A ummi cazin ah kal

A ummi cazin ah kal

Tuanbia 6: Fapa Ṭha le Fapa Ṭhalo

Tuanbia 6: Fapa Ṭha le Fapa Ṭhalo

Atu cu Kain le Abel hi zoh tuah hna u. Upa an si veve cang. Kain cu lo thlomi pakhat a rak si. Facang le thingthei le anhringso a rak cing.

Kain le Abel nih Pathian sin raithawinak an pek lio

Abel cu tuu cawngtu a rak si. Tuu fatete zohkhenh kha a rak duh ngai. Tuu nganpipi ah an hung cang i cucaah Abel cu zohkhenh awk tuurun nganpi a rak ngei.

Nikhat cu Kain le Abel nih Pathian sin ah thawinak an rak pek veve. Kain nih cun a cinmi rawl cheukhat kha a rak put. Cun Abel nih cun a ngeih mi lak in a ṭha bikmi tuu kha a rak put ve. Jehovah cu Abel le a laksawng ah khan aa lawm. Asinain Kain le a laksawng ah cun aa rak i lawm lo. Zeicah ti na hngal maw?

Abel a laksawng cu Kain a laksawng nak in a ṭhat deuh caah a si lo. Abel cu miṭha a si caah a rak si. Jehovah le a upa kha a rak dawt hna. Sihmanhsehlaw Kain cu miṭhalo a rak si; a nau kha a rak daw lo.

Cucaah Pathian nih Kain cu a lam kha thlen awk ah a rak chimh. Asinain Kain nih cun a rak ngai lo. Pathian nih Abel a dawt deuh caah a thin a rak hung ngaingai. Cucaah Kain nih Abel kha, ‘Lo ah kal u sih,’ tiah a rak ti. Lo ah anmah lawng an um lio ah, Kain nih a nau Abel cu a rak tuk. Fakpi in a tuk caah a rak thi. Kain nih cu thil a rak tuah cu tuk sapur ngai a si lo maw?

Kain nih Abel a thah hnu in a zaam lio

Abel cu thi hmanhsehlaw, Pathian nih cun a hngalh peng ko. Abel cu miṭha a rak si i Jehovah nih cun cubantuk cu a philh hna lo. Cucaah Jehovah nih Abel cu a nun ter ṭhan lai. Cutikah cun Abel cu a thi bal ti lai lo. Hi vawlei cung ah hin zungzal in a nung kho ve cang lai. Abel bantuk minung hngalh cu a ṭha tuk hnga lo mei?

Sihmanhsehlaw Pathian cu Kain bantuk minung cung ah cun a lung aa lawm lo. Cucaah Kain nih a nau a thah hnu in, amah cu a innchungkhar mi hna sin in lam hlapi ah ṭhawlnak in dan a tat. Kain nih vawlei hmun dang i nun awk ah a va kal tik ah, a farle lak i pakhat kha aa kalpi i, a nupi ah a cang.

Cu hnu ah Kain le a nupi cu fa an hung ngei. Adam le Evi an fapa le an fanu dang hna zong an rak i ṭhi ve cio hna i, fa an ngei cio hna. Khi hnu tlawmpal ah cun vawlei cung ah minung tampi an rak um cang. Anmah lak i a cheukhat an kong cu cawng hna hmanh u sih.

Genesis 4:2-26; 1 Johan 3:11, 12; Johan 11:25.



Biahalnak hna

  • Kain le Abel cu zei rian dah an ṭuan?
  • Kain le Abel nih Jehovah sinah zei laksawng dah an i put?
  • Zeicah Jehovah nih Abel laksawng ah aa lawmh i Kain laksawng ah aa lawmh lo?
  • Kain cu zei bantuk phun minung dah a si i Jehovah nih amah kha remh awkah zeitindah aa zuam?
  • Kain nih a nau he anmah lawngin lo ah an um lio ah zeidah a tuah?
  • Kain nih a nau a thah hnu ah zeidah a cang ti kha fianter.

Biahalnak dang hna

  • Genesis 4:2-26 rel.

    Kain cu ṭihnungmi sining chungah a um kha Jehovah nih zeitindah a rak langhter? (Gen. 4:7)

    Kian nih a lungputning kha zeitindah a rak langhter? (Gen. 4:9)

    Sualnak a ngei lomi thisen chuahnak i Jehovah a hmuhning cu zeidah a si? (Gen. 4:10; Isa. 26:21)

  • 1 Johan 3:11, 12 rel.

    Zeicah Kain nih a thinhunnak kha a ṭhanter i mah cucu nihin kanmah caah zeitindah ralrinpeknak a si? (Gen. 4:4, 5; Ptb. 14:30; 28:22)

    Kan innchungkhar mi dihlak nih Jehovah an ralchanh hmanhah kan zumhfehnak kha kan hmunhter khawh peng ti kha Biabal nih zeitindah a langhter? (Salm 27:10; Matt. 10:21, 22)

  • Johan 11:25 rel.

    Dinnak ruang i a thimi vialte hna kha Jehovah nih zei ka pek hna lai ti in dah aamah a khan? (Johan 5:24)