A ummi cazin ah kal

Jehovah Tehte Hna Rian Caah Zeitindah Tangka Nan Hmuh?

Jehovah Tehte Hna Rian Caah Zeitindah Tangka Nan Hmuh?

Vawleicung pumpi kan rian cu a bik in Jehovah Tehte pakhat cio nih lungtho tein an pekmi thawhlawm in ṭuan a si. * Biakinn ah thawhlawm kuang hna chiah a si i a dang lam zongin thawhlawm pek khawh ning kha Thawhlawm timi cahmai ah langhter a si. Vawleicung pumpi rianṭuannak caah, mahle hmun caah asiloah a pahnih caah thawhlawm pek dingin i thim khawh a si.

Jehovah Tehte Hna cu cheuhra cheukhat, cuset khaset tiin rikhiahmi asiloah lahkhah chungin zatuak zeizat dah pek ding ti bantukin hal kan si lo. (2 Korin 9:7) Kan i pumhnak ah thawhlawm kholh a um lo i tipil innak, ruakvuinak, ṭhitumnak asiloah a dang biaknaklei tuahsernak hna caah tangka a halmi cawnpiaktu zong an um lo. Tangka hmuhnak caah changreu zuarnak, bazaar ah thil zuarnak, zaang lentecelhnak, laamnak puai [carnival], rawl eiṭinak puai le awngbali zuhnak puai hna kha tuah in thawhlawm kawlnak le kholhnak ti bantuk zong kan tuah lo. Thawhlawm petu kong thanhnak, mi zapi hmaiah phuannak ti bantuk zong kan tuah lo. (Matthai 6:2-4) Thawhlawm hmuh awkah kan website le kan cauk hna ah thawngthanhnak ti bantuk zong kan tuah lo.

Jehovah Tehte Hna i Khrihfabu kip ah thla fatin tangka cazin kong kha pumhnak ah thanh a si. Thawhlawm pekmi kha aa tlak ning tein hman a si nakhnga Khrihfabu tangka cazin kha hmaan tein check lengmang a si.—2 Korin 8:20, 21.

Thawhlawm Pek Khawh Ning

  • Thawhlawm kuang: Biakinn, Civui Tuahnak Inn le a dang pumhnak kan tuahnak hmun hna ah chiahmi thawhlawm kuang ah tangka in asiloah check catlap in pek khawh a si.

  • Online in thawhlawm peknak: Ram tampi ah “Jehovah Tehte Hna sinah Thawhlawm Pe” timi cahmai kha hmangin credit card, debit card, bank transfer le a dang electronic thilri in thawhlawm pek khawh a si. * Jehovah Tehte cheukhat nih mah lam hna lak i pakhat kha hmangin hmaan tein thawhlawm pek khawh awkah thla fatin “a dang tein chiah” awkah bia an khiah.—1 Korin 16:2, NW.

  • I timhchung in thawhlawm peknak: Thawhlawm pek khawhnak lam cheukhat cu a hlankan in i timtuah/ asiloah upadi ruahnak cheuhnak hna a hau. Cutin i timhtuahnak nih nan ram i ngunkhuai he aa tlaiin ṭhatnak aan hmuhter khawh. Mi tampi nih an nun chungah an tuah khawhmi asiloah an thih hnu zongah man a ngei hngami thawhlawm peknak kong kha an hun hngalh chin caah ṭhatnak an hmu. A tanglei lam hna in thawhlawm pek na duh ahcun a konglam tam deuh hngalh awkah mahle hmunhma i zung ṭengnge ah pehtlaihnak tuah:

    • bank cazin

    • aamahkhan le pension hmuhnak nawl

    • Innlo thilri

    • a karh hmuhnak caah khonmi le tangka i cawihnak ca biahren

    • rovuihnak ca le thil apnak ca

Na hmunhma ah thawhlawm pek khawhnak lam kong kha tam deuh in hngalh na duh ahcun “Jehovah Tehte Hna sinah Thawhlawm Pe” timi ah zoh.

^ cat. 2 Jehovah Tehte a si lomi, mi cheukhat zong nih kan rianṭuannak bawmh awkah thawhlawm an pek.

^ cat. 7 Tam deuh in hngalh awkah Internet In Thawhlawm Peknak caah Lamhruainak timi video kha zoh.