A ummi cazin ah kal

Jehovah Tehte Hna Nih Fimcawnnak Kha Zeitindah An Hmuh?

Jehovah Tehte Hna Nih Fimcawnnak Kha Zeitindah An Hmuh?

Fimcawnnak he aa tlaiin kan hmuh ning cu Baibal phunglam cungah hram aa bunhmi a si. Jehovah Tehte pakhat cio nih a tanglei thil sining hna ah Baibal in cawnpiakmi an chiaṭha thleidannak lungthin kha an hman i Pathian phunglam kha an zulh. *

  • Fimcawnnak cu a biapi tukmi a si

  • Fimcawnnak he aa tlaiin a tlarimi hmuhnak ngeih a hau

  • A sangmi fimcawnnak nih kan ziaza le Pathian he kan i pehtlaihnak a hrawh khawh

  • Jehovah Tehte Hna nih Sunday school an ngei maw?

Fimcawnnak cu a biapi tukmi a si

Baibal ah a langhtermi “fimnak ṭha le ruahthiamnak” ṭha ngeih awkah fimcawnnak nih mi pakhat kha a bawmh khawh. (Phungthlukbia 2:​10, 11; 3:​21, 22) Jesuh nih a zultu pawl kha a fialmi hna rian ah cawnpiaktu si dingin a forh hna. (Matthai 28:19, 20) Cucaah relnak, ṭialnak, chawnhbiaknak * ti bantuk ah fimthiamnak a za in an ngeih nakhnga buchungmi kha tha kan pek hna i kan bawmh hna. Cun a dang biaknak le nunphung hna zong hngalh dingin tha kan pek hna.​—1 Korin 9:​20-​22; 1 Timote 4:​13.

Cozah zong nih fimcawnnak man a ngeih ning kha a hngalh, cucaah mino pawl kha sianghramruun le sianglairuun kai dingin nawl a chuah tawn. Cozah asiloah “ram uktu bawi kha an nawl va ngai hna u” timi nawlbia kha kan zulh, cucaah cozah nawl chuahmi kha zulh kan duh. (Rom 13:1) Mah lengah kan fale kha sianginn kai sawhsawh men lawng si loin an si khawh chung i zuam awkah kan forh hna. * Baibal ah hitin a ti: “Zei thil nan tuah paoh ah, minung caah si loin Bawipa caah ka ṭuan ti lungput ngei in, nan lungthin dihlak in ṭuan u.”​—Kolose 3:​23.

Fimcawnnak nih chungkhar zohkhenh khawh awkah a kan bawmh. Baibal ah “mi pakhatkhat nih a rualchan kha a zohkhenh hna lo ahcun, cun cu nakhmanh in biapi deuh a simi cu, a innchungkhar kha a zohkhenh hna lo ahcun, amah cu zumhnak a hlawmi, Pathian a zum lomi nakhmanh in a ṭha lo deuhmi a si” tiah a ti. (1 Timote 5:8) Vawlei fimcawnnak nih chungkhar zohkhenhnak ti bantuk a thiangmi rian kha ṭuan khawh dingin a kan bawmh khawh. Cauk pakhat (The World Book Encyclopedia) nih fimcawnnak i aa tinhnak taktak cu “chawlehnak ah rianṭuantu pakhat in . . . minung bu ṭhatnak a pe khotu si awkah a si” tiah a ti. Fimthiamnak a ngei lomi nakin fimthiamnak a ngeimi nih a chungkhar kha ṭha deuh in a zohkhenh khawh.​—Phungthlukbia 22:29.

Nulepa nih an fale kha an nunnak ah hlawhtlinnak hmuh dingin an bawmh hna, cutin si awkah fale sianginn kai cu a biapi tukmi a si. (2 Korin 12:14) Sianginn kai a harnak hmun asiloah an nunphung nih a awnh lomi a si hmanhah an fale kha sianginn kaiter dingin nulepa kha tha kan pek hna. * Nulepa hna kha fale fimcawnnak he aa tlaiin aa tlakmi ruahnak cheuhnak zong kan pek hna. *

Fimcawnnak he aa tlaiin a tlarimi hmuhnak ngeih a hau

Vawlei fimcawnnak kha ralring tein kan i thim. Baibal nih “mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭha tein a zoh” tiah a ti. (Phungthlukbia 14:15) Sianghleiruun pehnak in hmuhmi ṭhatnak le a dihmi he aa tlaiin thimnak kan tuah tikah mah Baibal phunglam kha kan zulh. Tahchunhnak ah, pawcawmnak ca tinṭan kainak nih nunnak caah ṭhatnak tampi a chuahter khawh.

