A ummi cazin ah kal

Jehovah Tehte Hna nih An Fale kha An Zumhnak Cohlan awkah An Hnek Hna Maw?

Jehovah Tehte Hna nih An Fale kha An Zumhnak Cohlan awkah An Hnek Hna Maw?

An hnek hna lo, zeicahtiah Pathian biaknak cu pumpak tuahmi biakhiahnak a si. (Rom 14:12) Jehovah Tehte Hna nih an fale kha Baibal phunglam pawl an cawnpiak hna. Asinain an upat tikah pakhat cio nih Jehovah Tehte kan si lai maw, si lai lo ti cu anmah tein biakhiahnak an tuah a hau.—Rom 12:2; Galati 6:5.

Nulepa tampi bantukin Jehovah Tehte Hna nih an fale kha a ṭha bikmi nunnak ngeihter an duh hna. Cucaah hman awk a tlakmi thiamnak, ziazalei phunglam le biaknaklei zumhnak ti bantuk an fale ṭhatnak a pe hngami kong kha an cawnpiak hna. Baibal nih a ṭha bikmi nunnak a kan ngeihter tiah Jehovah Tehte Hna nih an zumh. Cucaah an fale he Baibal an hlathlaiṭinak thawngin le an i pumhṭinak thawngin an fale kha Baibal sunsak awkah an bawmh hna. (Deuteronomi 6:6, 7) Fale nih an upat tikah nulepa zumhnak kan cohlang lai maw, cohlang lai lo ti kha biakhiahnak an tuah khawh.

 Jehovah Tehte Hna nih bawhte kha tipil an pe hna maw?

An pe hna lo. Baibal nih bawhte tipil peknak kha a cohlang lo. Tahchunhnak ah, kumzabu pakhatnak i Khrihfa hna cu tipil an in hlanah biatak kha an theih, “an zumh” i ngaihchihnak an langhter. (Lamkaltu 2:14, 22, 38, 41) Cucaah tipil in khawh ding ahcun Baibal cawnpiaknak hngalhthiam awk, zumh awk le mah ningin nun awkah kumkhua a upa pahmi an si a hau. Mah hna kha bawhte nih cun an tuah kho lo.

Fale nih an upat tikah tipil in dingin an i thim men ko lai. Asinain cutin tuah khawh awkah an tuahmi biakamnak kha an hngalhthiam a hau.

 Jehovah Tehte Hna nih tipil in a duh lomi an fale kha an hlaw hna maw?

An hlaw hna lo. An fale nih an zumhnak an cohlan lo tikah nulepa cu an ngaih a chia ko nain an fale kha an dawt ṭhiamṭhiam hna i Jehovah Tehte si an duh lo ca men ah an i pehtlaihnak kha an chat lo.

Zei bantuk kumkhua kan si hmanhah pakhat cio nih tipil kan ing lai maw, ing lai lo ti kha mah tein biakhiahnak tuah awk a si

 Jehovah Tehte Hna nih an fale kha phungchimnak ah zeicah an i kalpi hna?

Phungchimnak ah kan fale kan i kalpi hnanak a ruang tampi a um. *

  • Baibal nih nulepa kha thlaraulei in an fale cawnpiak awk le Pathian biak dingin cawnpiak awkah a fial hna. (Efesa 6:4) Biaknak timi ah zumhnak kong mipi sin thanhnak aa tel caah phungchimnak cu fale thlaraulei cawnpiaknak ah a biapi tukmi pakhat a si.—Rom 10:9, 10; Hebru 13:15.

  • Baibal nih mino pawl kha “BAWIPA min cu thangṭhat” awkah a forh hna. (Salm 148:12, 13) Pathian thangṭhat khawhnak ah a biapi tukmi lam pakhat cu midang sinah a kong chim kha a si. *

  • Fale nih nulepa he phungchim kalṭinak in ṭhatnak an hmu. Tahchunhnak ah, zei bantuk mi paoh he i chawnbiak ning kha an cawn i dawtnak, zaangfahnak, upatnak le mi zawnruahnak ti bantuk a ṭha tukmi sining hna zong an cawn. Cun Baibal ah hram aa bunhmi an zumhnak kong zong hngalhthiam chin awkah a bawmh hna.

 Jehovah Tehte Hna cu biaknaklei puai asiloah a dang puai hna ah an i tel maw?

Jehovah Tehte Hna cu Pathian nih a cohlan lomi biaknaklei puai asiloah a dang puai hna ah kan i tel lo. * (2 Korin 6:14-17; Efesa 5:10) Tahchunhnak ah, Khrihfa a si lomi hna sinin aa thawkmi chuah ni puai asiloah Christmas puai hna ah kan i tel lo.

Asinain chungkhar he caan hmanṭi le kan fale siang ngaiin laksawng pek kha kan duh. Ni hleikhun ni lawngah caan hmanṭi le laksawng i pek si loin kumkhat chung vialte caan kan hmangṭi i laksawng kan i pe.

Khrihfa nulepa hna nih an fale laksawng pek kha an duh

^ cat. 15 Jehovah Tehte fale cu nulepa asiloah a dang upa pawl tel loin phungchimnak ah an kal lo.

^ cat. 17 Baibal nih an zumhnak kong midang sinah an chimnak thawngin Pathian lung a lawmhtermi ngakchia tampi kong a langhter.—2 Siangpahrang 5:1-3; Matthai 21:15, 16; Luka 2:42, 46, 47.

^ cat. 23 An min cheukhat thlen a si.