A ummi cazin ah kal

Jehovah Tehte Hna I Ṭhitum Puai Cu Zei Bantuk Phun Dah A Si?

Jehovah Tehte Hna I Ṭhitum Puai Cu Zei Bantuk Phun Dah A Si?

Jehovah Tehte Hna nih ṭhitum puai kha a sawhsawh tein le zoh dawh tein an tuah i Baibal ah hrambunhmi phungchimnak tawite pakhat zong a um. Cun rawl dumṭinak program zong a um. * Jesuh zong a phungchim rian a thawklei ah Kana khua ah ṭhitumnak puai a rak zawh ve.—Johan 2:1-11.

 Ṭhitum puai zeitindah an tuah?

Ṭhitumnak puai ah a biapi bikmi pakhat cu minit 30 hrawng a raumi ṭhitum phungchimnak a si i Jehovah Tehte Hna i phungchimtu pakhat nih a chim. A hleiin aa um dingmi nuva hna nih an i dawt peng nakhnga le an chungkhar a nuamh nakhnga Baibal nih a bawmh khawh hna ning kong kha a chim.—Efesa 5:33.

Ram tampi ah cozah nih Jehovah Tehte Hna i rianngeitu hna kha upadi ningin ṭhitumnak tuahpiak khawhnak nawl an pek hna. Phungchimnak a donghnak lei ah aa ṭhiummi hna nih biakamnak an tuah i kutdong hrolh an i thleng. Mah hnuah rianngeitu nih phung ningin nuva an si cang tiah a thanh.

Ram cheukhat ahcun cozah zung ah i ṭhitum dingin upadi nih a hal hna. Cucaah ṭhitum phungchimnak pek hlante ah zung ah min sen an thut. Zung ah biakamnak an tuah rih lo ahcun phungchimnak a dih leiah an tuah. Biakamnak an tuah cang a si ahcun bia an i kam cang ti a langhtermi biafang hna in tuah ṭhan khawh a si. Phungchimnak a donghnak ah aa ṭhiumkami nuva hna kha thluachuah pek dingin Pathian sinah thla an campiak hna.

 Jehovah Tehte Hna nih puai kha khoika ah dah an tuah?

Jehovah Tehte tam deuh nih cun ṭhitum puai kha Biakinn ah an tuah. * Rawl danghnak program a um ahcun mah caah hmundang kha an timhtuah.

 Ahote nih dah zawh khawh a si?

Ṭhitum puai cu Biakinn i tuah a si tikah Jehovah Tehte a simi zong, a si lomi zong ahopaoh nih zawh khawh a si. Rawl dumṭinak a um ahcun ahote dah kan sawm hna lai ti kha nuva hna nih bia an khiah khawh.

 Thil hruk ding rikhiahpiak a si maw?

Biakinn ah tuahmi puai zawhnak caah thil hruk ding rikhiahmi a um lo nain Jehovah Tehte Hna nih Baibal phunglam ningin zoh dawh tein le upat awk tlak tein thil an i hruk. Midang zong cutin i hruk ve hna seh ti an duh. (1 Timote 2:9) Aa ṭhiummi hna nih an thimpiakmi hna a um lo ahcun rawl dumnak zongah cutin an i hruk.

 Laksawng pek a um maw?

Baibal nih siannak langhter dingin a kan forh. (Salm 37:21) Cucaah Jehovah Tehte Hna cu laksawng an i pe i pekmi zong an cohlan. (Luka 6:38) Asinain laksawng hal asiloah a petu min thanh ti bantuk kha an tuah lo. (Matthai 6:3, 4; 2 Korin 9:7; 1 Peter 3:8) Cu bantuk phunglam hna cu Baibal he aa tlak lomi a si i puai a zawhtu hna zong siarem loin a umter hna caah a si.

 Zuhrai thliar in thlacamnak a um maw?

A um lo. Mah phunglam cu a hmaan lomi biaknak in a hram aa thawkmi a si caah Jehovah Tehte Hna nih an tuah lo. * Aa ṭhiummi nuva hna nih a nuammi chungkhar ngei hna seh ti an duh kha lam dang in an langhter. Asinain zuhrai thliar in thlacamnak cu an tuah lo.

 Facang, pangpar asiloah caku vorh a um maw?

A um lo. Ram cheukhat ahcun aa ṭhiummi hna lu cungah facang, pangpar le caku ti bantuk an vorh tawn hna. Mah nih vanṭhatnak, nuamhnak le nun saunak a hmuhter hna tiah an zumh. Mah cu zumhnak hrut he aa pehtlaimi a si caah Jehovah Tehte Hna nih an tuah lo. Vanṭhat dingin thlacampiak ti bantuk zong an tuah lo. Mah cu Baibal phunglam he aa tlak lomi an si.—Isaiah 65:11.

 Rawl dumṭinak a um maw?

Biakinn ah tuahmi ṭhitumnak puai ahcun rawl danghnak a um lo. Asinain rawl danghnak le ṭam dawn in supsap einak tu cu hmundang ah an timhtuah. (Phungchimtu 9:7) Cun zu an timhtuah a si ahcun a za tawk in le a kum a tling cangmi ca lawngah an timhtuah.—Luka 21:34; Rom 13:1, 13.

 Music le laamnak program a um maw?

Rawl dumnak ah music le laam hna telh khawh a si. (Phungchimtu 3:4) Hla thim tikah pakhat le pakhat duhmi le nunphung hna cu aa lo men lai lo nain ralring tein an thim. Biakinn ah tuahmi puai ahcun Baibal ah hrambunhmi hla hna kha an chuah tawn.

 Jehovah Tehte Hna nih ṭhitum camtuak puai an tuah maw?

Ṭhitum camtuaknak puai tuah awkah a forhmi asiloah a thlauhmi Baibal phunglam a um lo. Cucaah camtuaknak puai tuah ding, tuah lo ding timi cu nuva hna nih tuah dingmi biakhiahnak a si. Cheukhat nih anmah pahnih te lawng asiloah chungkhar le hawikom he an tuah.

^ cat. 2 Phungphai, phunglam le upadi halmi hna cu mahle umnak hmun he aa tlaiin aa dang cio.

^ cat. 18 Ṭhitumnak puai caah phung a chimtu nih a man a la hna lo i Biakinn hman man zong pek a um lo.

^ cat. 26 A hmaan lomi biaknak in aa thawkmi mah phunglam kong tam deuh in hngalh awkah 2007, February 15, Vennak Innsang i “Careltu Hna Sinin Biahalnak” kha zoh.