A ummi cazin ah kal

Jehovah Tehte Hna Nih Zeidah An Zumh?

Jehovah Tehte Hna Nih Zeidah An Zumh?

Jehovah Tehte Hna cu Jesuh cawnpiakmi Khrihfa nunning in nun awkah an i zuam. Mah cu lamkaltu hna nih an langhtermi nunning a si. A hrampi kan zumhnak kong hna kha mah capar ah a tawinak in a langhter.

  1. Pathian. Jehovah tiah min a ngeimi pakhat lawng a simi Pathian, Cung Nung Bik le Sertu kha kan biak. (Salm 83:18; Biathlam 4:​11) Amah cu Abraham, Moses le Jesuh nih an biakmi Pathian a si.​—Exodus 3:6; 32:11; Johan 20:17.

  2. Baibal. Baibal cu minung caah Pathian sinin a rami bia a si tiah kan zumh. (Johan 17:17; 2 Timote 3:​16) Kan zumhnak cu “Biakam Hlun” le “Biakam Thar” aa telmi Baibal cauk uk 66 cungah hram aa bunh. Mah kong he aa tlaiin biaknaklei ah Mifim a simi Jason D. BeDuhn nih hitin a ti: Jehovah Tehte Hna cu “Baibal ah mah kong hi aa tel awk a si tiah a hlankan in ruahnak chim tibantuk tuah loin an zumhnak le an tuahsernak hna cu Baibal cungah hram aa bunh.” *

    Baibal kha a uk ningin kan cohlan ko nain biaknak upadi vialte fel tein a zulmi minung (fundamentalists) kan si lo. Baibal i cheukhat ṭhen hna cu langhternak bia in ṭialmi a si caah a biafang ningin a sullam lak khawh a si lo tiah kan zumh.​—Biathlam 1:1.

  3. Jesuh. Jesuh Khrih cawnpiaknak le a nunning kha kan i zohchunh i a kan Khamhtu Pathian Fapa in kan thangṭhat. (Matthai 20:28; Lamkaltu 5:​31) Cucaah kannih cu Khrihfa kan si. (Lamkaltu 11:26) Asinain Jesuh cu Cung Nung Bik Pathian a si lo, Thumkomh Pathian cawnpiaknak caah Baibal in langhter ding a um lo ti kha Baibal in kan hngalh.​—Johan 14:28.

  4. Pathian Pennak. Pathian Pennak timi cu Khrihfa hna i lungthin ah a ummi thil sining pakhat kha a chim duhmi si loin vancung ah a um taktakmi cozah a si. Pathian Pennak nih minung uknak kha a airolh lai i vawlei he aa tlaiin Pathian tinhnak kha tlam a tlinter lai. (Daniel 2:​44; Matthai 6:​9, 10) Kannih cu “ni hmanung bik” ah kan nung tiah Baibal nih a chimchung caah a rauhhlan ah Pathian Pennak nih cutin a kan tuahpiak cang lai.​—2 Timote 3:​1-5; Matthai 24:​3-​14.

    Jesuh cu vancung ah a ummi Pathian Pennak Siangpahrang a si cang. 1914 thawk in a uk cang.​—Biathlam 11:15.

  5. Khamhnak. Jesuh tlanhnak man thawngin sualnak le thihnak in khamh kan si. (Matthai 20:28; Lamkaltu 4:​12) Tlanhnak man in ṭhathnemhnak hmuh kan duh ahcun Jesuh kan zumh kha kan langhter lai lengah nunning kha thlen in tipil kan ing lai. (Matthai 28:19, 20; Johan 3:​16; Lamkaltu 3:​19, 20) Zumhnak kan ngeih kha tuahsernak in kan langhter lai. (Jeim 2:​24, 26) Asinain khamhnak cu tuahsernak in hmuhmi si loin “Pathian vel” thawngin a si.​—Galati 2:​16, 21.

  6. Vancung. Jehovah Pathian, Jesuh Khrih le zumhfekmi vancungmi hna cu vancung ah an um. * (Salm 103:19-​21; Lamkaltu 7:​55) Minung 144,000 lawng Pathian Pennak ah Jesuh he uktu ṭuanṭi awkah vancung nunnak in an thoṭhan lai.​—Daniel 7:​27; 2 Timote 2:​12; Biathlam 5:​9, 10; 14:​1, 3.

  7. Vawlei. Pathian nih vawlei kha minung caah zungzal umnak inn si dingin a ser. (Salm 104:5; 115:16; Phungchimtu 1:4) Pathian nih nawl a ngaimi hna kha vawlei paradis ah a tlingmi ngandamnak le zungzal nunnak thluachuah a pek hna lai.​—Salm 37:11, 34.

  8. Ṭhatlonak le sifah harnak. Pathian vancungmi pakhat i ralchanhnak ruangah ṭhatlonak le sifah harnak hna a hung um. (Johan 8:​44) Ralchanhtu vancungmi kha “Satan,” “Khuachia” tiah auh a si. Hmasa bik minu le mipa kha amahlei ah ṭan dingin a hlen hna caah amah ruangah mi vialte nih harnak kan tong. (Genesis 3:​1-6; Rom 5:​12) Satan ruangah a chuakmi ziazalei rawhralnak he aa tlaimi buaibainak hna kha tawnghtham khawh awkah Pathian nih ṭhatlonak le sifah harnak hna kha umnak nawl a awnhmi a si. Asinain a zungzal in cun a awnh lai lo.

