A ummi cazin ah kal

A ummi cazin ah kal

 Ṭhen 4

Tangka Hman Ning

Tangka Hman Ning

‘Lungthin i cheuhnak nih khuakhannak kha hlawh a tlinter.’—Phungthlukbia 20:18

Tangka ngeih ahcun chungkhar nih an herhmi kha bawmh khawh a si. (Phungthlukbia 30:8) Mah lengah, “tangka nih a kan huhphenh khawh” tiah Baibal nih a ti. (Phungchimtu 7:12, NW) Nuva hna nih tangka kong chim kha nan i harh ko lai nain chim loin um hlah u. Tangka ruangah chungkhar ah buaibainak chuahter hlah. (Efesa 4:32) Nuva hna nih zeitindah tangka kan hman lai timi kong biakhiahnak an tuah tikah pakhat le pakhat i zumh in an ṭuanṭi awk a si.

 1 ṬHA TEIN TIMHTUAH

BAIBAL CHIMMI: “Nannih lak i pakhatkhat nih inn sak aa timh tikah, ka rian hi a dih tiangin ka phaisa nih a ka zo lai maw zo lai lo ti hngalhnak dingah a ṭhu hmasa i pei zeizat dah a dih lai ti kha a tuak hmasa cu.” (Luka 14:28) Tangka zeitindah hman ding timi kong kha i ruahṭi in timhtuah cu a biapi tuk. (Amos 3:3) Zeidah cawk a herh timi le mah caah tangka zeizatdah ka hman lai ti kha biakhiak. (Phungthlukbia 31:16) Thil pakhatkhat cawk awkah tangka na ngeih hmanhah mah kha cawk ding a si tiah a ti duhnak a si lo. Leiba ngeih lo awkah i zuam. Na ngeihmi zat lawng kha hmang.—Phungthlukbia 21:5; 22:7.

NA TUAH KHAWHMI:

  • Thla dih ah tangka a hleimi nan ngeih rih ahcun mah tangka in zeidah kan tuah lai ti kha biakhiahnak tuahṭi u

  • Hmuhmi nakin hmanmi tangka a tam deuh ahcun nan hmanmi kha zeitindah ṭhumh khawh deuh a si ti kha ṭha tein timhtuah. Tahchunhnak ah, a leng i rawl ei canah nangmah tein rawl naa chuan khawh

 2 DINGFEL LAW A SINING TEIN UM

BAIBAL CHIMMI: ‘Bawipa hmuh lawngah si loin, minung mit hmuh zongah a dingmi thil kha tuah u.’ (2 Korin 8:21) Zeizatdah na hmuh i na hman ti kha na innchung hawi kha a hmaanning tein chim.

Tangka kong ah a biapimi biakhiahnak na tuah hlanah na innchung hawi he i ruahṭi hmasa u. (Phungthlukbia 13:10) Chungkhar ah tangka kong he aa tlaiin nan i ruahṭi ahcun nan chungkhar ah nuamhnak a um lai. Na hmuhmi tangka kha keimah pumpak tangka tiah ruat loin chungkhar tangka tiin ruat.—1 Timote 5:8.

NA TUAH KHAWHMI:

  • I ruahṭi hau loin zeizatdah tangka hman khawh a si ti kha nan pahnih hnatla in rikhiak u

  • Buaibainak a chuah hlanah tangka kong kha i ruah u