A ummi cazin ah kal

A ummi cazin ah kal

“A Ṭapmi Sinah Va Ṭap Ve U”

“A Ṭapmi Sinah Va Ṭap Ve U”

“Pakhat le pakhat thazaang i pe u law i bawm u.” —1 THES. 5:11.

HLA: 53, 28

1, 2. A ngaihchiami hna hnemh khawhning kong i ruah cu zeicah a herh? (A hramthawknak hmanthlak zoh.)

SUSI nih “kan fapa a thih in kumkhat chung cu kan lung a fak i kan ngaih a chia tuk” tiah a ti. A nupi nih ruahlopi in a thihtak tikah unaupa pakhat nih “ka lung a fak tuk hringhran” tiah a ti. Mi tampi nih cu bantuk ngaihchiatnak kha an ton. Unau tampi nih Armageddon a rat hlanah kan dawtmi hna nih an kan thihtak lai tiah an i ruahchan lo. Asinain na dawtmi pakhatkhat nih an in thihtak men lai asiloah ngaihchiatnak a tongmi pakhatkhat kha na hngalh men hna lai. Mah tikah ‘a ngaih a chiami hna kha zeitindah hnemh khawh an si lai?’ tiah na ruat ko lai.

2 Ngaihchiatnak cu a caan nih a damter te ko lai tiah mi cheukhat nih an chim. Asinain cutin a si zungzal  maw? Nuhmei nu pakhat nih hitin a chim: “Fiang tein chim ahcun pakhatkhat tuah buin a caan liamternak nih lungfahnak a damter.” Kan tak cung i hma bantukin lungthinlei damternak ca zongah a caan le zohkhenhnak a hau. A ngaih a chiami hna i an lungfahnak kha zeinihdah a zorter khawh?

Jehovah cu “Zeizong Vialte ah a Kan Hnemtu” a Si

3, 4. Kan ngaihchiatnak kha Jehovah nih a hngalhthiam tiah zeicah kan chim khawh?

3 Zaangfahnak a ngeimi kan Pa, Jehovah cu a bik in a kan hnemtu a si. (2 Korin 1:3, 4 rel.) * Jehovah cu zaangfahnak langhternak ah zohchunh awk ṭha bik a si i a mi pawl kha “nanmah thazaang [hnemhnak, NW] aan petu hna cu keimah ka si” tiah a ti hna.—Isa. 51:12; Salm 119:50, 52, 76.

Zumhfekmi pawl a thawhter hna lai caan kha Jehovah nih aa ngaih tuk

4 Dawtnak a ngeimi kan Pa, Jehovah zong a salle a simi Abraham, Isak, Jakob, Moses le Siangpahrang David ti bantuk dawtmi nih thihtaknak kha a tong ve. (Nam. 12:6-8; Matt. 22:31, 32; Lam. 13:22) Mah zumhfekmi pawl a thawhter hna lai caan kha Jehovah nih aa ngaih tuk tiah Baibal nih a ti. (Job 14:14, 15) Mah tikah annih cu a tlingmi ngandamnak an hmu lai i an i nuam tuk lai. Jehovah i a dawt tukmi a Fapa ngeihchunhte zong fahnak in buin a thi. (Ptb. 8:22, 30) Mah tikah Jehovah cu zeitluk in dah a ngaih a chiat lai ti khi a ruah hmanh kan ruat kho lo.—Johan 5:20; 10:17.

5, 6. Jehovah nih zeitindah a kan hnemh?

5 Jehovah nih a kan bawmh hrimhrim lai ti kha kan zumh khawh. Cucaah kan ngaihchiatnak le kan lungfahnak kha Jehovah sinah zalong tein kan phuan awk a si. Jehovah nih kan intuarnak kha a hngalhthiam i a herhmi hnemhnak a kan pek lai ti hngalh cu hnemtu taktak a si. Asinain zeitindah a kan hnemh?

6 Jehovah nih a kan hnemhnak lamkhat cu thiang thlarau in a si. (Lam. 9:31) Jehovah sinah thiang thlarau a halmi hna cu Jehovah nih a pek hna lai tiah Jesuh nih bia a kan kamh. (Luka 11:13) A hmasa ah a kong chimmi Susi nih hitin a chim: “Hnemhnak hmuh awkah Jehovah sinah khukbil in thla ka cam caan a tampi. Cutin kan tuah fatin te Pathian daihnak nih kan lungthin le kan ruahnak kha a kan huhphenh.”—Filipi 4:6, 7 rel.

