A ummi cazin ah kal

A ummi cazin ah kal

 Ṭhen 3

Buaibainak Tonghtham Khawh Ning

Buaibainak Tonghtham Khawh Ning

“Pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh.”—1 Piter 4:8

Nangmah le na innchung hawi nih chungkhar dirh hram nan thawk tikah buaibainak a phunphun nan ton khawh men. Nan ruahnak, nan intuarnak le nan nunning aa dan ruangah buaibainak hna a chuak kho. Chungkhar lenglei in a chuakmi buaibainak hna nan ton khawh bantukin i ruahchan lomi thil hna ruang zongah buaibainak a chuak kho.

Buaibainak hna kha hrial kan duh ko lai nain mah kha tonghtham awkah Baibal nih tha a kan pek. (Matthai 5:23, 24) Baibal lamhruainak hna kha na zulh ahcun buaibainak hna kha a ṭha bikmi lam in na tonghtham khawh lai.

 1BUAIBAINAK KONG KHA I RUAH U

BAIBAL CHIMMI: “Chim caan a um.” (Phungchimtu 3:1, 7) Buaibainak kong kha i ruah awkah a caan pe u. Buaibainak kong he aa tlaiin na intuarnak le na hmuhnak kha a sining tein chim. Na innchung hawi kha a zungzal in “biatak chim.” (Efesa 4:25) Na thin a hun hmanhah i sik lo awkah biakhiak. Buaibainak kong kha dai tein nan i ruah ahcun i sik loin ṭha tein bia nan i ruah kho lai.—Phungthlukbia 15:4; 26:20.

Na hna a tlak lo hmanhah ṭha tein ngaihpiak. Dawtnak le hmaizahnak langhter kha zeitikhmanh ah philhhlah. (Kolose 4:6) Buaibainak kha tonghtham colh i zuam law pakhat le pakhat i chawnhbiak loin um hlah u.—Efesa 4:26.

NA TUAH KHAWHMI:

  • Buaibainak kong i ruah awkah aa tlakmi caan kha thim u

  • Nangmah ngaih caan a si ahcun a bia tan hlah. Nangmah chim caan a phanh lawngah chim

 2 NGAI LAW HNGALHTHIAMPIAK

BAIBAL CHIMMI: ‘Pakhat le pakhat i daw cikcek u law pakhat le pakhat kha i hmaizah u.’ (Rom 12:10) Zeitindah na ngaih timi cu a biapi tukmi a si. ‘Zawnruahnak le toidornak’ he na innchung hawi i a hmuhnak kha hngalhthiam khawh i zuam. (1 Piter 3:8; Jeim 1:19) A ngai bantukin i umter hlah. A si khawh ahcun na ṭuan liomi rian hna hmanh kha chiata law na innchung hawi nih a chimmi bia kha ṭha tein ngaihpiak. Asiloah a hnuah i ruah khawh a si le si lo kha hal. Na innchung hawi kha zuamcawhtu in hmuh canah bawmtu in na hmuh ahcun ‘na thin naa sum kho lai.’—Phungchimtu 7:9.

NA TUAH KHAWHMI:

  • Na innchung hawi nih a chimmi kha na hna a tlak lo hmanhah ṭha tein ngaihpiak

  • A chimmi biafang pawl kha si loin a chim duhmi kha hngalh khawh i zuam. A umtu dan le a aw chuah dan kha theithiam

3 NAN BIAKHIAHNAK NINGIN TUAH

BAIBAL CHIMMI: “Rianṭuan harnak nih hin ṭhathnemnak a chuahpi, kaa chim men lawng nih cun sifahnak lawng a chuahpi ko.” (Phungthlukbia 14:23) Buaibainak tonghtham ning kha pahnih hnatlaknak sawhsawh lawngin a za lo. Nan biakhiahnak ningin tuah zong a biapi. Cutin tuah awkah i zuam a hau ko nain tuah man cu a phumi a si. (Phungthlukbia 10:4) Nan pahnih ningin rian fakpi in nan ṭuanṭi ahcun ‘tam deuh in nan hmuh lai.’—Phungchimtu 4:9.

NA TUAH KHAWHMI:

  • Buaibainak tonghtham khawh awkah pakhat cio nih tuah hngami zulhawktlak a simi biakhiahnak kha tuah u

  • Nan biakhiahnak ningin nan tuah tikah hlawhtlinnak a um le um lo kha atu le atu zoh ṭhan u