A ummi cazin ah kal

A ummi cazin ah kal

 ṬHEN HLEIKUA

Jehovah He Naih Tein Um

Jehovah He Naih Tein Um

1, 2. Tuchan ah huhphenhnak kha khoika in dah kan hmuh khawh?

THLICHIA a hran lioah a lengah ka kal tiah na mitthlam ah cuanter hmanh. Van cu a mui thluahmah, nimtlau a lek i khua a hung ri. Cun ruah a hung sur. Cucaah i dornak hmun na kawl. Mah lioah a him i a romi hmun na hmuh ahcun zeitluk in dah na hna a ngam lai.

2 Kannih cu, cu bantuk thil sining he aa lomi chan ah kan nung. Vawlei thil sining cu a chia chin lengmang. Cucaah ‘Khoika in dah huhphenhnak ka hmuh khawh lai?’ tiah na ruat men ko lai. Asinain Baibal ah hitin kan hmuh: “BAWIPA, nangmah cu a ka chanhtu le a ka hupphengtu [‘ka dornak le ka ralhruang,’ NW] na si! Nangmah cu ka Pathian na si, nangmah cu kaan bochan.” (Salm 91:2) Jehovah nih buaibainak in a khatmi hi vawlei in a kan huhphenh khawh i hmailei ca zongah a ṭha tukmi ruahchannak a kan pek.

3. Jehovah kha zeitindah kan dornak kan siter khawh?

3 Jehovah nih zeitindah a kan huhphenh khawh? Kan tonmi zei bantuk buaibainak hmanh tawnghtham awkah a kan bawmh khawh i kanmah harnak pek awkah aa zuammi ahote nakhmanh in a ṭhawng deuh. Atu ah thil ṭhalo kan ton hmanhah Jehovah nih hmailei ah a remh ṭhan lai ti kha kan zumh khawh. Baibal nih “Pathian dawtnak chungah khan um ko u” tiah a kan forh. (Judas 21) Harnak caan chungah Jehovah bawmhnak kan hmuh nakhnga Jehovah he naih tein kan um a hau. Cutin zeitindah kan um khawh?

 Jehovah Dawtnak Kha Lehrulh

4, 5. Jehovah nih a dawtnak kha zeitindah a langhter?

4 Jehovah he naih tein um khawh awkah Jehovah nih zeitluk in dah a kan dawt ti kha hngalhthiam a hau. Jehovah nih kan caah a tuahmi thil vialte kha ruat. Jehovah nih aa dawh tukmi vawlei a kan pek i saram le thingkung a phunphun in a khahter. Rawl thawthaw le din awk ti thiang zong a kan pek. Jehovah nih Baibal hmangin a min le a ṭha tukmi a sining hna a kan chimh. Kan ca i a nunnak pek awkah a dawt tukmi a Fapa Jesuh kha Jehovah nih vawlei ah a rak thlahnak thawngin a kan dawtnak kha a langhter. (Johan 3:16) Mah raithawinak thawngin hmailei caah a ṭha tukmi ruahchannak kan ngei.

5 Jehovah dirhmi vancung cozah, Messiah Pennak nih a rauhhlan ah sifah harnak vialte hi a donghter cang lai. Mah Pennak nih vawlei kha paradis ah a ser lai i cuka ah mikip cu dai te le nuam tein zungzal in an nung cang lai. (Salm 37:29) Jehovah dawtnak a langhtermi a dang lamkhat cu atu ah zeitindah a ṭha bikmi lam in nun khawh a si ti a kan cawnpiakmi hi a si. Mah lengah amah sin thlacam awkah a kan sawm i kan thlacamnak ngaihpiak awk zongah timhcia a si zungzal. Jehovah nih pakhat cio kan cungah a dawtnak kha fiang tein a langhter.

