A ummi cazin ah kal

A ummi cazin ah kal

A Ṭha Deuhmi Nunnak Zeitindah Hmuh Khawh A Si?

A Ṭha Deuhmi Nunnak Zeitindah Hmuh Khawh A Si?

ATU kan nunnak cu Pathian tinhnak bantukin a si lo. Vawlei cu Sertu i cungnung bik a sinak a upatmi, Pathian lamhruainak in ṭhatnak hmuh a duhmi le Pathian a sining hna aa zohchunhmi minung in khah dih ding a si. Annih nih chungkhar zohkhenh buin, thil thar cawn buin le vawlei paradis canter buin nuam tein rian ṭuanṭi ding kha a si.

Vawlei kha Aa Tinhnak Ningin Thlen awkah Pathian nih Bia aa Kam

  • “Hi vawleicung pumpi ah ral cu a daihter dih ko hna.”Salm 46:9.

  • “Atu caan hi . . . vawlei a hrawktu hna hrawh caan kha a si.”Biathlam 11:18.

  • “Kan ram i a ummi cu ka zaw tiah an zai ti lai lo.” Isaiah 33:24.

  • “An ṭuanmi chungin an hmuhmi theitlai kha tlamtling tein an hman hna lai.”Isaiah 65:22.

Mah chimchungbia cu zeitindah a tlin lai? Vancung in vawlei uk awkah a tlingmi cozah Siangpahrang in a Fapa, Jesuh kha Pathian nih a thim. Mah cozah kha Baibal nih Pathian Pennak tiah a ti. (Daniel 2:44) Jesuh kong he aa tlaiin Baibal nih hitin a ti: “Bawiṭhutdan kha Pathian nih amah cu a pek, amah cu  . . , siangpahrang zungzal in a si lai.”—Luka 1:32, 33.

Jesuh nih vawleicung a um lioah khuaruahhar thil tampi a tuah. Mah nih Siangpahrang in a uk tikah minung nunnak cu atu nakin a ṭha deuh lai ti kha langhter.

Nawlngaimi Hna caah a Tuah Dingmi Thil Ṭha Pawl kha Jesuh nih a Langhter

  • Zawtnak a phunphun a damtermi nih minung nih an tonmi zawtnak vialte a damter lai ti kha a langhter. Matthai 9:35.

  • Kokek ṭhawnnak a uknak thawngin mi pawl a huhphenh hna lai ti kha tilet a daihtermi nih a langhter. Marka 4:36-39.

  • Mi thong tampi rawl a danghmi hna nih nunnak caah a herhmi thil a pek hna lai ti kha a langhter.Marka 6:41-44.

  • Ṭhitumnak puai ah ti kha mitsur zu ah a cantermi nih minung nunnak a nuamhter lai ti kha a langhter. Johan 2:7-11.

Pathian a dawmi hna caah timhpiakmi cu bantuk nunnak kha zeitindah na hmuh khawh lai? Zulh a herhmi “lam” a um. Baibal nih “nunnak a phanmi lam cu a har i . . .  mi tlawmte lawnglawng nih an hmuh” tiah a ti.—Matthai 7:14.

A Ṭha Deuhmi Nunnak Lam Kawlnak

Nunnak lam timi cu zeidah a si? Pathian nih hitin a ti: “Keimah cu BAWIPA nan Pathian, nan ca ṭhatnak cawnpiak aan duhtu hna le nan zulh awk hnga lam aan hmuhsaktu hna ka si.” (Isaiah 48:17) Mah ruahnak cheuhnak na zulh ahcun na nunnak cu a ṭha deuh lai.

Jesuh nih “lam le biatak le nunnak cu keimah hi ka si” tiah a ti. (Johan 14:6) Jesuh cawnpiaknak  kan zulh i a nunning kha kan i zohchunh ahcun Pathian he kan i naih lai i kan nunnak cu a ṭha deuh lai.

Nunnak lam kha zeitindah hmuh khawh a si? Biaknak tampi a um ko nain Jesuh nih hitin ralrin a kan pek: “‘Bawipa, Bawipa,’ tiah a ka timi paoh in vancung Pennak chungah an lut dih lai tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai.” (Matthai 7:21) Hitin zongin a ti: “Annih cu an theitlai khan nan rak hngalh ko hna lai.” (Matthai 7:16) A hmaanmi biaknak le a hmaan lomi biaknak thleidan khawh awkah Baibal nih aan bawmh khawh.—Johan 17:17.

Nunnak lam cu zeitindah na zulh khawh? Mah ah nunnak a kan petu kong hngalh aa tel: Nunnak a kan petu cu ahodah a si? A min cu ahodah a si? Zeibantuk dah a si? Zeidah a tuah? Zeidah tuahter a kan duh? *

Pathian nih minung kha rian ṭuan, rawl ei, lente i celh le chungkhar zohkhenh ding lawngin a kan ser lo. Sertu kong kha kan hngalh khawh i a hawikom kan si kho. A duhnak kan tuahnak thawngin Pathian kan dawt kha kan langhter khawh. Jesuh nih hitin a ti: “Pathian taktak a simi nangmah hngalh hi . . .  zungzal nunnak cu a si.”—Johan 17:3.

PATHIAN NIH ‘KAN CA ṬHATNAK’ CAAH BAIBAL HMANGIN A KAN CAWNPIAK—ISAIAH 48:17

Nunnak Lam Zulh Hram Thawknak

Pakhat lawng a simi, a hmaanmi Pathian mithmai ṭha hmuh awkah thlennak cheukhat tuah a hau. Mah cu a harmi a lo kho men. A tak ti ahcun nunnak lam zulh hram kan i thawkmi cu a ṭha deuhmi nunnak lam ah kan kalmi a si. Pathian kong he aa tlaimi biahalnak hna i a phi hngalh awkah na caah aa remmi hmun le caan ah man loin Baibal cawn awkah Jehovah Tehte Hna nih an in bawmh khawh. Kan website www.jw.org/cnh kha hmangin pehtlaihnak na kan tuah khawh.