Thlaraulei fimcawnnak cu vawlei lei fimcawnnak nakin tampi man a ngei deuh. Vawlei fimcawnnak he i lo loin Baibal cungah hram aa bunhmi fimnak nih nunnak a khamh khomi Pathian hngalhnak a pek khawh. (Johan 17:3) “Dinnak le biading . . . miṭha mi hna lam” ti bantuk ziazalei phunglam hna man a ngeih ning zong kha mah nih a cawnpiak hna. (Phungthlukbia 2:9) Lamkaltu Paul nih tuchan sianghleiruun fimthiamnak bantuk kha a rak ngei, asinain ‘a sunglawi deuhmi Bawipa Jesuh hngalhnak’ tu kha a sunsak deuh. (Filipi 3:8; Lamkaltu 22:3) Cu bantukin tuchan zongah Jehovah Tehte tampi nih vawlei lei fimthiamnak an ngei ko nain thlaraulei fimthiamnak kha a sunglawi deuh in an hmuh. *

Thlaraulei fimcawnnak nih ziaza ṭha ngeih awkah a cawnpiak hna

A sangmi fimcawnnak nih kan ziaza le Pathian he kan i pehtlaihnak a hrawh khawh

“Mifim nih cun harnak a rat kha a hmuh tikah hrial khawhnak aa zuam” tiah Baibal nih a ti. (Phungthlukbia 22:3) Jehovah Tehte Hna nih sianghleiruun kainak asiloah a sangmi fimcawnnak cheukhat nih kan ziaza le Pathian he kan i pehtlaihnak a hrawh khawh tiah kan ruah. Cucaah Jehovah Tehte Hna nih cu bantuk pawngkam ah um kan duh lo i kan fale zong umter kan duh hna lo. Cu bantuk a sangmi fimcawnnak hna nih a tanglei ah langhtermi, a palhmi ruahnak a ngeihter khawh hna tiah kan ruah:

  • A palhmi ruahnak: Tangka nih nuamhnak le himnak a chuahter

    A sangmi fimcawnnak thawngin tangka tampi kan hmu kho lai tiah an ruah caah mi tampi cu sianghleiruun an kai. Tangka nih nuamhnak le himnak a kan pek lai tiah mi cheukhat nih an ruah, asinain cu bantuk ruahnak cu pakpalawng a si tiah Baibal nih a ti. (Phungchimtu 5:​10) Cun Baibal nih “tangka duhnak hi ṭhatlonak phun kip chuahnak hram a si” i kan zumhnak hmanh a hrawh khawh tiah a kan cawnpiak. (1 Timote 6:​10) Jehovah Tehte Hna nih “chaw le va duhnak” rap ah kan tlak nakhnga lo fakpi in kan i zuam.​—Matthai 13:22.

  • A palhmi ruahnak: Mi pakhat nih minṭhatnak a hmuh nakhnga a sangmi fimcawnnak a kai awk a si

    Tahchunhnak ah, Georgia ram i vuanzi ngan bik a rak ṭuanmi Nika Gilauri nih a ram chung i a laar ngaimi ruahnak he aa tlaiin hitin a ṭial: “Georgia ah sianghleiruun degree cu a biapi tukmi rammi hmelchunhnak a si. . . . [Hlanah] degree a la lomi mino pawl cu chungkhar min a chiattertu in hmuh an si.” * Mah he i ralkah in Baibal nih cu bantuk vawlei lei minṭhatnak kawl lo awkah ralrin a kan pek. Jesuh nih a chan lio i minṭhatnak a kawlmi biaknaklei hruaitu pawl kha hitin a ti hna: “Nannih cu pakhat nih pakhat sinin thangṭhatnak hmuh nan duh, . . . cucaah cun zeitindah zumhnak cu nan ngeih khawh bal hnga?” (Johan 5:​44) Sianghleiruun kainak nih mi pakhat kha Pathian huatmi porhlawtnak lungput a ngeihter khawh.​—Phungthlukbia 6:​16, 17; 1 Peter 5:5.

