A ummi cazin ah kal

A ummi cazin ah kal

“Nannih cu pithlung tampi nakin tampi in nan sung deuh.”—MATTHAI 10:31

Pathian Nih Aan Hngal Maw?

Pathian Nih Aan Hngal Maw?

SERMI THIL NIH A KAN CAWNPIAK

Naute cu a nu paw chungin a chuah in suimilam 1 chungah a nu nih dawtnak in pom le cawi cu a biapi tuk. Mah nih a ṭhannak kha fakpi in a bawmh. *

Nule kha a chuakkami fale zohkhenh awkah zeinihdah a forh hna? Professor Jeannette Crenshaw nih Mekazin pakhat (The Journal of Perinatal Education) ah oxytocin hormone nih “nu pakhat cu a chuakkami a fate a tawngh, a zoh i hnuk a dinh tikah nule lungput ngeih awkah a forh” tiah a ti. Mah lioah a dang hormone nih “a fa cungah lehrulhnak langhter dingin a nu kha a forh.” Mah cu zeicah a biapit?

Dawtnak a ngeimi Sertu, Jehovah Pathian nih nu le fa kar i a ummi dawtnak kha a ser. * Siangpahrang David nih ‘a nu paw chungin him tein a chuahter’ ca le a nu ṭang chungah himnak a hmuhter caah Pathian kha a thangṭhat. Hitin thla a cam: “Ka chuah ri in nangmah cu kaan bochan zungzal i ka chuah ri in ka Pathian na si zungzal ko.”—Salm 22:9, 10.

RUATHMANH: Minung a simi nule nih an fale kha dawtnak in an zohkhenh hna i an herhmi an pek khawh hna nakhnga a hnawkmi thil kha Pathian nih a ser a si ahcun “Pathian fa” a simi pakhat cio kha Pathian nih a kan zohkhenh ti cu aa tlakmi a si ko lo maw?—Lamkaltu 17:29.

PATHIAN ZOHKHENHNAK HE AA TLAIIN BAIBAL CAWNPIAKMI

Aho nakhmanh in Sertu kong a hngal deuhmi Jesuh nih hitin a kan cawnpiak: “Phaisa sen pakhat in pithlung pahnih nan cawk khawh, asinain khi pithlung pakhat hmanh kha nan Pa hngalh loin vawlei ah a tlong lo. Nannih chinchin cu nan lu cung sam hmanh kha a rel dih. Cucaah nan thinphang hlah u: nannih cu pithlung tampi nakin tampi in nan sung deuh.”—Matthai 10:29-31.

Va pakhat kip cio a hngalmi cu an tlawmte. Va pakhat vawlei ah a tlonmi hngalh ding cu a har chinchin. Asinain vancung kan Pa nih cun pakhat kip cio kha a hngalh hna. Minung cu va nakin a caah kan sunglawi deuh. Mah in kan hngalhmi cu Pathian nih a ka hngal lai lo tiah kan phan awk a si lo. Pathian nih aan zohkhenh taktak ko.

Pathian cu kan ca ṭhatnak caah siaherhnak a ngei i dawtnak he a kan zohkhenh

 Hnemhnak a kan pemi Baibal caang hna

  • “BAWIPA nih khuazei ka i thil a ummi hmanh kha a hmuh dih, ṭhatnak kan tuah ah siseh, chiatnak kan tuah ah siseh, a kan hmuh dih ko.”—PHUNGTHLUKBIA 15:3.

  • “A dingmi cu BAWIPA nih a zohkhenh hna i an aunak kha a theih.”—SALM 34:15.

  • “A fekmi na dawtnak ruangah ka lung aa lawm lai i ka tha a nuam lai. Ka temhinnak kha na hmuh i ka harnak kha na hngalh.”—SALM 31:7.

“JEHOVAH NIH A KA DAW LO TIAH KA RUAH”

Pathian cu kan ca ṭhatnak caah siaherhnak a ngei i dawtnak he a kan zohkhenh timi hngalhnak nih kan nunnak ah thlennak a kan tuahter kho maw? A kan tuahter khawh. Mah kong kha England ram i Hannah nih hitin a chim: *

“Jehovah nih a ka daw lo i ka thlacamnak a ka let lo tiah ka ruah tawn. Mah cu keimah lei in zumhnak ka ngeih lo caah a si tiah ka ruah. Dan a ka tat asiloah a biapimi ka si lo caah zei ah a ka rel lo tiah ka ruah. Pathian nih a ka zohkhenh lo tiah ka ruah.”

Asinain atu ahcun Hannah cu Pathian zohkhenhnak le dawtnak cungah lunghrinnak a ngei ti lo. Zeinihdah a ruahnak cu a thlen? “Mah cu duhsah duhsah in aa thleng” tiah a ti. “A luancia kum tampi lio i Jesuh tlanhnak man kong phungchimnak pakhat nih ka lung a ka suk tukmi kha kaa cinken rih. Mah nih Jehovah dawtnak kha zumh awkah a ka bawmh. Ka thlacamnak leh ka si tikah Jehovah nih a ka dawt ti kha ka hun hngalh i ka mitthli a tla tawn. Baibal hlathlainak le pumhnak in Jehovah kong, a sining le kan cung i a ngeihmi intuarnak hna kha ka hun hngalh deuh. Kan dihlak cungah langhtermi Jehovah dawtnak le pakhat cio zohkhenh a kan duhnak kha atu cu fiang tein ka hngalh cang.”

Hannah chimmi bia cu thazaang petu taktak a si. Asinain na intuarnak kha Pathian nih a hngalhthiam i aa cinken ti kha zeitindah na zumh khawh? A hnu capar nih mah biahalnak kha a fianter lai.

^ cat. 3 Nau ngeih lioah lungdongh zawtnak a tuarmi nule cheukhat cu an fale kha dawtnak in pom le cawi an i harh kho men. Asinain mawhchiat awk an si lo. U.S i Lungthinlei Ngandamnak Sianginn nih nau ngeih lioah tuarmi lungdonghnak cu “pumsalei le lungthinlei ruangah a chuakmi si dawh a si . . . asinain mah cu nule nih pakhatkhat an tuah ruang asiloah an tuah lo ruangah a chuakmi a si lo” tiah a ti. Mah kong tam deuh in hngalh awkah 2003, June 8, I Hlau! i “Nau Ngeih Lioah Tuarmi Lungdonghnak Kong Hngalhthiamnak” timi capar ah zoh.

^ cat. 5 Jehovah timi cu Baibal chungah langhtermi Pathian min a si.—Salm 83:18.

^ cat. 15 Hi aa pehmi capar i langhtermi min cheukhat cu thlen an si.