A ummi cazin ah kal

Jehovah Tehte Hna Cu A Dang Biaknak He An Zumhnak Aa Cawhkalh Maw?

Jehovah Tehte Hna Cu A Dang Biaknak He An Zumhnak Aa Cawhkalh Maw?

Jehovah Tehte Hna nih biaknak dang pawl he zumhnak kong i ruah cu kan duh ko nain an zumhnak he cun kan i cawhkalh lo. Baibal nih a hmaanmi Khrihfa hna cu ‘rem tein hmunkhat ah an i pehtonh’ tiah a ti. Cutin rem tein le lungrual tein an um khawhnak cu an zumhnak aa khah ruangah a si. (Efesa 4:16, BAIBAL CATHIANG; 1 Korin 1:10; Filipi 2:2) Dawtnak, zaangfahnak le ngaihthiamnak ti bantuk a ṭhami ziaza hna kan ngeih lawng si loin kan zumhnak cu a hmaanmi hngalhnak a simi Baibal cungah aa hngat. Cu bantukin a si lo ahcun kan zumhnak cu pakpalawng a si ko lai.​—Rom 10:2, 3.

Zumhnak aa khat lomi hna he Pathian biaknak le ‘aa ruang lomi hawngkual’ phorhnak kha Baibal nih a tahchunh. Biaknak cawhkalhnak nih Khrihfa pakhat i a zumhnak kha a hrawh khawh. (2 Korin 6:14-17, BAIBAL CATHIANG) Cucaah Jesuh nih a zultu pawl kha midang he zumhnak i cawhkalh awkah a rak awnh hna lo. (Matthai 12:30; Johan 14:6) Pathian nih Moses sinin a pekmi hna nawlbia zongah Israel mi kha an pawngkam miphun hna he biaknak i cawhkalh awkah a awnh hna lo. (Exodus 34:11-14) Cucaah zumhnak aa khat lomi cheukhat nih biakinn saknak ah kan in bawmh hna lai an ti tikah zumhfekmi Israel mi hna nih an rak al.​—Ezra 4:1-3.

Jehovah Tehte Hna Nih A Dang Biaknak Hna He Biaknak Kong An I Ruah Maw?

An i ruah. 2019 chungah a dang biaknak a zummi hna he suimilam 2,088,560,437 hmangin biaknak kong an i ruahṭi. Kannih zong lamkaltu Paul bantukin “mi tam deuh” an ruahnak le an pommi kong kha hngalh kan duh. (1 Korin 9:19-22) Baibal nih a chim bantukin midang he bia kan i ruah tikah “hmaizahnak” langhter awkah kan i zuam.​—1 Peter 3:16.