A ummi cazin ah kal

A ummi cazin ah kal

Tuanbia 3: Hmasa Bik Mipa le Minu

Tuanbia 3: Hmasa Bik Mipa le Minu

Hi hmanthlak ah hin zei thil phun dang dah nan hmuh? A si, hi hmanthlak ah cun minung an i tel cang. Annih cu hmasa bik mipa le minu an si. Anmah cu aho nih dah a ser hna? Pathian nih a ser hna. Pathian min cu nan hngal maw? Jehovah a si. Hi mipa le minu cu Adam le Evi tiah an ti hna.

Eden dum ah Adam le Evi

Adam cu Jehovah Pathian nih hitin a rak ser. Vawlei in leidip a lak i, mah in cun a tling mi pa pakhat pum a rak ser. Cun a hnar chung ah a chem i Adam cu a hung nung.

Jehovah Pathian nih Adam kha fial awk rian pakhat a ngei. Saram dang vialte kha an min sak hna tiah a rak fial. Adam nih cun saram hna kha caan saupi a rak ngiat hna hnu ah an ca i a ṭha bik dingmi min kha a sak hna lai. Adam nih saram kha an min a rak sak lio hna ah a rak hngalhmi thil pakhat a um. Mah cu zei a si lai ti nan hngal maw?

Saram cu nupa tuah lawngte in an rak si. Vui papa le vui nunu an rak um i, chindeih papa le chindeih nunu an rak um. Sihmanhsehlaw Adam tu cu amah bantuk hawi a rak ngei ve lo. Cucaah Jehovah nih Adam cu thu hluahmah in a hngilh ter i, mah kar ah cun a hnak ruh pakhat kha a rak zuh. Cu hnak ruh cu hmang in Adam caah minu pakhat Jehovah nih a rak ser piak i amah cu a nupi ah a cang.

Atu cu Adam cu aa nuam tuk cang lai! Evi zong mah tluk aa dawhmi dum chung i a ummi cu zeitluk in dah aa lawmh lai ruat hmanh u! Atu cu fa zong an hring kho cang i lunglawm tein an nung ṭi kho cang.

Jehovah nih cun Adam le Evi cu zungzal in nung hna seh ti a duh hna. Vawlei vialte cu Eden dum bantuk in i dawhter dih hna seh tiah zong aa rak duh piak fawn hna. Adam le Evi zong nih cu tin tuah ding an ruah tik ah zeitluk in dah an rak i lawmh ve hnga! Vawlei hi aa dawh ngaimi dum ah canter nak ah cun nannih tah nan i tel duh ve hnga maw? Sihmanhsehlaw Adam le Evi an lung lawmhnak cu a caan a rak sau lo. Zeicah ti zoh hnik u sih.

Salm 83:18; Genesis 1:26-31; 2:7-25.



Biahalnak hna

  • Tuanbia 3 chung i hmanthlak le Tuanbia 2 chung i hmanthlak an i dannak zeidah a si?
  • Hmasa bik mipa kha aho nih dah a ser i a min ahodah a si?
  • Pathian nih Adam kha zei tuah awk rian dah a pek?
  • Zeiruangah Pathian nih Adam kha thu hluahmah in a hngilhter?
  • Adam le Evi zei caan tiangdah an nun khawh i Pathian nih zei rian dah tuahter a duh hna?

Biahalnak dang hna

  • Salm 83:18, NW rel.

    Pathian min cu hodah a si i vawlei cung pumpuluk ah tluk khawh lomi a sining cu zeidah a si? (Jer. 16:21, NW; Dan. 4:17)

  • Genesis 1:26-31 rel.

    Niruk nak ni i Pathian thil ser donghnak cu zeidah a si i mah a sermi cu zeitindah saram hna he aa thleidan? (Gen. 1:26)

    Minung le saram hna caah Jehovah nih zei thil dah a serpiak hna? (Gen. 1:30)

  • Genesis 2:7-25 rel.

    Adam nih saram pawl an min a saknak hna rian ah zeidah aa tel? (Gen. 2:19)

    Genesis 2:24 nih i ṭhitumnak, i ṭhennak le maknak i Jehovah a hmuhning kha hngalhthiam awkah zeitindah a kan bawmh? (Matt. 19:4-6, 9)