A ummi cazin ah kal

Jehovah Tehte Hna nih Bawipa Zanriah An Tuah Ning cu Biaknak Dang Hna nih An Tuah Ning he Zeicah aa Lawh Lo?

Jehovah Tehte Hna nih Bawipa Zanriah An Tuah Ning cu Biaknak Dang Hna nih An Tuah Ning he Zeicah aa Lawh Lo?

“Bawipa Zanriah,” Hmanung Bik Zanriah, Jesuh a thih Philhlonak Puai tiah an hngalhmi Bawipa Zanriah kha Baibal ah a ummi ning tein kan tuah. (1 Korin 11:20; King James Version) Asinain mah puai kong he aa tlaiin mi tampi i an zumh ning le a dang bu hna nih an tuah ning cu Baibal ningin a si lo.

Aa Tinhnak

Bawipa Zanriah tuahnak i aa tinhnak cu Jesuh kha philhlo awk le kan caah raithawinak in aa pechanhmi Jesuh cungah kan i lawmhnak langhter awkah a si. (Matthai 20:28; 1 Korin 11:24) Mah puai cu a sunglawimi puai asiloah zaangfahnak langhternak, sual ngaihthiamnak tibantuk ṭhatnak a langhtermi biaknak phunglam pakhat a si lo. * Sualnak ngaihthiam kan simi cu Biaknak phunglam pakhat ruangah si loin Jesuh zumhnak thawngin a si tiah Baibal nih a kan cawnpiak.​—Rom 3:​25; 1 Johan 2:​1, 2.

Voi zeizat dah tuah ding a si?

Jesuh nih a zultu pawl kha Bawipa Zanriah tuah dingin a fial hna nain voi zeizat dah tuah ding ti cu fiang tein a chim hna lo. (Luka 22:19) Cheukhat nih thla fatinte tuah awk a si tiah an ti i cheukhat nih cun zarh fatinte, ni fatinte voi tampi asiloah aa tlak tik caan paohah tuah ding a si tiah an ti. * Asinain ruah awk a simi kong cheukhat kha langhter a si.

Jesuh nih Judah mi hna i Lanhtak Puai ni ah Bawipa Zanriah kha tuah hram a thawk i mah ni hnuah a thi. (Matthai 26:​1, 2) Mah cu aa tong sualmi a si lo. Baibal nih Jesuh raithawinak kha Lanhtak Puai tuufa he a tahchunh. (1 Korin 5:​7, 8) Lanhtak Puai cu kum khat ah voikhat an tuah. (Exodus 12:​1-6; Levitikas 23:5) Mah bantukin hmasa khrihfa hna nih Jesuh a thih Philhlonak Puai kha kum khat ah voikhat an tuah i * Jehovah Tehte Hna zong nih Baibal ah hram aa bunhmi cu bantuk ningin an tuah ve.

Nithla le a caan

Jesuh a tuah ning nih Bawipa Zanriah voi zeizat dah tuah ding a si timi lawng si loin zei nithla le zei caan ah dah tuah ding a si timi zong a kan hngalhter. Thlapa cungah hrambunh in tuakmi Baibal calendar ningin, hlanlio Isreal mi hna i calendar ningin AD 33, Nisan 14 nitlak hnuah mah puai kha Jesuh nih a rak tuah. (Matthai 26:18-​20, 26) Kannih zong hmasa Khrihfa hna nih an tuah ningin kum fatinte mah ni ah Ruahnolhnak Puai kha kan tuah ve. *

AD 33, Nisan 14 cu Ninga ni ah a si ko nain kum fatinte mah ni a phanh ni cu kum khat le kum khat aa lo lo. Kum fatinte Nisan 14 a phanh ni kha rikhiah tikah chan thar Judah calendar kha hmang loin Jesuh chan ah an hmanmi ningin tuak a si. *

Changreu le mitsur zu

Jesuh nih Lanhtak Puai i a tangmi thilnu phulh lo changreu le mitsur zu sen kha hmangin mah puai thar kha a rak tuah. (Matthai 26:26-​28) Mah ningin kannih zong thilnu le a dang thilri hna aa tel lomi changreu le a thlum, a thawtnam, a rim aa tel lomi mitsur zu sen kha kan hman.

Cheukhat biaknak nih thilnu phulhmi changreu kha an hman, asinain Baibal nih thilnu kha sualnak le ziaza rawhralnak hmelchunhnak caah a hman. (Luka 12:1; 1 Korin 5:​6-8; Galati 5:​7-9) Cucaah thilnu le a dang thilri aa tel lomi changreu lawng sualnak a ngei lomi Jesuh pum kha aiawh awkah aa tlak. (1 Piter 2:​22) Baibal he aa tlak loin tuah ning pakhat cu uam lomi mitsurhang kha mitsur zu can ah hman kha a si. Cheukhat biaknak nih mah ningin an tuah. A ruang cu Baibal nih a kham lo nain zu din kha anmah tein an kham caah a si.​—1 Timote 5:​23.

Hmelchunhnak hna cu thi le sa taktak an si lo

Ruahnolhnak Puai ah hmanmi thilnu phulh lo changreu le mitsur zu cu Khrih i a sa le a thi a aiawhmi hmelchunhnak an si. Cheukhat nih an zumh bantukin mah hmelchunhnak hna cu Jesuh i a thi le a sa taktak in khuaruahhar lam in aa thlenmi asiloah aa cawhmi a si lo. Mah kong theihthiam khawh awkah Baibal fianternak hi ruathmanh.