 Jesuh zong nih Kan Intuarnak kha a Hngalhthiam

7, 8. Jesuh nih hnemhnak a kan pek lai tiah zeicah kan zumh khawh?

7 Jesuh nih vawleicung a um lioah a biachim le a tuahsernak in a Pa sining kha tling tein aa zohchunh. (Johan 5:19) Jehovah nih Jesuh kha a “lung a kuaimi” le “a ngaih a chiami” pawl hnemh awkah vawleicung ah a rak thlah. (Isa. 61:1, 2; Luka 4:17-21) Mi nih an intuarnak kha Jesuh nih a hngalhthiam i bawmh a kan duh taktak ti kha an hngalh.—Heb. 2:17.

8 Jesuh cu a ngakchiat lioah a hawikom le a chungkhar mi nih an thihtak ve lai ti cu a fiang ko. Tahchunhnak ah, amah a cawmtu a pa, Josef cu a ngakchiat lioah rak thih dawh a si. * A nu le a unau pawl an ngaih a chiat bantukin mino a simi Jesuh zong zei tlukin dah a ngaih a chiat ve lai ti khi na mitthlam ah cuanter hmanh.

9. Lazaruh a thih tikah Jesuh nih a ngaihchiatnak kha zeitindah a langhter?

9 Jesuh nih phungchim rian a ṭuan lioah midang intuarnak kha a hngalhthiam i an cungah zawnruahnak a langhter. Tahchunhnak ah, a hawikom Lazaruh a thih tikah Mary le Martha an ngaihchiatnak nih a lung a fahter. Jesuh nih Lazaruh kha ka thawhter ṭhan lai ti a hngalh ko nain a zaang an fak tuk i a ṭap ve.—Johan 11:33-36.

10. Kan intuarnak Jesuh nih a hngalhthiam ti kha zeitindah kan zumh khawh?

10 Jesuh chimmi hnemhnak bia hna cu tuchan kan caah zeitindah bawmtu a si? Jesuh cu aa thleng bal lo tiah Baibal nih fiang tein a chim. Hitin kan hmuh: “Jesuh Khrih cu nizan le nihin le zungzal in amah ning a si ko.” (Heb. 13:8) Jesuh nih zungzal nunnak a kan pek khawh caah “nunnak lam ah mi a hruaitu” tiah auh a si. “Amah hrimhrim nih khan tukforhnak le temh-innak kha a rak in cang caah tukforhnak a ingmi kha a bawmh khawh hna” i an ngaihchiatnak zong a hngalhthiam. (Lam. 3:15; Heb. 2:10, 18) Cucaah midang nih fahnak an in tikah Jesuh cu a ngaih a chia ti kha kan zumh khawh. An ngaihchiatnak kha a hngalhthiam i ‘an herh lio caan te ah’ hnemhnak a pek khawh hna.—Hebru 4:15, 16 rel.

Cathiang In Hnemhnak

11. Na caah zei Baibal caang hna dah hnemtu an si khun?

11 Lazaruh a thih lioah Jesuh a ngaih a chiatmi cu Baibal in kan hmuhmi hnemhnak tampi lakah pakhat lawng a si rih. Mah cu khuaruahhar awk a si lo, zeicatiah “cathiang nih lungsaunak le lungthin ṭhawnnak [hnemhnak, NW] a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu  kanmah cawnpiaknak caah a si.” (Rom 15:4) Nang cu ngaihchiatnak a tongmi na si ahcun a tanglei Baibal caang hna in hnemhnak na hmuh khawh:

  • “Lung a dongmi kha BAWIPA nih a umpi hna i ruahchannak a ngei lomi kha a khamh hna.”—Salm 34:18, 19.

  • “Khuaruahhar vansang au in ka um tikah [Jehovah nih] na ka hnemh i ka lung na ka lawmhter.”—Salm 94:19.