  • A palhmi ruahnak: A hmaan le a hmaanlo he aa tlaiin pakhat cio nih mah tein biakhiahnak tuah awk a si

    Jehovah Tehte Hna nih a hmaan le a hmaanlo he aa tlaiin Pathian phunglam kha an cohlan. (Isaiah 5:​20) Asinain capar pakhat (Journal of Alcohol and Drug Education) nih hitin a ti: Sianghleiruun a kaimi hna cu ṭhirual hneknak nih “a hmaan le a hmaanlo kongkau ah an hngalhmi he i ralkah in biakhiahnak a tuahter hna.” * Mah kong he aa tlaiin Baibal zong nih hitin a ti: “Hawi ṭhalo nih ziaza ṭha a hrawh.” (1 Korin 15:33) Sianghleiruun ah zuuritnak, ritnak sii hmannak le i ṭhitum hlanah nupa sualnak tuahnak ti bantuk thil hna kha a phung men ah an ruah, cu bantuk Pathian fihmi thil hna tuah ve awk hmanhah midang kha an forh hna.​—1 Korin 6:​9, 10; 2 Korin 7:1.

  • A palhmi ruahnak: A sangmi fimcawnnak nih vawlei a ṭhanchoter khawh

    Mi tampi nih rumnak, upatnak asiloah a ding loin i nuamh awkah a sangmi fimcawnnak kha an kawlmi a si lo, mah canah anmah le vawlei a ṭhancho nakhnga caah a si. Mah cu a ṭha tukmi tinhnak a si, asinain Jehovah Tehte Hna nih cun a dang lam kha kan i thim. A ṭhami vawlei a chuahter khomi Pathian Pennak lawng kha Jesuh bantukin kan i ruahchan. (Matthai 6:​9, 10) Asinain Pathian Pennak nih vawleicung buaibainak vialte a tawnghtham dih lai ti men lawngin kan hngak sawhsawh lo. Mah canah Jesuh bantukin “Pennak kong thawngṭha” kha vawleicung pumpi ah kan chim, cun kumfatin mi tampi nih a ṭha deuhmi nunnak an hmuh nakhnga kan bawmh hna. *​—Matthai 24:14.

^ cat. 2 Fimcawnnak he aa tlaiin Pathian nawlbia he aa ralkah lo chung paoh cu Jehovah Tehte mino hna nih an nulepa duhnak kha an zulh.​—Kolose 3:​20.

^ cat. 8 Cucaah bawmtu a simi Relnak le Ṭialnak ah Teimak Tein I Zuam ti bantuk cauk kha nuai 11 lengin chuah a si. Cun vawleicung pumpi ah holh phun 120 in relnak le ṭialnak cawnnak kha man loin kan tuah. 2003 in 2017 kar ah mi 70,000 leng kha carel le caṭial thiam awkah kan bawmh hna.

^ cat. 9Sianginn Ka Chuah Ah A Ṭha Lai Maw?” timi capar kha zoh.

^ cat. 11 Tahchunhnak ah, nulepa hna kha an fapa le an fanu hna sianginn kaiter awkah tha kan pek hna. 2003, March 15, Vennak Innsang chung i “Ka Fa Hi Sianginn Ka Kaiter Awk A Si Maw?” timi capar kha zoh.

^ cat. 14 jw.org chung i “Nunnak Hrampi An Hmuh Ning” timi kha zoh.

^ cat. 20 Practical Economics: Economic Transformation and Government Reform in Georgia 2004​—2012, page 170.

^ cat. 22 Volume 61, No. 1, April 2017, page 72.

^ cat. 24 Pathian Bia le Pennak kong thawngṭha a ṭhawnnak kong he aa tlaiin jw.org chung i “Baibal Nih An Nunning A Thlen” timi kha zoh.