6. Jehovah dawtnak kha zeitindah na lehrulh awk a si?

6 Jehovah dawtnak kha zeitindah na lehrulh awk a si? Na caah a tuahmi thil vialte ca i naa lawmhnak kha langhter. Ngaihchiat awk ngai a simi cu tuchan i mi tampi cu lawmh a hngal lomi an si. Jesuh vawleicung a rak um lio zongah cutin a rak si. Jesuh nih thinghmui zawtnak a ngeimi mizaw pahra kha a rak damter ko hna nain pakhat lawng nih a sinah lawmhnak bia a chim. (Luka 17:12-17) Jesuh sinah lawmhnak bia a chimmi pa bantuk si kha kan duh. Cucaah Jehovah sinah lawmhnak bia kha chim zungzal hna u sih.

7. Jehovah kha zeitluk in dah kan dawt awk a si?

 7 Jehovah kan dawtnak kha langhter zong a hau. Jehovah kha nan lungthin dihlak, nan ruahnak dihlak le nan nunnak dihlak in nan dawt lai tiah Jesuh nih a zultu pawl kha a rak cawnpiak hna. (Matthai 22:37 rel.) Mah cu zei sullam dah a si?

8, 9. Jehovah kan dawt kha zeitindah kan langhter khawh?

8 Jehovah kan dawt tiah chim lawngin a za maw? A za lo. Jehovah kha kan lungthin, kan ruahnak le kan nunnak dihlak in kan dawt ahcun kan tuahsernak in kan langhter ko lai. (Matthai 7:16-20) Pathian kan dawt ahcun a nawlbia kan zulh lai tiah Baibal nih fiang tein a kan cawnpiak. Mah cu a har maw? A har lo, Baibal nih Jehovah “nawlbia cu kan caah a har tuk lo” tiah a ti.—1 Johan 5:3 rel.

9 Jehovah nawl kan ngaih tikah kan i nuam lai i lungsi hnangamnak a pemi nunnak kan ngei lai. (Isaiah 48:17, 18) Cu a si ah Jehovah he naih tein um zungzal awkah zeinihdah a kan bawmh lai? Mah kong kha i ruah u sih.

Jehovah Kha Naih Zungzal

10. Jehovah kong kha zeicah kan cawn zungzal awk a si?

10 Jehovah hawikom zeitindah na hung si khawh? Baibal na hlathlai thluahmah tikah Jehovah kong na hngalh deuhdeuh lai i amah he nan i pehtlaihnak zong a fek deuhdeuh ve lai. Mah pehtlaihnak cu alhter zungzal a haumi mei bantuk a si. Mei a alh peng nakhnga thing tihchap a hauh bantukin Jehovah he nan i pehtlaihnak a feh chin nakhnga Jehovah kong cawn zungzal a hau.—Phungthlukbia 2:1-5.

Mei bantukin Jehovah na dawtnak a alh zungzal nakhnga alhtertu thil a herh

11. Baibal cawnpiaknak nih na cungah zeitindah ṭhatnak a chuahter lai?

11 Baibal na hlathlai peng ahcun na lung aan su taktakmi kong hna kha na hun hngalh lai. Jesuh nih a zultu pahnih kha Baibal chimchungbia kong a chimh hna tikah zeitindah an um ti kha i cinken. Hitin an ti: “Lampi i bia a  kan ruah le Cathiang sullam a kan chimh ah khan kan chungah mei kang bang a si lo mei kha?”—Luka 24:32.

12, 13. (a) Jehovah kan dawtnak cu zeitindah a um khawh? (b) Jehovah kan dawtnak kha zeitindah kan nunter peng khawh?

12 Zultu pawl nih Cathiang sullam an hngalhthiam tikah an lung a thawh bantukin nang zong Baibal na hun hngalhthiam tikah na lung a tho tuk ve ko lai. Mah nih Jehovah kong hngalh awk le dawt awkah aan bawmh lai. Jehovah na dawtnak a kih nakhnga lo i zuam.—Matthai 24:12.

13 Pathian hawikom na hung si tikah nan i hawikomhnak kha fehter zungzal awkah fakpi in i zuam. Jehovah le Jesuh kong kha cawng zungzal law na cawnmi kong kha ka nunnak ah zeitindah ka hman khawh ti kha ruat. (Johan 17:3) Baibal na rel asiloah na hlathlai tikah hitin i hal: ‘Mah nih Jehovah Pathian kong zeidah a ka cawnpiak? Jehovah kha ka lungthin dihlak le ka nunnak dihlak in zeicah ka dawt awk a si?’—1 Timote 4:15.