  • “Kannih a kan daw i vel a kan ngeih caah hnangamnak le ruahchannak a ṭhami a kan pe zungzaltu Bawipa Jesuh Khrih le Pathian kan Pa nih cun a ṭhami kha nan tuah ngam nakhnga le nan chim ngam nakhnga ralṭhatnak in pe ko hna seh.”—2 Thes. 2:16, 17. *

Khrihfabu cu Hnemhnak Hmuhnak Hram a Si

12. Midang kha zeitindah kan hnemh khawh hna?

12 A ngaih a chiami hna nih Khrihfabu zongin hnemhnak an hmuh khawh. (1 Thesalon 5:11 rel.) ‘Lungthin ngaihchiami’ hna kha zeitindah tha na pek khawh hna i na hnemh khawh hna? (Ptb. 17:22) “Dai tein um caan a um, chim caan a um” ti kha i cinken. (Pct. 3:7) A ngaih a chiami hna nih an intuarnak le an ruahnak kha an phuan a hau tiah nuhmei a simi Dalene nih a ti. Cucaah an bia tan loin ngaihpiak cu a biapi bikmi a si. A ṭapa amah tein aa thatmi Junia nih hitin a chim: “An ngaihchiatnak kha a dihlak in cun na hngalthiam lai lo nain an intuarnak hngalhthiam duhnak ngeih cu a biapi.”

13. Ngaihchiatnak he aa tlaiin zeidah kan i cinken awk a si?

13 Kan dihlak in kan ngaihchiatnak le kan intuarnak langhterning cu aa lo lai lo ti kha i cinken a hau. Zeitluk in dah kan lung a fah ti kha kanmah lawng nih kan hngalh i kan kaa in kan phuang kho lo. Baibal nih hitin a ti: “Na lunglawmhnak cu nangmah tate a si, na ngaihchiatnak zong nangmah tate a si, Ahohmanh na hrawm kho hna lai lo.” (Ptb. 14:10) Pakhatkhat nih a intuarnak a chim hmanhah a chim duhnak kha midang nih an hngalthiam zungzal lai lo.

14. A ngaih a chiami hna hnemh awkah zei bia dah kan chim khawh?

14 A ngaih a chiami pakhat sinah zeidah ka chim lai ti kan hngalh lo caan a um kho. Asinain “mifim mi bia nih cun hma kha a damter” tiah Baibal nih a ti. (Ptb. 12:18) Mi tampi nih Na Dawtmi Pakhatkhat Nih Aan Thihtak Tikah timi  brochure in hnemhnak an hmu. * Asinain na tuah khawhmi lakah bawmtu a si bikmi cu ‘a ṭapmi sinah va ṭah ve’ kha a si. (Rom 12:15) A vapa nih a thihtakmi Gaby nih ka intuarnak kha ṭahnak in ka langhter tawn tiah a ti. Cun hitin a ti chap: “Ka hawile nih an ka ṭahpi tikah hnemhnak ka hmu. Keimah lawng a ngaih a chiami ka si lo tiah ka ruah.”

15. Midang hnemh kan i harh tikah zeidah kan tuah khawh? (“ Hnemhnak A Pemi Bia” timi rinli kulh zong zoh.)

15 Hnemhnak bia chim naa harh ahcun ca tawite ṭial in kuat ah naa fawih deuh men lai. Hnemhnak a pemi Baibal caang pakhat, a thimi nih a ngeihmi ziaza ṭha pakhat asiloah a nuammi hmuhtonnak nan ngeihmi pakhat kha na ṭial khawh. “Hnemhnak ca tawite pakhat ka hmuhmi asiloah unau pawl nih anmah he caan hmanṭi awkah an ka sawmmi cu ka caah bawmtu taktak a si. Mah nih an ka dawt i an ka zohkhenh ti kha a ka hngalhter” tiah Junia nih a ti.

16. Midang hnemhnak ah hmual a ngei tukmi lam pakhat cu zeidah a si?

16 Thlacamnak zongin a ngaih a chiami unau pawl kha kan bawmh khawh hna. An caah thla kan campiak khawh hna asiloah anmah he hmanh kan camṭi khawh. Ngaihchiat lioah thlacam cu a har ko lai nain mitthli tlak bu le awther buin lungtak tein thlacamnak nih hnemhnak a pek khawh hna. Dalene  nih hitin a chim: “Unaunu pawl cu keimah hnemh awk i an rat tikah thlacampiak awkah ka fial hna. Thlacam an thawkka ahcun an i harh pah ko nain tlawmpal ahcun an awcawi a vun i biatak deuh i lungthin dihlak in an cam. A fekmi an zumhnak, an dawtnak le an ka siaherhmi nih ka zumhnak a fehter tuk.”

Hnem Zungzal Hna

17-19. A ngaih a chiami hna kha zeicah hnemhnak kan pek zungzal hna awk a si?

