A ummi cazin ah kal

A ummi cazin ah kal

Tuanbia 4: Zeicah An Inn An Sungh

Tuanbia 4: Zeicah An Inn An Sungh

A tu cu zeidah a cang ti kha zohhmanh u. Aa dawh ngaimi dum chung in Adam le Evi cu ṭhawl an si cang. Zeicahdah ti nan hngal maw?

Adam le Evi cu Eden dum chung in ṭhawl an si

A ṭha lomi thil pakhat an rak tuah caah a si. Cucaah Jehovah nih annih cu dan a tat hna. Adam le Evi cu zei a ṭha lomi thil dah an tuah nan hngal maw?

Pathian nih tuah hlah u a timi hna kha an rak tuah. Dum chung i thingthei hna kha Pathian nih nan ei khawh ko a rak ti hna. Sihmanhsehlaw thingkung pakhat a thei kha cu nan ei lai lo, nan ei ahcun nan thi lai tiah a rak ti hna. Cu thingkung cu Pathian nih amah caah a rak chiah. Midang ta a simi thil cu lak awk a si lo ti cu kan hngalh dih, a si lo maw? Cucaah zeidah a rak cang?

Nikhat cu Evi dum chung i amah lawng in a um lio ah rul pakhat nih a sin ah bia a rak chim. Ruat hmanh u! Pathian nih ei hlah u a timi thingthei kha ei awkah Evi kha a rak chimh. Rul kha Jehovah nih a rak ser lio ahcun bia chim kho ding in a rak ser lo. Cucaah mi dang pakhatkhat nih rul cu bia chim kho ding in an rak tuahmi a si lai ti cu a fiang ko. Ahonihdah a rak tuah hnga?

Adam cu a rak si lo. Cucaah amah cu Jehovah nih vawlei a ser hlan pi i a rak ser cangmi hna lak in pakhatkhat a si ko lai. Annih cu vancungmi an si i, kan mit in kan hmu kho hna lo. Hi vancungmi pakhat cu a ruam a rak kai ngaite. Amah nihcun Pathian bantuk in uktu bawi si ning ti a rak duh. Culeng ah minung nih Jehovah a bia an ngaih can ah amah bia tu kha ka ngai hna seh ti a rak duh. Amah cu rul a rak holhtertu vancungmi cu a rak si.

Hi vancungmi nih Evi cu a rak hlen khawh. Khi thingthei kha na ei ahcun Pathian bantuk na si lai tiah Evi kha a chimh tik ah a rak zumh colh ko. Cucaah a rak ei ai; cun Adam zong nih a rak ei ve. Adam le Evi nih hi bantuk lam in Pathian bia kha an rak ngai lo. Cucaah aa dawh ngaimi dum, an inn cu an rak sung.

Sihmanhsehlaw ni khatkhat ah Pathian nih vawlei dihlak cu Eden dum bang in aa dawh ngaimi hmun ah a canter ṭhan hrimhrim lai. Cubantuk in canternak ahcun nannih zong zeitindah nan i tel khawh ve lai ti mi cu hmailei kan i ruah ṭhan te lai. Atu cu Adam le Evi cu zeitindah an rak um ti kha zoh hmasa u sih.

Genesis 2:16,17; 3:1-13, 24; Biathlam 12:9.



Biahalnak hna

  • Hmanthlak chung i Adam le Evi cu zeidah an can?
  • Zeicah Pathian nih dan a tat hna?
  • Rul nih Evi kha zeidah a rak chimh?
  • Evi chawnh dingah rul kha aho nih dah a holhter?
  • Zeiruangah Adam le Evi nih an inn Paradis kha an rak sungh?

Biahalnak dang hna

  • Genesis 2:16, 17 le 3:1-13, 24 rel.

    Rulhreu nih Evi bia a halmi in Jehovah kongah a hmaan loin zeitindah a kan ruahter? (Gen. 3:1-5; 1 Johan 5:3)

    Evi cu kan caah zohchunhawk ralrinnak zeitindah a si? (Fil. 4:8; Jeim 1:14, 15; 1 Johan 2:16)

    Adam le Evi nih an tuahsernak ruangah an hmuhmi ṭuanvo kha zeiti lam in dah an tlinh lo? (Gen. 3:12, 13)

    Eden dum nichuahlei kam ah Jehovah nawlngeihnak kha cherubim hna nih zeitindah an rak dirpi? (Gen. 3:24)

  • Biathlam 12:9 rel.

    Vawlei mi hna kha Pathian uknak tangin a pialter hnanak ah zeitluk in dah Satan a hlawh a tlin? (1 Johan 5:19)