14. Jehovah kan dawtnak fehter zungzal awkah thlacamnak nih zeitindah a kan bawmh khawh?

 14 Hawikom ṭha na ngeih ahcun amah he hmaan tein bia nan i ruah ko lai, mah nih nan i hawikomhnak cu a fehter chin lai. Cu bantukin Jehovah sin hmaan tein thla kan cam ahcun amah kan dawtnak cu a fek chin lai. (1 Thesalon 5:17 rel.) Thlacamnak cu vancung kan Pa sinin kan hmuhmi a sunglawi tukmi laksawng a si. Cucaah lungtak tein thla kan cam zungzal awk a si. (Salm 62:8) Bia pakhat kha kan nolh lengmang awk a si lo, mah canah kan lungthin chungah a ummi bia kha kan chim awk a si. Baibal kha hlathlai zungzal in lungtak tein thla kan cam ahcun Jehovah kan dawtnak cu a fek chin lai.

Midang kha Jehovah kong Chim hna

15, 16. Phungchim rian kha zeitindah na hmuh?

15 Jehovah he naih tein um zungzal kan duh ahcun kan zumhnak kong kha midang sinah kan chim a hau. Jehovah kong midang sin i chim cu a sunglawi tukmi tinvo a si. (Luka 1:74) Mah tinvo kha Jesuh nih a hmaanmi Khrihfa dihlak a kan pek. Cucaah kan dihlak in Pathian Pennak kong thawngṭha kha kan chim awk a si. Nangtah mah rian cu na ṭuan cang maw?—Matthai 24:14; 28:19, 20.

16 Lamkaltu Paul nih phungchim rian kha a sunglawi tukmi thil in a hmuh caah mah rian kha “rothil” tiah a rak ti. (2 Korin 4:7) Jehovah le aa tinhnak kong midang sin chimnak rian cu a biapi bikmi rian a si. Cu bantuk lam in Jehovah rian na ṭuan ahcun Jehovah nih a ca i na tuahmi kha a sunsak lai. (Hebru 6:10) Phungchimnak nih nangmah he, phung na chimhmi he, nan pahnih in ṭhatnak aan pek khawh hna, zeicahtiah mah nih Jehovah he i naih awk le zungzal nunnak hmuh awkah aan bawmh hna caah a si. (1 Korin 15:58 rel.) Mah rian nakin lungsinak a pe deuhmi rian dang a um ti hnga maw?

17. Phungchim rian cu zeicah a biapit tuk?

 17 Phungchim rian cu a biapi tukmi a si. Baibal nih “phung kha chim hna, a caan a rem zongah, a rem lo zongah chim hna” tiah a ti. (2 Timote 4:2) Mah rian cu tuchan ah zeicah a biapit tuk? Baibal nih hitin a ti: “BAWIPA ni, a liannganmi cu a nai cang, khulrang in a ra lio; cu ni tlukin khulrang in a tli khomi an um lo.” Donghnak cu “pel loin a ra hrimhrim ko lai.” (Zefaniah 1:14; Habakkuk 2:3) A rauhhlan ah Jehovah nih Satan vawlei hi a hrawh dih cang lai. Cucaah mah ni a phanh hlanah mi nih Jehovah biak dingin an i thim nakhnga ralrin pek an hau.

18. A hmaanmi Khrihfa hna he hmunkhat ah zeicah Jehovah kan biak awk a si?

18 Jehovah nih a hmaanmi Khrihfa hna he hmunkhat ah ka biaṭi hna seh ti a kan duh. Baibal nih hitin a ti: “Pakhat le pakhat kan i dawt khawh nakhnga le thilṭha kan i tuahpiak khawh nakhnga i bawm tliahmah u sih. Pakhat le pakhat hmunkhat i, i pumh lengmang kha ngol hlah u sih; a cheu nih cun ngol hmanh hna sehlaw, kannih cu i forh chin u sih, zeicahtiah Bawipa ni cu a nai deuh chin lengmang ti kha kan hngalh caah i forh chin lengmang ko u sih.” (Hebru 10:24, 25) Pumhnak dihlak ah a si khawh chungin kan i pumh awk a si. Pumhnak nih pakhat le pakhat tha i pek awk le i forh awkah caanṭha a kan pek.

