A ummi cazin ah kal

A ummi cazin ah kal

Tuanbia 15: Lot Nupi Hnulei A Zoh Ṭhan

Tuanbia 15: Lot Nupi Hnulei A Zoh Ṭhan

Lot le a innchungkhar cu Abraham sin ah Kanaan ram ah an rak um ve. Nikhat cu Abraham nih Lot sin ah cun: ‘Kan saṭil caah hika hmun hi a bi tuk. Zaangfahnak in i ṭhen ko u sih. Nangmah khatlei na kal ah cun keimah a dang khatlei ka kal ve lai,’ tiah a rak ti.

Cu tik ah Lot nih ram cu a zoh i, ti zong a tam i, a saṭil caah ramhring a ṭhatnak hmun kha a rak hmuh. Cucu Jordan District a si. Cucaah Lot nih a innchungkhar le a saṭil cu cuka lei ah cun a rak i ṭhialpi hna. A donghnak ah Sodom khuapi ah khan umhmun an khuar.

Sodom khua mi hna cu an rak ṭha lo ngaingai. Mah nih cun Lot cu a lung a rak fahter ngaingai, zeicahtiah amah cu miṭha a rak si. Pathian zong a lung a rak fak ve. A donghnak ah cun, Pathian nih a vancungmi pahnih kha Sodom le a pawng i Gomorrah khua kha an ṭhat lo tuk caah ka hrawh hna lai tiah Lot kha ralrin a run pekter hna.

Vancungmi nih cun Lot cu: ‘I hnawh tuah u! Na nupi le na fanu pahnih kha la hna law hi hmun hin chuak tuah u!’ tiah an rak ti. Lot le a innchungkhar cu chuah awk ah an khul a rak nuar deuh i, cucaah vancungmi hna nih an kut in an hnuh hna i khua leng ah khan an chuahpi hna. Cun vancungmi pakhat nih: ‘Nan nun nakhnga tli u! Hnulei zoh hlah u. Tlang ah tli u law nan thi lai lo,’ tiah a rak ti hna.

Lot le a fanule nih cun an rak ngaih i Sodom khua in an chuak. Tlawmpal hmanh an rak i din lo. Hnulei zong an zoh ṭhan lo. Sihmanhsehlaw Lot nupi cu a rak ngai lo. Sodom khua in hla nawn an kal hnu ah a dir i hnulei a rak zoh ṭhan. Cutikah Lot nupi cu cite tung ah a cang. Hmanthlak chung ah hin amah cu nan hmu maw?

Hi thawng in fimnak pakhat kan i lak khawh. Pathian nih amah bia a ngaimi cu a khamh hna nain a bia a ngai lomi hna cu an nunnak an sung lai.

Genesis 13:5-13; 18:20-33 ; 19:1-29; Luka 17:28-32; 2 Piter 2:6-8.

Sodom khua in Lot a zaam lio


Biahalnak hna

  • Zeiruangah Abraham le Lot cu an i ṭhen?
  • Zeicah Lot nih Sodom khua i um kha aa thim?
  • Sodom khua mi cu zei bantuk minung dah an si?
  • Vancungmi pahnih nih Lot kha zei ralrinnak dah an rak pek?
  • Zeicah Lot nupi cu cite tung ah aa can?
  • Lot nupi kongin zeidah kan i cawn khawh?

Biahalnak dang hna

  • Genesis 13:5-13 rel.

    Pakhat le pakhat karlak i buaibainak tonghtham tikah Abraham sinin zeidah kan i cawn khawh? (Gen. 13:8, 9; Rom 12:10; Fil. 2:3, 4)

  • Genesis 18:20-33 rel.

    Jehovah le Jesuh nih dinnak in bia an ceih lai ti kha Abraham le Jehovah an i pehtlaihning nih zeitindah a kan zumhter? (Gen. 18:25, 26; Matt. 25:31-33)

  • Genesis 19:1-29 rel.

    Mah Baibal bia nih nu le nu, pa le pa sualnak i Pathian hmuhning kong he aa tlai in zeidah a langhter? (Gen. 19:5, 13; Lev. 20:13)

    Lot le Abraham nih Pathian lamhruainak an lehnak zeitindah aa thleidan i mah in khan zeidah kan i cawn khawh? (Gen. 19:15, 16, 19, 20; 22:3)

  • Luka 17:28-32 rel.

    Lot nupi nih thilri chawhlawn lei ah zei lungput dah a ngeih i mah nih khan zei ralrinnak dah a kan pek? (Luka 12:15; 17:31, 32; Matt. 6:19-21, 25)

  • 2 Piter 2:6-8 rel.

    Lot kha i zohchunh in kan pawngkam i Pathian zei a rel lomi hna cungah zei bantuk lungput dah kan ngeih awk a si? (Ezek. 9:4; 1 Johan 2:15-17)