A ummi cazin ah kal

A ummi cazin ah kal

Tuanbia 5: A Har Mi Nunnak Aa Thawk

Tuanbia 5: A Har Mi Nunnak Aa Thawk

Eden dum a lenglei ah cun Adam le Evi cu harnak tampi an tong. An ei an din awk caah fakpi in rian an ṭuan. An pawngkam ah cun aa dawh ngaimi thingthei kung can ah hling le so tampi an hmuh hna. Adam le Evi nih Pathian bia kha an rak ngai lo i Amah hawi an si ti lo caah cubantuk in an rak si.

Adam le a fapa rethei thabaa in rian an ṭuan lio

Cu nak in a ṭha lo deuhmi cu, Adam le Evi cu thih ding a hram an tho cang. Thingkung pakhat a thei kha an ei ah cun an thi lai tiah Pathian nih ralrin a rak pek cang hna ti kha philh hlah u law. Cucaah an ei ni thok in cun thih hram an thok cang. Cutin Pathian bia an rak ngaih lo mi cu an rak hrut taktak ko!

Adam le Evi an fale vialte cu Pathian nih Eden dum chung in a ṭhawl hna hnu ah an hrinmi an si. Cucaah an fale zong cu an tar ve i an thi ve lai ti nak a si.

Adam le Evi nih Jehovah a bia kha ṭha tein rak ngai hna seh law cu anmah ca he an fale ca he nunnak cu a nuam ngai ko hnga. Vawlei cung ah lung lawmhnak he zungzal in an nung kho dih ko hnga. Aho hmanh an tar le an thih a hau hnga lo.

Pathian nih minung cu lawmhnak he zungzal in nung hna seh ti a kan duh piak i, hmailei ni khatkhat cu nan nung te lai ti in bia a kam hna. Vawlei dihlak cu a dawh lawng aa dawh lai lo, sihmanhsehlaw minung vialte zong cu an ngan a dam dih lai. Vawlei cung mi vialte cu mikip he si seh, Pathian he si she hawikawm ṭha an si dih lai.

Evi le a fale pawl

Sihmanhsehlaw Evi cu Pathian hawikawm ṭha a rak si ti lo. Cucaah fa a hrin tik ah fawi tein a rak hring kho ti lo. Fahrin fahnak a rak ngei. Jehovah a bia ngaih lo nak nih ngaih chiatnak tampi amah caah a rak chuah ter taktak ko. A si nan ti ve ko lo maw?

Adam le Evi nih fapa le fanu tampi an ngeih hna. An fapa pakhatnak a rak chuah tik ah cun Kain tiah min an rak sak. An fapa pahnihnak cu Abel an rak ti. Mah hna cu zeitindah an rak um? Nan hngal maw?

Genesis 3:16-23; 4:1, 2; Biathlam 21:3, 4.



Biahalnak hna

  • Eden dum lengah Adam le Evi an nunnak zeidah a lawh?
  • Adam le Evi caah zei thil dah um hram aa thawk, zeiruangah?
  • Zeiruangah Adam le Evi an fale cu an tar i an thih lai?
  • Adam le Evi nih Jehovah bia kha rak ngai hna sehlaw anmah le an fale nunnak cu zeidah a lawh lai?
  • Evi nih nawl a ngaihlo ruangah zei fahnak dah a in?
  • Adam le Evi i hmasa bik an fapa pahnih hna min cu hodah an si?
  • Hmanthlak chung i an fale dang hna cu hodah an si?

Biahalnak dang hna

  • Genesis 3:16-23 le 4:1, 2 rel.

    Vawlei chiatserhnak nih Adam a nunnak kha zeitindah a rak thlen? (Gen. 3:17-19; Rom 8:20, 22)

    “A Nungmi” ti sullam a ngeimi Evi min cu zeiruangah aa tlakmi a si? (Gen. 3:20)

    Adam le Evi nih sualnak an tuah hnu hmanh ah Jehovah nih an cungah zeitindah zawnruahnak a langhter? (Gen. 3:7, 21)

  • Biathlam 21:3, 4 rel.

    Zei ‘thil hlun hna’ an loh dih lai dah nan i ruahchan?