  • Jesuh nih a zultu hna kha a thi din awkah a fial hna ahcun thi hmannak kong he aa pehtlaimi Pathian nawlbia kha buar awkah a forh hna bantuk a si lai. (Genesis 9:4; Lamkaltu 15:28, 29) Mah cu zeiti hmanh in a si kho lomi a si, thi a sunlawinak kong he aa tlaimi Pathian nawlbia buar awkah midang kha Jesuh nih zeitikhmanh ah a cawnpiak hna lo.​—Johan 8:​28, 29.

  • Lamkaltu hna nih Jesuh thi taktak kha an din ahcun a pekchanh dingmi raithawinak kong a chim tikah ‘thlet dingmi,’ thi tiah a chim kho lai lo.​—Matthai 26:28.

  • Jesuh raithawinak cu “voikhat ah za lak in” a pekmi a si. (Hebru 9:​25, 26) Changreu le mitsur zu cu Bawipa Zanriah tuah lioah Jesuh a thi le a sa ah aa thlen ahcun a eimi an um caah mah raithawinak kha atu le atu pek ṭhan a hau lai.

  • Jesuh nih “keimah philhlonak ah tuah u” tiah a ti. “Keimah raithawinak ah” tiah a ti lo.​—1 Korin 11:24.

    Puai ah hmanmi changreu le mitsur zu cu Jesuh a thi le a sa taktak ah aa thleng tiah a zummi an um, mah zumhnak cu Baibal cang cheukhat ah aa telmi biafang cungah hram aa bunhmi a si. Tahchunhnak ah, Baibal lehmi tampi ah Jesuh nih mitsur zu he aa tlaiin “hihi ka thi a si” tiah a ti tiin a langhter. (Matthai 26:28) Asinain Jesuh chimmi bia hna kha “ka thi kha a langhter,” “ka thi kha a aiawh,” asiloah “ka thi bantuk a si” ti zongin leh khawh a si. * Jesuh nih atu le atu a tuah tawn bantukin tahchunhnak kha hmangin a cawnpiakmi hna a si.​—Matthai 13:34, 35.

Ahote nih dah an ei, an din?

Jehovah Tehte Hna nih Bawipa Zanriah an tuah tikah changreu le mitsur zu kha mi tlawmte lawng nih an ei, an din. Zeicah?

Jesuh thletmi thisen nih Jehovah le hlanlio Israel miphun kar ah an tuahmi biakamnak a airawlh hngami “biakamnak thar” kha a fehter. (Hebru 8:​10-​13) Biakamnak thar ah aa telmi hna nih Ruahnolhnak Puai hmelchunhnak hna kha an ei, an din. Cutin a eitu hna cu Khrihfa dihlak si loin a hlei khunmi lam in Pathian “kawhmi hna” lawng nih an ei, an din. (Hebru 9:​15; Luka 22:20) Annih cu Khrih he vancung ah uktu an ṭuanṭi lai. Mah tinvo sung cu 144,000 lawng nih an hmuh lainak kong kha Baibal nih a langhter.​—Luka 22:28-​30; Biathlam 5:​9, 10; 14:​1, 3.

“Tuurun hmete” in auh a simi annih cu Khrih he uktu an ṭuanṭi lai i mi tam deuh a simi kannih cu vawleicung ah zungzal nunnak a hmu hngami “mibu nganpi” ah i tel dingin kan i ruahchan. (Luka 12:32; Biathlam 7:​9, 10) Vawleicung ah nun dingin ruahchannak a ngeimi kannih cu Ruahnolhnak Puai hmelchunhnak hna kha kan ei, kan ding lo nain kan i pumhṭinak thawngin kan caah Jesuh nih a pekmi raithawinak cungah kan i lawmh kha kan langhter.​—1 Johan 2:2.

^ cat. 4 McClintock and Strong’s Cyclopedia, Volume IX, cahmai 212, ah hitin a ti: “A sunglawimi puai timi biafang cu Biakam Thar ah a um lo bantukin a thukmi tiah sullam a ngeimi Greek biafang μυστήριον [my·steʹri·on] zong tipil, Bawipa Zanriah asiloah phunglam ningin tuahmi a dang puai hna caah a hmanmi a um lo.”

^ cat. 6 Baibal lehmi cheukhat ah Bawipa Zanriah kong he aa tlaiin an langhter tikah “atu le atu” timi biafang an hman. Bawipa Zanriah voi zeizat dah tuah ding a si ti kha mah biafang nih a langhter tiah a sullam an fianter. Asinain a hrampi holh ah a cungtang biafang ningin mah biafang i a sullam taktak cu “fate” asiloah “tik paohah” a si.​—1 Korin 11:25, 26; New International Version; Good News Translation.

^ cat. 7 The New Schaff-Herzog Encyclopedia of Religious Knowledge, Volume IV, cahmai 43-​44, le McClintock and Strong’s Cyclopedia, Volume VIII, cahmai 836 ah zoh.

^ cat. 9 The New Cambridge History of the Bible, Volume 1, cahmai 841 ah zoh.

^ cat. 10 Chan thar Judah calendar cu arfi zoh in (astronomical) thlade ka cungah i hngat in Nisan thla i a hramthawknak kha an rel. Asinain mah tuak ning kha kum zabu pakhatnak lioah an rak hmang lo. Jerusalem khua in thlade ka hmasa bik hmuh caan cu Nisan thla a hramthawknak a si. Mah caan cu arfi zohnak thlade ka caan nakin nikhat asiloah mahnak in a hnu deuh. Mah aa dannak cu Jehovah Tehte Hna nih Ruahnolhnak Puai an tuah nithla le chan thar Judah mi hna nih Lanhtak Puai an tuah nithla aa khah peng lonak a ruang pakhat a si.

^ cat. 20 A New Translation of the Bible, by James Moffatt; The New Testament​—A Translation in the Language of the People, by Charles B. Williams; and The Original New Testament, by Hugh J. Schonfield ah zoh.