A ummi cazin ah kal

A ummi cazin ah kal

 ṬHEN HLEIRIAT

Pathian Sinah I Pumpek In Tipil Ka In Awk A Si Maw?

Pathian Sinah I Pumpek In Tipil Ka In Awk A Si Maw?

1. Hi cauk ṭha tein na hlathlai dih hnuah zeidah na ruah khawh men?

HI CAUK na cawnmi in zungzal nunnak kong he aa tlaimi Pathian biakam, mithi kong le thawhṭhannak ruahchannak kong ti bantuk Baibal biatak tampi na hun hngalh cang. (Phungchimtu 9:5; Luka 23:43; Johan 5:28, 29; Biathlam 21:3, 4) Jehovah Tehte Hna sin i na hun i pumh tikah a hmaanmi biaknak phung ningin an nung ti kha na hun zumh men ko lai. (Johan 13:35) Jehovah he a ṭhami pehtlaihnak na hun ngeih tikah amah biak awkah biakhiahnak na tuah men ko lai. Cucaah ‘Pathian  biak awkah zeidah ka tuah awk a si?’ tiah na ruah men lai.

2. Ethiopia mipa cu zeicah tipil in a rak duh?

2 Jesuh chan ah a nungmi Ethiopia mipa pakhat cu cutin a hung si. Jesuh a thawhṭhan hnu caan tlawmpal ah Jesuh zultu Filip nih mah pa kha phung a rak chimh. Jesuh cu Messiah a si timi kong kha Filip nih a rak chimh. Ethiopia mipa cu Cathiang in a hngalhmi nih a lung a suk tuk i hitin a ti: “Hika ah hin pei ti a um hi, zeinihdah tipil in a ka donh lai?”—Lamkaltu 8:26-36.

3. (a) Jesuh nih a zultu pawl kha zei nawlbia dah a pek hna? (b) Mi pakhat cu zeitindah tipil a in awk a si?

3 Jehovah rian ṭuan kan duh ahcun tipil in a hauh kha Baibal nih fiang tein a kan cawnpiak. Jesuh nih a zultu pawl kha “miphun vialte kha ka zultu ah va ser hna u; . . . tipilnak va pe hna u” tiah a rak ti hna. (Matthai 28:19) Cun amah Jesuh theng tipil a innak thawng zongin zohchunh awk a rak chiah. Jesuh cu a lu ah ti in theh sawhsawh si loin a pum dihlak in ti chungah hnim a rak si. (Matthai 3:16) Tuchan zongah Khrihfa pakhat cu tipil a in tikah a pum dihlak in ti chungah hnim asiloah a pil awk a si.

4. Tipil na inmi nih zeidah a langhter?

4 Tipil na in tikah Pathian hawi si na duh taktak le amah rian ṭuan na duh kha mi hmaiah na langhtermi a si. (Salm 40:7, 8) Cucaah ‘tipil in awkah zeidah ka tuah a herh?’ tiah na ruat ko lai.

Hngalhnak le Zumhnak

5. (a) Tipil in hlanah zeidah tuah hmasa a herh? (b) Zeicah Khrihfabu pumhnak cu a biapit?

5 Tipil na in hlanah Jehovah le Jesuh kong kha ṭha tein na hngalh hmasa a hau. Baibal na hlathlainak  thawngin cutin hngalh awkah na rak tuah cang. (Johan 17:3 rel.) Asinain mah lawngin a za lo. Jehovah duhnak he aa tlaimi ‘a hmaanmi fimnak le hngalhnak in nan khah’ awk a si tiah Baibal nih a ti. (Kolose 1:9, NW) Jehovah Tehte Hna pumhnak nih Jehovah he a ṭhami pehtlaihnak ngeih awkah aan bawmh lai. Cucaah hmaan tein i pumh cu a biapi tuk.—Hebru 10:24, 25.

Tipil na in hlanah Baibal na hlathlai a hau

6. Tipil in dingin aa tlakmi si awkah Baibal hngalhnak zeizat dah na ngeih a herh?

6 Tipil na in hlanah Baibal chung i a kong vialte hngalh dih dingin Jehovah nih aa ruahchan lo. Ethiopia mipa kha tipil a in hlanah Baibal chung i a kong vialte hngalh dih awkah Jehovah nih aa ruahchan lo. (Lamkaltu 8:30, 31) Pathian kong kha a zungzal in kan cawn lengmang lai. (Phungchimtu 3:11) Asinain tipil na in hlanah a hrampi Baibal cawnpiaknak hna kha na hngalh a hau i na cohlan a hau.—Hebru 5:12.

