A ummi cazin ah kal

Vawleicung Pumpi ah Jehovah Tehte Zeizat Dah An Um?

Vawleicung Pumpi ah Jehovah Tehte Zeizat Dah An Um?

2019 Rianṭuannak Kum Report

Vawleicung pumpi ah a ummi Jehovah Tehte milu

8,683,117

Khrihfabu

119,712

Jehovah Tehte Hna nih phung an chimnak ram

240

Bu chungmi hna kha zei cungah i hngat in dah rel an si?

Pathian Pennak kong thawngṭha kha thla fatinte lungtho thatho tein a chimmi hna lawng kha Jehovah Tehte in an rel hna. (Matthai 24:14) Mah hna lakah tipil a ing cangmi le tipil a ing rih lo nain phungchim rianṭuannak ah i tel ve dingin sining a tlinhmi hna zong an i tel.

Bu chungmi pakhat si awkah tangka thawh a hau maw?

A hau lo. Mi pakhat Jehovah Tehte a simi, bupi ah rian a ngeihmi asiloah reng pakhatkhat a hmuhmi cu tangka thawhnak he aa pehtlai lo. (Lamkaltu 8:​18-​20) A taktak ti ah cun thawhlawm tam deuh cu ahonihdah a pek ti hngalh a si lo. Jehovah Tehte pakhat cio nih vawleicung pumpi phungchim rianṭuannak caah an caan, an thazaang le an thilri hna kha mahle siantawk in le an sining nih a pek hnanak tiangin an pek.​—2 Korin 9:7.

Jehovah Tehte zeizat nih dah lungtho thatho tein phung an chim ti na hngal maw?

Jehovah Tehte Hna nih thla fatinte phungchim rianṭuannak report kha anmahle an Khrihfabu sinah an pek. Mah report cu anmah lungtho tein an pekmi a si.

Khrihfabu report kha cazin an tuah dih hnuah a dihlak fonh kha an ram i zung ṭengnge ah an kuat. Zung ṭengnge nih ram chung dihlak i roport a dihlak fonh kha zungpi ah an kuat.

Rianṭuannak kum a dih tikah mah kum chung i ram khat cio i a tam bik Jehovah Tehte milu kha biakhiahnak an tuah. Mah an relmi kha an fonh tikah vawleicung pumpi ah a ummi Jehovah Tehte milu kha hngalh khawh a si. Ram khat cio i a kong a dikthliar kha kan website i “Vawleicung Pumpi” timi ṭhen ah langhter a si. Mah bantuk report hna cu hmasa Khrihfa hna caah thazaang petu a si bantukin tuchan zongah thazaang petu a si ve.​—Lamkaltu 2:​41; 4:4; 15:3.

Phungchim rianṭuannak ah aa tel lomi hna kha bu chungmi in an rel hna maw?

Jehovah Tehte milu relnak ah an i tel lo. Asinain Khrihfabu nih lungtho thatho tein an don hna. An lakah tam deuh cu Jesuh a Thih Philhlonak Puai ah an i pum. Cucaah zeizat dah an si ti kha hngalh khawh awkah Philhlonak Puai ah aa pummi milu le Jehovah Tehte milu kha tahchunh khawh a si. 2019 kum ah Philhlonak Puai ah aa pummi cu 20,919,041 an si.

Jehovah Tehte Hna i Khrihfabu pumhnak hna ah aa pum lomi hna cu man loin Baibal cawnnak program in ṭhathnemhnak an hmu. 2019 kum chungah thla fatinte Baibal cawnpiaknak 9,618,182 an tuah.

A cozah nih an chimmi Jehovah Tehte milu cu an chimmi milu nakin zeicah a tam deuh?

A cozah nih mi pawl kha zei biaknak dah nan si tiah an hal hna hnuah milu kha biakhiahnak an tuah tawn. Tahchunhnak ah, US Milu Relnak Department nih cazin an lak tikah “form a phihtu nih amahle amah zei biaknak in dah aa ruah timi cungah i hngat in bia an khiah.” Cucaah milu an relmi cu a si taktakmi si loin pumpak ruahnak cungah aa hngatmi a si. Asinain Jehovah Tehte Hna nih cun phungchim rianṭuannak ah aa tel i report a pemi hna lawng kha an rel hna. Jehovah Tehte ka si tiah aa timi paoh in an rel hna lo.

Rianṭuannak kum timi cu September 1 in a hmai kum August 31 tiang a si. Tahchunhnak ah, 2015 rianṭuannak kum cu 2014, September 1 in 2015, August 31 tiang a si.

Rianṭuannak kum timi cu September 1 in a hmai kum August 31 tiang a si. Tahchunhnak ah, 2015 rianṭuannak kum cu 2014, September 1 in 2015, August 31 tiang a si.