19. Khrihfa unau pawl dawt awkah zeinihdah a kan bawmh khawh?

19 Naa pumh tikah Jehovah biak dingin aan bawm kho hngami hawikom ṭha pawl na hmuh hna lai. Nangmah bantukin Jehovah biak awkah a si khawh chungin aa zuammi unau tampi kha na hmuh hna lai. Annih zong nangmah bantukin mitlinglo an si i palhnak an tuah tawn. Cutin palhnak an tuah tikah ngaihthiam awkah timhcia tein um. (Kolose 3:13 rel.) Khrihfa unau pawl i an ziaza ṭha kha ruat zungzal, mah nih an cungah dawtnak ngeih awk le Jehovah he i naih chin awkah aan bawmh lai.

 Nunnak Taktak

20, 21. “Nunnak taktak” timi cu zeidah a si?

20 Jehovah nih a hawile vialte kha a ṭha bikmi nunnak ngei hna seh ti a kan duh. Hmailei kan nunning cu tuchan kan nunning he aa dang tuk cang lai tiah Baibal nih a kan cawnpiak.

Jehovah nih “nunnak taktak” hmu seh ti aan duh. Nangtah hmuh na duh maw?

21 Hmailei ah cun kum 70 asiloah 80 lawng si ti loin zungzal in kan nung cang lai. Aa dawh tukmi paradis i “zungzal nunnak” ahcun a tlingmi ngandamnak, daihnak le nuamhnak kan hmu lai. Mah kha Baibal nih “nunnak taktak” tiah a auh. Jehovah nih mah nunnak taktak kha kaan pek hna lai tiah bia a kan kamh. Asinain mah nunnak kha ‘fek tein kan i tlaih’ khawh nakhnga atu ah fakpi in kan i zuam awk a si.—1 Timote 6:12, 19, NW.

22. (a) Zeitindah ‘nunnak taktak a simi nunnak kha fek tein kan i tlaih’ khawh? (b) Zeicah zungzal nunnak hmuh awkah kanmah tein kan tuah khawh lo?

22 Zeitindah ‘nunnak taktak a simi nunnak kha fek tein kan i tlaih’ khawh? ‘Ṭhatnak tuahnak le thilṭha tuahnak i a rummi’ kan si awk a si. (1 Timote 6:18) Mah cu Baibal in kan hngalhmi biatak kha kan zulh a hau tinak a si. Asinain nunnak taktak cu kanmah pumpak zuamnak cungah aa hngatmi a si lo. Zungzal nunnak hmuh awkah kanmah tein zeihmanh kan tuah kho lo. Jehovah nih zumhfekmi a salle a pekmi hna laksawng, Pathian “vel” thawngin hmuhmi a si. (Rom 5:15) Vancung kan Pa nih zumhfekmi a salle kha mah laksawg cu pek a duh hna.

23. Atu ah a hmaanmi thimnak kha zeicah na tuah awk a si?

23 Hitin i hal: ‘Pathian nih a cohlanmi lam in Pathian kha ka bia maw?’ Thlennak cheukhat tuah na herh kha na hngalh ahcun a rannak in na tuah colh awk a si. Jehovah kan i bochan i a nawl zulh awkah kan si khawh chungin kan i zuam ahcun Jehovah cu kan dornak hmun a hung si lai. Satan vawlei donghnak caan chungah Jehovah nih  zumhfekmi a salle kha him tein a chiah hna lai. Cun a biakam ningin Paradis ah zungzal in kan nun khawh nakhnga Jehovah nih a tuah lai. Atu ah a hmaanmi thimnak na tuah ahcun nunnak taktak na hmu kho lai.