7. Baibal na hlathlaimi nih zeitindah aan bawmh?

7 Baibal nih “zumhnak loin Pathian lungton khawh a si lo” tiah a ti. (Hebru 11:6) Cucaah tipil in dingah aa tlakmi na si khawh nakhnga zumhnak ngeih a herh. Hlanlio Korin khuami cheukhat cu Jesuh zultu pawl cawnpiaknak kha an theih tikah ‘an zumh i tipilnak an ing’ tiah Baibal nih a ti. (Lamkaltu 18:8) Cu bantukin Baibal na hlathlaimi nih Pathian biakam zumh awk le sualnak le thihnak in a kan luatter khomi Jesuh raithawinak zumh awkah aan bawmh.—Joshua 23:14; Lamkaltu 4:12; 2 Timote 3:16, 17.

Midang kha Baibal Biatak kong Chim Hna

8. Na hngalhmi kong hna kha midang sin chim awkah zeinihdah aan forh lai?

8 Baibal tam deuh in na hun hngalh tik le na nunnak ah zeitluk in dah bawmtu a si ti na hun hngalh tikah na  zumhnak cu a fek chinchin lai. Na hngalhmi kong hna kha midang sinah chim na duh ko lai. (Jeremiah 20:9; 2 Korin 4:13) Cu a si ah ahote dah na chimh hna awk a si?

Zumhnak nih na zumhnak kong midang sin chim awkah aan forh ding a si

9, 10. (a) Na hngalhmi kong hna kha ahote sinah dah na chim hmasa khawh? (b) Khrihfabu he phungchim rian ṭuanṭi na duh ahcun zeidah na tuah awk a si?

9 Na rualchan, na hawikom, na innpa le na rianṭuanhawi hna sinah na hngalhmi kong kha chim na duh men lai. Mah cu a ṭha tukmi a si, asinain nemnak le dawtnak in na chimh hna awk a si. A hnuah Khrihfabu he hmunkhat i phungchimnak ah na hun i tel kho men lai. Cutin tuah awkah timhcia ka si cang tiah na ruah ahcun Baibal aan cawnpiaktu kha Khrihfabu he hmunkhat ah phungchim rian ah i tel ka duh ve tiah na chimh khawh. Baibal aan cawnpiaktu nih timhcia na si cang tiah a ruah i Baibal phunglam ningin na nun ahcun nan pahnih in Khrihfa upa pahnih he i ton awkah a timhtuah lai.

10 Mah i tonnak nih zeidah a chuahter lai? A hrampi Baibal cawnpiaknak na hngalhthiam i na zumhmi, nifa na nunnak ah Baibal phunglam na zulhmi le Jehovah Tehte pakhat si na duh taktakmi a si maw ti hngalh awkah Khrihfa upa nih bia an in ruah lai. Khrihfa upa hna nih nangmah telin Khrihfabu i unau vialte an zohkhenh hna ti kha i cinken, cucaah anmah he bia i ruah ding kha ṭih hlah. (Lamkaltu 20:28; 1 Piter 5:2, 3) Khrihfa upa pawl he nan i ton hnuah sining na tlinh ahcun Khrihfabu he phungchim rian ṭuanṭi dingin an in chimh ko lai.

11. Khrihfabu he phungchim rian i, i tel khawh awkah thlennak tuah cu zeicah a biapit tuk?

11 Khrihfabu he phungchim rian i, i tel awkah sining na tlinh nakhnga thlennak tampi tuah na herh ahcun  Khrihfa upa nih an in chimh ko lai. Cutin thlennak tuah cu zeicah a biapit tuk? Jehovah kong midang sin kan chim tikah Jehovah aiawhtu kan si caah amah a thangṭhatmi lam in kan nun awk a si.—1 Korin 6:9, 10; Galati 5:19-21.

I Ngaihchihnak le I Thlennak

12. Kan dihlak in zeicah kan i ngaihchih a herh?

12 Tipil na in hlanah na tuah awk a simi thil cheukhat a um rih. Lamkaltu Piter nih hitin a ti: “Nan sualnak cu aan hnawhpiak hna nakhnga i ngaihchih u law Pathian leiah khan i mer tuah u.” (Lamkaltu 3:19) I ngaihchih timi cu zei sullam dah a si? Kan rak tuahmi thil ṭhalo pakhatkhat ruangah lungtak in ngaihchiat kha a si. Tahchunhnak ah, a ziaza a rawkralmi na si ahcun naa ngaihchih a hau lai. Cun a si khawh chungin a hmaanmi thil tuah awkah aa zuammi na si hmanhah i ngaihchih a hau rih, zeicahtiah kan dihlak in misual kan si i Pathian ngaihthiamnak a herhmi lawngte kan si.—Rom 3:23; 5:12.

