A ummi cazin ah kal

A ummi cazin ah kal

Atu Hmanhah i Nuamh Khawh a Si

Atu Hmanhah i Nuamh Khawh a Si

ZAWTNAK, tarnak le thihnak a um lomi nunnak kha nang zong na ngei kho ve. Asinain atu ah ahopaoh nih buaibainak le harnak tampi kan tong. Atu hmanhah nuam tein nun khawh awkah zeinihdah aan bawmh khawh? A nuammi le lungsi hnangamnak a pemi nunnak ngeih awkah Baibal nih lamhruainak aan pek khawh. Baibal nih nunnak ah tonmi zuamcawhnak cheukhat tawnghtham awkah aan bawmh khawh ning kong kha ruat.

Lungsi Hnangamnak Hmuhnak

Baibal ruahnak cheuhnak: “Tangka hi duh tuk hlah u, nan ngeihmi ah khan nan lung awi ko u.” Hebru 13:5.

Tuchan ah mi nih ngeih a herh tiah an ruahmi thil tampi a um. Asinain Baibal nih “nan ngeihmi ah khan nan lung awi ko u” tiah a ti. Zeitindah?

‘Tangka duh tuk’ kha hrial. Mi nih ‘tangka an duh’ caah an ngandamnak, an chungkhar, an hawikom, an ziaza le an minṭhatnak a hnorsuan hmanhah zeipaoh an tuah. (1 Timote 6:10) Cutin an tuahmi cu a phu lo. Tangka a duhmi nih cun ‘zeitikhmanh ah kaa za cang a ti kho bal lai lo.’—Phungchimtu 5:10.

Minung cu thilri nakin an biapi deuh. Thilri cheukhat cu a ṭhahnemmi an si. Asinain thilri nih cun kan cungah dawtnak asiloah lunglawmhnak an langhter kho lo. Minung lawng nih an langhter khawh. “Hawikom” ṭha ngeihnak nih lungsi hnangamnak a pemi nunnak a kan ngeihter khawh.—Phungthlukbia 17:17.

BAIBAL LAMHRUAINAK ZULHNAK THAWNGIN ATU AH NUAMHNAK HMUH KHAWH A SI

Zawt tikah Inkhawhnak Ngeih khawh Ning

Baibal ruahnak cheuhnak: “Lungthin lawmh hi sii ṭha a si.”Phungthlukbia 17:22.

Lawmhnak nih “sii ṭha” bantukin zawtnak kha inkhawh awkah a kan bawmh khawh. Asinain kan zawt tikah zeitindah kan i lawmh khawh?

Lunglawmhnak langhter. Kan tonmi harnak kong lawng kan ruah ahcun “nifate” hi ni har an si ko lai. (Phungthlukbia 15:15) Mah canah Baibal nih “lunglawmhnak in khat u” tiah a ti. (Kolose 3:15) Thil hmete a si hmanhah na ngeihmi thil ṭha cungah lunglawmhnak langhter. Aa dawh tukmi nitlak lai, thlizil nemte le dawtmi pakhat a nihmi nih kan nunnak a nuamhter khawh.

Midang caah thil tuah. Kan ngan a dam lo hmanhah “peklei ah hin hmuhlei nakin lunglawmhnak a um deuh.” (Lamkaltu 20:35) Kan tuahmi thil cungah midang nih lunglawmhnak an langhter tikah kan i nuam i kan tonmi buaibainak kong kha kan ruat tuk ti lo. Midang kan bawmh hnanak thawngin a ṭha deuhmi nunnak kan ngei kho.

 Chungkhar Fehter Khawh Ning

Baibal ruahnak cheuhnak: ‘A biapi deuhmi thil kha hngal.’Filipi 1:10, NW.

Pakhat le pakhat caan aa pe kho tuk lomi nuva hna cu an i pehtlaihnak a rawk tawn. Cucaah nuva hna nih an chungkhar kha a biapi deuhmi in an hmuh awk a si.

Hmunkhat ah rian ṭuanṭi u. Tuah nan duhmi kha nanmah lawngin tuah si loin hmunkhat ah tuahṭi dingin timhtuahnak ngei u. Baibal nih “pahnih cu pakhat nakin a ṭhahnem deuh” tiah a ti. (Phungchimtu 4:9) Hmunkhat ah rawl chuanṭi, exercise tuahṭi, dawr ah ṭhutṭi asiloah huammi thil tuahṭi ti bantuk hna kha tuah khawh a si.

Na dawt kha langhter. Baibal nih nu le va kha i dawt dingin le i upat dingin a forh hna. (Efesa 5:28, 33) Hmaipanh tein nihnak, dawtnak in kuhnak le laksawng hmete peknak nih innchungkhar kha a fehter khawh. Nuva hna nih an innchunghawi he lawng nupa umṭinak kha an hman ding a si.—Hebru 13:4.