A ummi cazin ah kal

Baibal Hlathlai ṭinak cu Zeidah a Si?

Baibal Hlathlai ṭinak cu Zeidah a Si?

Jehovah Tehte Hna nih biahalnak tampi i a phi hmuh awkah Baibal hlathlai ṭinak program an ngei, mah ah hi biahalnak hna zong aa tel:

  • Pathian cu ahodah a si?

  • Pathian nih a ka zohkhenh taktak maw?

  • Ka innchungkhar zeitindah ka nuamhter khawh?

  • A nuammi nunnak zeitindah hmuh khawh a si?

A tanglei ah Baibal hlathlai ṭinak program he aa tlai in atu le atu a kan halmi biahalnak hna i a phi na hmuh lai.

Zeitindah hlathlai ṭinak tuah a si? “Pathian” asiloah “innchungkhar” ti bantuk a kong pakhatkhat kan i ruah i mah he aa tlaimi Baibal cang tam nawn kan i ruah. Cutin Baibal cang pawl tahchunhnak thawng in kan i ruahmi kong he aa tlai in Baibal nih zeidah a chim ti kha kan hngalh, cuticun Baibal kong kha amah Baibal theng in kan fianter.

Baibal hlathlai ṭinak i bawmtu ah Baibal Cawnpiakmi Taktak Cu Zeidah A Si? timi cauk kan hman. Mah cauk ah Pathian, Jesuh le hmailei kong Baibal chimmi le a dangdang kong kha hngalh fawi tein aa ṭial.

Baibal hlathlai ṭinak caah zeizat dah pek a hauh? Baibal hlathlai ṭinak caah man pek a hau lo i hlathlai ṭinak i hmanmi cauk ca zong ah man pek a hau lo.

Hlathlai ṭinak cu zei can dah a rauh? Mi tampi cu zarh fatin suimilam pakhat asiloah mahnak tam an cawng. Asinain a caan cu remh khawh a si ko. A caan na pek khawh ning in kan remh lai.

Baibal hlathlai ṭi awk ka hal ahcun zeidah nan tuah lai? Baibal hlathlai ṭi awk na kan hal ahcun naa manh caan le na sia a remnak hmun ah Jehovah Tehte pakhatkhat nih aan leng lai. Amah nih caan tlawmpal la in Baibal hlathlai ṭi dan aan chimh lai. Na duh ahcun pehzul tein na cawng kho.

Baibal hlathlai ṭinak ka cohlan ahcun Jehovah Tehte ka si a hau lai maw? A hau lo. Jehovah Tehte Hna nih Baibal kong mi va cawnpiak kha kan duh, asinain kan biaknak i luh awkah ahohmanh hramhram in kan hnek bal hna lo. Mah canah, ahopaoh duhmi thimnak nawl an ngeihmi kha kan cohlan i Baibal chimmi kha upatnak he kan chimh hna.​—⁠1 Piter 3:15.