13. I thlen asiloah “i mer” timi cu zei sullam dah a si?

13 Na rak tuahmi thil ṭhalo caah i ngaihchih lawngin a za maw? A za lo. Lamkaltu Piter nih i thlen asiloah “i mer” a hau tiah a ti. Mah cu a hlanah rak tuahmi thil ṭhalo hna kha hlawt in a hmaanmi thil hun tuah kha a chimduhmi a si. Na phanh bal lonak hmun ah a voikhatnak khual ka tlawng tiah na mitthlam ah cuanter hmanh. Tlawmpal na kal hnuah na kalnak lam cu a hmaan lo ti kha na hun hngalh. Mah tikah zeidah na tuah lai? Na dir lai, cun naa mer ṭhan lai i a hmaanmi lam leiah na kal ṭhan ko lai. Cu bantukin Baibal na hlathlai tikah na ziaza cheukhat asiloah na nunnak i thil cheukhat cu thlen a hau ti kha na hun hngalh  men lai. Thlennak tuah na herh ahcun lungtho tein i thleng asiloah “i mer,” cun a hmaanmi thil kha tuah.

Mahle Mah I Pumpeknak

Jehovah sinah a rian ṭuan dingin biakamnak na tuah maw?

14. Pathian sinah nangmahle nangmah zeitindah naa pumpek khawh?

14 Tipil na in hlanah na tuah awk a simi a biapimi a dang kehlan pakhat cu Jehovah sinah nangmahle nangmah i pumpek kha a si. Jehovah sin naa pumpek tikah nangmah lawng kaan biak lai i ka nunnak ah a biapi bikmi thil cu na duhnak tuah hi a si lai tiah thlacamnak in bia naa kammi a si.—Deuteronomi 6:15.

15, 16. Mi pakhat cu amahle amah Pathian sin, i pumpek awkah zeinihdah a forh?

15 Jehovah lawng biak awkah bia naa kammi cu na dawtmi pakhat he na nunchung umṭi awkah bia naa kammi bantuk a si. Pa pakhat le nu pakhat cu an i duh hei ti u sih. Mah pa nih a nungak kong a hngalh deuhdeuh tikah a duh deuhdeuh i ṭhit a hun duh. Mah cu a biapi tukmi biakhiahnak a si ko nain a nungak kha a dawt caah lungtho tein mah rian kha a cohlan.

16 Jehovah kong na hngalh tikah na hun dawt i lungthin dihlak in a rianṭuan kha na hun duh. Mah nih a rian ṭuan dingin bia i kam awkah aan forh lai. Baibal nih Jesuh hnu zulh a duhmi paoh cu “mahzawn aa ruat lomi nan si lai” tiah a ti. (Marka 8:34) Mah cu zei sullam dah a si? Na nunnak ah Jehovah nawlngaihnak kha pakhatnak ah na chiah lai tinak a si. Cucaah nangmah na duhnak le naa tinhnak nakin Jehovah duhnak cu a biapi deuhmi a si.—1 Piter 4:2 rel.

Ka Tlinh lai Lo timi Phannak Ngei Hlah

17. Zeicah mi cheukhat cu Jehovah sinah pumpeknak an tuah lo?

17 Mi cheukhat nih kan biakam ningin kan tuah kho  lai lo timi phannak an ngeih caah Jehovah sinah an i pumpe lo. Annih nih Jehovah ngaihchiatter kan duh lo tiah an ruah caah le Jehovah sin kan i pumpek lo ahcun kan tuahmi thil ruangah Jehovah nih dan a kan tat lai lo tiah an ruah caah a si kho men.

18. Ṭihnak na ngeihmi tei khawh awkah zeinihdah aan bawmh lai?

18 Jehovah na dawtnak nih zei bantuk ṭihnak na ngeihmi hmanh kha tei khawh awkah aan bawmh lai. Jehovah na dawt caah a si khawh chungin na biakam ningin na tuah ko lai. (Phungchimtu 5:4; Kolose 1:10) Cun Jehovah duhnak tuah cu a har tuk tiah na ruat lai lo. Lamkaltu Johan nih hitin a ṭial: “Pathian kan dawt ti cu a nawl kan zul tinak a si ko. Cun a nawlbia cu kan caah a har tuk lo.”—1 Johan 5:3.

