lak in pakhatkhat kha Isak nih ṭhit ding cu a rak duh lo. Cucaah Abraham nih a salpa kha a auh i hitin a ti: ‘Ka rualchan hna an umnak Haran khua ah va kal law ka fapa Isak caah nupi pakhat in va ṭhit piak awkah ka duh.’

Abraham a salpa nih cun kalauk pahra kha aa lak colh i lam hlapi ah khual tlawn awk ah aa thawh colh. Abraham a rualchan an umnak pawng a phanh tik ah, tikhor pakhat ah aa din. Zanlei sang ah a si i, khi khua chungmi nu hna nih tikhor i ti than awk ah an rat nak ding caan a rak si. Cucaah Abraham a salpa cu Jehovah sin ah thla a cam i: ‘Keimah le ka kalauk hna ca i ti a kan than piakmi nu cu Isak nupi ca i na thimmi nu cu si ko seh,’ tiah a rak ti.

Rebekah le Isak an i ton lio

Tlawmpal hnu ah Rebekah cu ti than awk ah a rak ra taktak. Abraham salpa nih ti din awk ah a hal i a rak pek. Cu hnu ah a ti a hal ngaimi kalauk hna ca zong ah za lak in ti cu a than piak rih hna. Cu cu a har ngaimi rian a si, zeicahtiah kalauk cu ti tampi a ding khomi an si.

Rebekah nih ti cu a dinh dih hna hnu ah, Abraham salpa nih a pa min a rak hal. Cun an inn ah zankhat tein ka riak kho hnga maw tiah a rak hal fawn. Amah nih cun: ‘Kapa cu Bethuel a si, nan riahnak ding hmun zong kan inn ah a um ko lai,’ tiah a ti. Abraham salpa nih cun Bethuel cu Abraham a upa Nahor fapa a si ti kha a hngalh. Cucaah a khuk aa bil i Abraham a rualchan hna sin i a hruai caah Jehovah kha a lawmh i thla a cam.

Cu zan ah cun Abraham salpa nih Bethuel le Rebekah a ṭapa Laban Kha a ratnak kong cu a chimh hna. An pahnih in Rebekah cu a sin ah zulh in Isak he an i ṭhi-um kho ko tiah an hna a tla veve. A ruahnak an hal tik ah Rebekah nih Zeitindah a rak leh hna? A si, ka kal duh ko,’ tiah a rak ti. Cucaah a thaizing hrimhrim ah Kalauk kha an i cit i, Kanaan ram ah cun an rak tlung ṭhan.

An phak tik ah cun zanlei sang a rak si. Rebekah nih mipa pakhat lo chung i aa chawh mi kha a hmuh. Amah cu Isak a si. Rebekah a hmuh tik ah cun aa lawm ngaingai. A nu Sarah cu cuhlan kum thum lio ah khan a rak thi cang nain a ngaih a chia ko rih. Sihmanhsehlaw atu cu Isak nih Rebekah kha a duh ngaingai caah a lung aa lawm ṭhan cang.

Genesis 24:1-67.



Biahalnak hna

  • Hmanthlak chung i minu le mipa hi ahodah an si?
  • Abraham nih a fapa nupi ṭhitpiak awkah zeidah a tuah, zeicah?
  • Abraham salpa thlacamnak cu zeitindah leh a si?
  • Isak vat awkah Rebekah kha an hal tikah zeitindah a rak leh hna?
  • Zeinihdah Isak kha a lung a lawmhter ṭhan?

Biahalnak dang hna

  • Genesis 24:1-67 rel.

    Tikhor pawngah Abraham salpa he an i ton lio ah Rebekah nih zei a ṭha ngaimi ziaza dah a rak langhter? (Gen. 24:17-20; Ptb. 31:17, 31)

    Nihin Khrifa hna caah Abraham nih a fapa Isak caah a timhtuah piakmi in zei a ṭhami i cawn awk dah a um? (Gen. 24:37, 38; 1 Kor. 7:39; 2 Kor. 6:14)

    Zeicah Isak bantukin, kannih zong a caan la in khua kan ruah awk a si? (Gen. 24:63, NW; Salm 77:12; Fil. 4:8)