  9. Thihnak. Minung cu an thih tikah zeihmanh a tang ti lo. (Salm 146:4; Phungchimtu 9:​5, 10) Mithi cu hell mei zongah hrem an si lo.

    Pathian nih thawhṭhannak timhtuahnak kha hmangin mi nuai tampi kha a nunter ṭhan hna lai. (Lamkaltu 24:15) Asinain a nung ṭhanmi hna nih Pathian phunglam hna kha cawn an duh lo ahcun zungzal in hrawh an si lai.​—Biathlam 20:14, 15.

  10. Innchungkhar. Ṭhitumnak he aa tlaiin Pathian i a hrampi phunglam cu pa pakhat le nu pakhat thih tiangin umṭi ding a si. Mah phunglam kha fek tein kan i tlaih. I ṭhen khawhnak a ruang pakhat cu zuanzamnak lawng a si. (Matthai 19:​4-9) Baibal chung i fimnak aa telmi lamhruainak hna nih innchungkhar hlawh a tlinter ti kha tling tein kan zumh.​—Efesa 5:⁠22–​6:1.

  11. Biaknak. Vailamtah, asiloah a dang hmanthlak,milem hna kha kan bia lo. (Deuteronomi 4:​15-​19; 1 Johan 5:​21) Kan biaknak ah a bik in aa telmi cu:

    • Pathian sinah thlacamnak.​—Filipi 4:6.

    • Baibal hlathlainak le relnak.​—Salm 1:​1-3.

    • Baibal in cawnmi kong hna ruahnak.​—Salm 77:12.

    • Thlacam awk, Baibal hlathlai awk, hlasak awk, kan zumhnak langhter awk, zumtu khat hna le midang thapek awkah i pumhṭinak.​—Kolose 3:​16; Hebru 10:23-​25.

    • “Vancung Pennak kong Thawngṭha” chimnak.​—Matthai 24:14.

    • Bawmh a herhmi hna bawmhnak.​—Jeim 2:​14-​17.

    • Biakinn hna le vawleicung pumpi Baibal cawnpiaknak rian caah hmanmi a dang inn hna saknak le remhnak.​—Salm 127:1.

    • Harnak a tongmi hna bawmhnak ah i telnak.​—Lamkaltu 11:27-​30.

  12. Kan bupi. Khrihfabu hna kha dirh a si i Khrihfabu kip ah Khrihfa upa phu, phu khat cio nih tlangtlak a si. Asinain Khrihfa upa hna cu lahkhah a eimi cawnpiaktu an si lo. (Matthai 10:8; 23:8) Cheuhra cheukhat hal a um lo bantukin pumhnak ah thawhlawm kholh zong a um lo. (2 Korin 9:7) Kan rianṭuannak dihlak cu min langhter loin hlutmi in ṭuan a si.

    Sining a tlinhmi Khrihfa mi tlawmte in dirhmi Uktu Bu nih kan zungpi in vawleicung pumpi ah a ummi Jehovah Tehte Hna kha lam an hruai hna.​—Matthai 24:45.

  13. Kan Lungrualnak. Khoika i kan um hmanhah kan zumhnak cu aa khat. (1 Korin 1:​10) Nun dot, taksa rong, miphun, phun niam, phun sang tibantuk thleidannak um lo awkah kan i zuam. (Lamkaltu 10:34, 35; Jeim 2:4) Asinain kan zapi in i thimnak nawl kan ngei. Baibal in cawnpiakmi chiaṭha thleidannak ningin Jehovah Tehte pakhat cio nih mah tein biakhiahnak an tuah.​—Rom 14:​1-4; Hebru 5:​14.

  14. Kan nuncan. Zeibantuk thil sining paohah mah zawn ruat lo dawtnak langhter kan i zuam. (Johan 13:34, 35) Thi ningcang loin hmannak a simi thirawnhnak i tel in Pathian nih a huatmi ziaza dihlak kha kan hrial. (Lamkaltu 15:28, 29; Galati 5:​19-​21) Kannih cu dai tein kan um i raltuknak ah kan i tel lo. (Matthai 5:9; Isaiah 2:4) Kan umnak ram i cozah kha kan upat hna i Pathian nawlbia he aa ralkah lo ahcun ram upadi kha kan zulh.​—Matthai 22:21; Lamkaltu 5:​29.

  15. Zatlang nunnak. Jesuh nih hitin a ti: “Na innpa cu nangmah naa dawt bantukin na dawt lai.” Mah lengah Khrihfa hna cu “vawlei ta an si” lo ti zongin a ti. (Matthai 22:39; Johan 17:16) Cucaah “mi cungah ṭhatnak tuah” khawh dingin kan i zuam, ramkhel rian ah khoikalei hmanhah kan ṭang lo, biaknak dang he zong kan i cawhkalh lo. (Galati 6:​10; 2 Korin 6:​14) Asinain mah kong he aa tlaiin midang nih an i thimmi kha kan upat.​—Rom 14:12.

Jehovah Tehte Hna i an zumhnak kong he aa tlaiin hngalh chap na duh ahcun kan website ah tam deuh in rel khawh a si, kan zung pakhatkhat ah pehtlaihnak na tuah khawh bantukin na umnak pawngah a ummi biakinn zongah naa pum kho asiloah na umnak i Jehovah Tehte pakhat he bia nan i ruah kho.

^ cat. 4 Truth in Translation, cahmai 165 ah zoh.

^ cat. 10 Vancungmi ṭhalo hna cu thlarau pum in umnak hmun ah an um ko nain annih cu vancung in ṭhawl an si.​—Biathlam 12:​7-9.