19. Jehovah sin, i pumpek ding kha zeicah na ṭih awk a si lo?

19 Jehovah sin, i pumpek awkah a tlingmi si a hau lo. Jehovah nih kan tuah khawhmi lengin tuah awkah zeitikhmanh ah aa ruahchan lo. (Salm 103:14) A hmaanmi thil na tuah khawh nakhnga aan bawmh lai. (Isaiah 41:10) Jehovah kha na lungthin dihlak in naa bochan ahcun “na lam kha a tluanter hna lai.”—Phungthlukbia 3:5, 6.

Mi Zapi Hmaiah Phuannak

20. Pathian sinah naa pumpek hnuah zeidah na tuah awk a si?

20 Jehovah sin, i pumpek awkah timhcia ka si cang tiah na ruat maw? Jehovah sin nangmahle nangmah naa pumpek hnuah a dang kehlan caah timhcia na si lai. Mah cu Tipil innak kha a si.

21, 22. Na zumhnak kha zeitindah ‘zapi hmaiah na phuan’ khawh?

21 Jehovah sinah naa pumpe cang i tipil in na duh ahcun nan Khrihfabu ah Khrihfa upa phu i khuakhangtu  kha theihter. Mah tikah a hrampi Baibal cawnpiaknak hna kha Khrihfa upa cheukhat he i ruahṭi ṭhan awkah aan timhpiak lai. Annih nih sining na tlinh kha an hmuh ahcun Jehovah Tehte Hna nih tuahmi a ra laimi civui ah tipil in dingin an in chimh lai. Mah civui ah tipil innak kong fiantermi phungchimnak pakhat a um lai. Phungchimtu nih tipil a ing hngami hna kha  biahalnak pahnih a hal hna lai. Mah biahalnak hna na phitnak thawngin na zumhnak kha ‘zapi hmaiah a phuangmi’ na si.—Matthai 10:32.

22 Mah hnuah tipil na ing lai. Ti chungah na pum dihlak in hnim a si lai. Tipil na inmi nih Jehovah sinah  nangmah tein aa pumpe cangmi na si le Jehovah Tehte pakhat na si kha mi zapi hmaiah a langhter lai.

Tipil Na Innak Sullam

23. “Pa le Fapa le thiang thlarau min in” tipil in timi sullam cu zeidah a si?

23 Jesuh nih a zultu hna cu “Pa le Fapa le thiang thlarau min in tipilnak” pek an si lai tiah a ti. (Matthai 28:19 rel.) Mah cu zei sullam dah a si? Jehovah nawlngeihnak le Pathian tinhnak i Jesuh a dirhmun hngalhthiam, cun Pathian nih a duhnak tlinternak caah a thiang thlarau zeitindah a hman ti hngalhthiam kha a si.—Salm 83:18; Matthai 28:18; Galati 5:22, 23; 2 Piter 1:21.

Tipil na in tikah Pathian duhnak tuah na duh kha na langhter a si

24, 25. (a) Tipil innak nih zeidah a langhter? (b) A hnu ṭhen ah zei kong dah kan i ruah lai?

24 Tipil innak nih a biapi tukmi thil pakhat kha a langhter. Ti chungah naa hnim dihmi nih a hlanlio na nunning na thihter asiloah na hlawt kha a langhter. Ti chungin na hun chuah tikah Pathian duhmi nunning thar in ka nung cang lai ti na langhtermi a si. Mah nih atu thawkin Jehovah rian na ṭuan cang lai ti kha a langhter. Minung, bu asiloah rian pakhatkhat sinah naa pumpekmi a si lo kha i cinken. Na nunnak dihlak in Jehovah sinah naa pumpekmi a si.

25 Naa pumpeknak nih Pathian he nan i pehtlaihnak fehter chin awkah aan bawmh lai. (Salm 25:14) Asinain mi pakhat cu tipil a in ruangah khamhnak a hmu lai tinak a si lo. Lamkaltu Paul nih hitin a rak ṭial: “Nan khamhnak a tlin khawh nakhnga ṭih le phang lengmang in ṭuan ko u.” (Filipi 2:12) Tipil innak cu a thawknak lawng a si rih. Cu a si ah Jehovah he naih tein zeitindah kan um khawh zungzal lai? Mah kong kha hi cauk i hmanung bik ṭhen nih a fianter lai.