A ummi cazin ah kal

Jehovah Tehte Hna nih Midang kha Biaknak i Thlen dingin Nan Hnek Hna Maw?

Jehovah Tehte Hna nih Midang kha Biaknak i Thlen dingin Nan Hnek Hna Maw?

Kan hnek hna lo. A bikin chuahmi kan mekazin Vennak Innsang ah hitin a ti: “Biaknak i thlen awkah mi pawl hnek cu a palh.” * A tanglei a kong hna ruangah mi pawl kha biaknak i thlen awkah kan hnek hna lonak a si:

  • Jesuh nih a cawnpiaknak kha mi nih an cohlan nakhnga zeitikhmanh ah hramhram in a hnek hna lo. Mi tlawmte lawng nih a cawnpiaknak an cohlan lai ti kha a hngalh. (Matthai 7:​13, 14) A chimmi bia a zultu hna nih cohlan an duh lo ti kha Jesuh nih a hngalh tikah kalnak nawl a pek hna.​—Johan 6:​60-​62, 66-​68.

  • Mi pawl an zumhnak an i thlen nakhnga hramhram in hnek hna lo awkah a zultu kha Jesuh nih a cawnpiak hna. A zultu hna nih Pathian Pennak kong thawngṭha kha mi nih an cohlan nakhnga hramhram in hnek canah a cohlangmi lawng kha an kawl hna lai.​—Matthai 10:​7, 11-​14.

  • Pathian nih lungthin dihlak in biaknak lawng kha a cohlan caah biaknak an i thlen nakhnga ṭhihphaih in hramhram in hnek cu a duh lo.​—Deuteronomi 6:​4, 5; Matthai 22:37, 38.

Biaknak i thlen dingin kan leem hna maw?

Baibal kong thawngṭha cu “vawlei cung khuazakip ah” kan chim dingmi a si caah Baibal nih nawl a kan pek bantukin ‘zapi lakah siseh, innkhat hnu innkhat ah siseh’ thawngṭha kan chim ti cu a hmaan ko. (Lamkaltu 1:8; 10:42; 20:20) A hmasa Khrihfa hna cu midang kha biaknak i thlen awkah an leem hna tiah sual an rak puh hna bantukin kannih zong a hmaan loin sual a kan puh ve tawn. (Lamkaltu 18:12, 13) Cutin sual puh cu a palh. Kan zumh ningin nan zumh ve lai tiah ahohmanh hramhram in kan hnek hna lo. Mikip nih fimnak he zalong tein i thimnak nawl an ngei ti kha kan cohlan.

Mi pawl kha biaknak an i thlen nakhnga hramhram in kan hnek hna lo bantukin biaknak min i bunh in ramkhel rianṭuannak ah i tel, mithar hmuh awkah thilri in leem tibantuk kan tuah lo. Anmahle anmah Khrihfa kan si tiah aa ti ko nain Khrih nih tuah u tiah a timi kha tuah loin cubantuk thil a tuahmi hna he kan i lo lo. *

Mi pakhat nih biaknak i thlennak nawl a ngei maw?

Profet Abraham nih a chungkhat hna i an biaknak kha a kaltak

A ngei ko. Mi pawl nih biaknak i thlennak nawl an ngeih kha Baibal ah a langhter. An pupa chan in an biakmi biaknak kha zul loin a hmaanmi Pathian kha anmah lungtho tein a biami hna kong Baibal ah aa ṭial. Mah hna lakah Abraham, Ruth, Athens khua mi cheukhat le lamkaltu Paul an i tel. (Joshua 24:2; Ruth 1:​14-​16; Lamkaltu 17:22, 30-​34; Galati 1:​14, 23) Mah lengah mi pakhat nih Pathian cohlanmi biaknak kha a hlawt duh ahcun a hlawt khawh ko tiah Baibal ah a langhter.​—1 Johan 2:​19.

UN nih a thanhmi “vawlei minung zalonnak he aa tlaimi upadi caah a hrampi phunglam” a simi Vawleicung Pumpi Minung Zalonnak kong Thanhnak Ca zongah biaknak i thlennak nawl a um tiah a ti. Mikip nih “an zumhnak kha zalong tein i thlennak nawl an ngei” i biaknak kong i tel in “ruahnak, hngalhnak kawl khawhnak nawl le midang chimh khawhnak nawl” an ngei tiah mah thanhnak ca nih a ti. * Cutin tuah khawhnak nawl i tel in midang i an tuah khawhnak nawl upat, mah zumhnak kilven le cohlan duh lomi zei paoh al khawhnak nawl zong a um tiah a ti.

Biaknak i thlennak nih pupa chan in zulh tawnmi phunglam kha a rawhter maw?

Cutin a si a herh lo. Zeibantuk biaknak an si hmanhah mi vialte kha upat hna u tiah Baibal nih a kan forh. (1 Piter 2:​17) Mah lengah nulepa he biaknak aa khah lo hmanhah anmah kha upat hna u timi Baibal nawlbia kha Jehovah Tehte Hna nih an zulh.​—Efesa 6:​2, 3.

Asinain Baibal hmuh ning kha mikip nih an cohlang lo. Zambia ah a ṭhangmi nu pakhat nih hitin a chim: “Ka umnak hmun ah mi pakhat biaknak aa thlen ahcun amah cu zumhawktlak lomi, chungkhar cingla a rawitu tiah an ruah.” Mah minu kumhra fai a si lioah Jehovah Tehte Hna he Baibal a cawng i mah hnu tlawmpal ah biaknak i thlen dingin biakhiahnak a tuah tikah cutin an ruah. “Kan min na chiatter tiah an ka ti i ka nu le ka pa cu an thin a hung tuk, cun kan lung na fahter tiah atu le atu a kan ti. Nulepa duhnak ralchanh in tuah cu ka caah a har tuk . . . Nulepa i pupa chan in zulh tawnmi phunglam nakin Jehovah cungah zumhfek tein um ding kaa thimmi cu chungkhar ningzahter dingin ka tuahmi a si lo.” *

^ cat. 2 2002, January 1, Vennak Innsang, cahmai 12, catlangbu 15 ah zoh.

^ cat. 8 Tahchunhnak ah, AD 785 hrawngah Siangpahrang Charlemagne nih Saxony mi hna kha Khrihfa in tipil nan in lo ahcun thih dan pek nan si lai tiah nawl a chuah. Ram uktu hna cu Roman Catholic asiloah Lutheran an si lai i an ukmi ram ah a ummi kip nih an biaknak ah an lut lai tiah 1555 kum, Rom Empire chungah a ummi lung aa khat lomi bu kip nih min an thutmi Augsburg biakamnak ca ah aa ṭial. Biaknak aa thleng lomi paoh kha ram chungin an ṭhawl hna.

^ cat. 11 Cutin tuah khawhnak nawl kha Africa Minung Zalonnak kong Biakamnak, American Minung Zalonnak kong Thanhnak Ca, 2004 Arab Minung Zalonnak kong Biakamnak, ASIA (Nichuah-thlanglei Asian Ram Hna Bu) Minung Zalonnak kong Thanhnak Ca, Minung Zalonnak kong Europe Biaceihnak Zung, Ramkomh Minung Zalonak le Ramkhel Zalonnak zongah a langhter. Asinain cubantuk tuah khawhnak nawl a um tiah a timi ram hna hmanhah a taktak ti ah cun nawl an pek hna dan aa lo lo.

^ cat. 14 Jehovah timi cu Baibal ah langhtermi a hmaanmi Pathian i a min a si.