A ummi cazin ah kal

A ummi cazin ah kal

Tuanbia 9: Noah Nih Lawng Pakhat A Ser

Tuanbia 9: Noah Nih Lawng Pakhat A Ser
Mi nih Noah an nihsawh

Noah cu nupi pakhat le fapa pathum a rak ngei. A fapale an min cu Shem, Ham le Jafeth an si. Hi fapa pakhat cio nih nupi pakhat cio an rak ngei ve. Cucaah Noah te innchungkhar ah cun minung pariat an rak um.

Pathian nih Noah cu thil theihtlei pakhat a rak tuah ter. Lawng nganpi pakhat ser awk ah a rak fial. Cu lawng cu tilawng bantuk in a nganpi a rak si, sihmanhsehlaw a sau ngai i a ngan ngai mi kuang a lo deuh. ‘Dot thum sang in na ser lai’ i ‘a khaan na dal dih lai’ tiah Pathian nih a ti. A khaan hna cu Noah le a innchungkhar, saram hna le an zapi in an herh hngami rawl chiahnak caah a rak si.

A chung ah ti a luh khawh lo nak ding in lawng cu na ser lai tiah Pathian nih Noah cu a chimh fawn. Pathian nih ‘Tilian nganpi buanchukcho ka thlah lai i vawlei vialte ka hrawh dih lai. Lawng chung i a um lomi vialte cu an thi dih lai,’ tiah a rak ti.

Noah le a fapale hna nih Jehovah a bia cu an rak ngaih i, lawng cu ser hram an rak thok. Sihmanhsehlaw mi dang nih cun heh tiah an rak nihsawh hna. An ṭha lo chin lengmang ko. Pathian nih zeidah a tuah lai ti Noah nih a chimh tik hna ah aho hmanh nih an rak zum lo.

Noah te chungkhar nih saram le rawl kha lawng chung ah an luhpi lio

Lawng cu a ngan ngaingai caah caan saupi an rak ser. Kum tampi an rauh hnu ah a donghnak ah an rak lim. Atu cu Pathian nih saram hna kha lawng chung i luh ter awk ah Noah kha a rak fial ṭhan. Saram cheukhat hna cu a nu pakhat le a pa pakhat in tuahkhat cio in luh ter hna a ti. Sihmanhsehlaw saram dang hna cu pasarih cio in luh ter hna a rak ti. Va phun vialte zong kha luh ter hna tiah Pathian nih Noah cu a rak ti. Noah zong nih Pathian nih a fial bantuk tein a rak tuah dih.

Cu hnu ah, Noah le a innchungkhar zong cu lawng chung ah cun an rak lut ve. Cun Pathian nih innka cu a rak khar. Lawng chung in cun Noah le a innchungkhar nih cun an rak hngah ko. Pathian nih a chim bantuk in buanchukcho cu a tlung taktak hnga maw?

Genesis 6:9-22; 7:1-9.



Biahalnak hna

  • Noah innchungkhar mi pa zeizatdah an si i a fapale pathum hna min cu hodah an si?
  • Zei a um bal lomi thil dah Pathian nih Noah kha tuah a fial, zeiruangah?
  • Noah nih lawng kong a rak chimh tik hna ah a pawngkam mi hna nih zeitindah an rak lehrulh?
  • Saram pawl kha zeiti tuah awk in dah Pathian nih Noah kha a chimh?
  • Pathian nih lawng innka a khar dih hnu ah Noah le a innchungkhar cu zei tuah awk dah an ngeih?

Biahalnak dang hna

  • Genesis 6:9-22 rel.

    Zeinihdah Noah kha aa thleidang ngai in a hmaanmi Pathian a biatu a si ter? (Gen. 6:9, 22)

    Zaang-ennak kha Jehovah nih zeitindah a hmuh i mah nih cun kan i thimmi nuamhseihnak kha zeitindah a hnorsuan awk a si? (Gen. 6:11, 12; Salm 11:5)

    Jehovah bupi sinin lamhruainak kan hmuh tikah Noah kha zeitindah kan i zohchunh khawh? (Gen. 6:22; 1 Johan 5:3)

  • Genesis 7:1-9 rel.

    Mitlinglo mi Noah kha Jehovah nih a dingmi in a rak hmuhnak nih nihin kanmah kha zeitindah thazaang a kan pek? (Gen. 7:1; Ptb. 10:16; Isa. 26:7)