17 Zei can tiang dah an ngaih a chiat ti cu pakhat le pakhat an i lo cio lo. Cucaah a hramthawk i hawikom le rualchan pawl nih an umpi caan hna lawngah si loin a hnu zongah va leng ṭhan lengmang hna. “Hawikom nih cun zeitik paohah dawt zungzal a si, ulenau cu harnak i hrawm awkah hrin kan si.” (Ptb. 17:17) A ngaih a chia i a kan herhmi hna kha kan hnemh hna awk a si.—1 Thesalon 3:7 rel.

18 A ngaih a chiami hna cu ni hleikhun, hla pakhatkhat, hmanthlak, tuahsernak, rim, aw asiloah caan khatkhat ti bantuk ruangah a thar in an ngaih a chia ṭhan kho. Nuhmei asiloah pahmei a simi hna cu an innchunghawi nih an thihtak hna hnuin a voikhatnak civui le Ruahnolhnak ti bantuk i an i pumh tikah an ngaih a chia tuk ko lai. Unaupa pakhat nih hitin a chim: “Kan i umnak camtuak a phanh hmasa bik ni cu ka ngaih a chia tuk lai i ka caah a har tuk lai tiah ka ruah. Asinain mah ni ah keimah te lawng ka si nakhnga lo unau tlawmpal nih hawikomhnak hmete an ka tuahpiak.”

19 Ngaihchiatnak a tongmi hna nih a hleikhunmi caan lawngah thapeknak an herh lo ti kha i cinken. “A hleikhunmi caan lawngah si loin nidang zongah bawmhnak le hawikomhnak nih ṭhatnak a chuahter khawh. Cu bantuk caan cu a sunglawi tuk i hnemhnak tampi a chuahter” tiah Junia nih a chim. An ngaihchiatnak le an lilennak kha kan hlo kho dih lai lo nain cutin tuahnak nih hnemhnak a hmuhter khawh hna. (1 Johan 3:18) “Dawtnak a ngeimi Khrihfa upa hna nih harnak ka ton caan ah an ka hnemh caah Jehovah cungah kaa lawm tuk. Jehovah bawmhnak kha an ka hmuhter” tiah Gaby nih a ti.

20. Jehovah biakam cu zeicah hnemhnak hrampi a si?

20 Zeizong vialte ah a kan hnemtu Jehovah nih thawhṭhannak caan ah ngaihchiatnak vialte a hloh dih lai ti hngalh cu hnemhnak taktak a si. (Johan 5:28, 29) Pathian nih hitin bia a kan kamh: “BAWIPA nih thihnak cu zungzal ca in a hrawh lai. Mi vialte cu an mitthli a hnawh hna lai i a miphun nih vawleicung khuazakip ah zomhtaihnak an inmi kha a lakpiak hna lai.” (Isa. 25:8) Mah tikah cun ‘a ṭapmi sinah ṭah ve’ si ti loin ‘aa lawmmi sinah i lawmh ve’ a si cang lai.—Rom 12:15.

^ cat. 3 2 Korin 1:3, 4 (NW): “Kan Bawipa Jesuh Khrih i a Pa le a Pathian, zaangfahnak in a khatmi kan Pa, zeizong vialte ah a kan hnemtu Pathian cu lawm u sih! Harnak kan innak kip ah a kan hnemh caah kannih zong nih harnak a phunphun in a ingmi kha kan hnemh khawh ve hna i kan hnemh hnanak cun Pathian sinin hnemhnak kan hmuhmi kha kan hman.”

^ cat. 8 Jesuh kum 12 a si lioah Josef a nung rih ti kha Baibal nih a langhter. Asinain Jesuh nih a hmasa bik khuaruahhar thil a tuah lio, ti kha misur zu in a thlen lioah Josef kong kha a langhter ti lo i a hnu zongah a langhter ti lo. Mah lioah Josef cu a thi cang i a si men lai. Mah lengah Jesuh nih tung cung i thlai a si lioah lamkaltu Johan kha a nu zohkhenh dingin a fial, Josef a nun rih a si ahcun Jesuh nih cutin a tuah lai lo.—Johan 19:26, 27.

^ cat. 11 A dang hnemhnak a pemi Baibal caang hna cu Salm 20:1, 2; 31:7; 38:8, 9, 15; 55:22; 121:1, 2; Isaiah 57:15; 66:13; Filipi 4:13 le 1 Peter 5:7 an si.

^ cat. 14 2010, November 1, Vennak Innsang i “Thihnak a Tongmi kha Jesuh nih a Hnemh hna bantukin Hnem ve Hna” timi capar zongah zoh.