A ummi cazin ah kal

A ummi cazin ah kal

 CAWN AWK CAPAR 12

Midang Intuarnak Cungah Siaherhnak Langhter

Midang Intuarnak Cungah Siaherhnak Langhter

“Pakhat le pakhat i zaangfah u.”—1 PET. 3:8.

HLA 90 Pakhat le Pakhat Thazaang I Pe U

LANGHTERNAK *

1. 1 Peter 3:8 ningin kan intuarnak cungah siaherhnak a ngeimi le kan ca ṭhatnak a duhmi he kan umṭi tikah zeicah kan i nuamh?

KAN intuarnak cungah siaherhnak a ngeimi le kan ca ṭhatnak a duhmi hna he kan umṭi tikah kan i nuam tuk. Kan ruahnak le kan intuarnak kha hngalhthiam awkah kan dirhmun ah an i umter. Kan herhmi kha an hngalh i bawmhnak kan hal hna hlan hmanhin an kan bawmh. Kan cungah ‘zaangfahnak’ * a ngeimi hna kha kan sunsak tuk hna.—1 Peter 3:8 rel.

2. Zaangfahnak langhter awkah zeicah kan i zuam a herh?

2 Khrihfa hna nih zawnruahnak asiloah zaangfahnak langhter kha kan duh. Asinain cutin tuah zungzal cu a fawi lo. Zeicah? Pakhatnak ah, kannih cu mitlinglo kan si. (Rom 3:23) Cucaah kan i chuahpimi mah zawn lawng ruahnak lungput kha fakpi in kan doh a hau. Kan ṭhan ning le hnulei kan sining ruang zongah zaangfahnak langhter awkah fakpi in kan i zuam a hau men lai. Pahnihnak ah, kan pawngkam mi hna lungput nih a kan iap khawh. Hi donghnak caan ah mi tampi nih midang intuarnak kha zei ah an rel lo. Mah canah annih cu “anmah zawn lawng aa ruatmi” an si. (2 Tim. 3:1, 2) Midang intuarnak cungah siaherhnak langhter dingin a hartermi mah zuamcawhnak hna tei awkah zeinihdah a kan bawmh khawh?

3. (a) Zeitindah zaangfahnak tam deuh kan ngeih khawh? (b) Hi capar ah zei kong dah kan i ruah hna lai?

3 Jehovah Pathian le a Fapa, Jesuh Khrih kha kan i zohchunh hna ahcun zaangfahnak tam deuh kan ngei lai. Jehovah Pathian cu dawtnak a si i midang cung siaherhnak langhternak ah zohchunh awk a ṭha bikmi a si. (1 Johan 4:8) Jesuh nih a Pa sining kha tling tein aa zohchunh. (Johan 14:9) Vawleicung a um lioah minung nih zeitindah zaangfahnak langhter khawh a  si ti kha a kan hmuhsak. Hi capar ah Jehovah le Jesuh nih midang intuarnak cungah siaherhnak an langhter ning kong kha kan i ruah hmasa lai. Cun kan i zohchunh khawh hna ning kong zong kan i ruah lai.

Jehovah nih Midang cungah Siaherhnak a Langhter Ning

4. Jehovah cu a salle intuarnak cungah siaherhnak a ngei ti kha Isaiah 63:7-9 nih zeitindah a langhter?

4 Jehovah cu a salle intuarnak cungah siaherhnak a ngei ti kha Baibal nih a kan cawnpiak. Tahchunhnak ah, hlanlio Israel mi nih harnak a phunphun an ton tikah Jehovah cu zeitindah a um ti kha ruathmanh. “Harnak an ton chung vialte Pathian cu a lung a fak” tiah Baibal nih a ti. (Isaiah 63:7-9, NW rel.) A hnuah profet Zekhariah hmangin Jehovah nih a miphun pawl a ding loin pehtlaih an si tikah amah an pehtlaihmi bantukin a rak chim. Jehovah nih a salle kha hitin a ti hna: “Nanmah aan tawngtu hna cu keimah ka mit falai a tawngmi an si.” (Zek. 2:8, NW) Jehovah nih a miphun cungah siaherhnak a langhter ning cu thazaang petu taktak a si.

Jehovah nih Israel miphun kha Izipt ram i saltannak in a luatter hna (Catlangbu 5 zoh)

5. Jehovah nih harnak a tongmi a salle a bawmh hna ning kha tahchunhnak pe.

5 Jehovah nih harnak a tongmi a salle cungah zaangfahnak a ngeih lawng si loin mahnak tam deuh a rak tuah. Anmah bawmh awkah a rak tuah colh. Tahchunhnak ah, Israel mi pawl Izipt ram i sal an tan lioah an harnak le an intuarnak kha a hngalhthiam, mah nih anmah kha bawmh awkah a forh. Jehovah nih Moses kha hitin a ti: “Zeitluk in dah ka mi hna nih . . .  temh innak an huah ti kha fiang tein ka hmuh cang . . . bawmhnak hal in an ainak kha ka theih. An nganfahnak cu ka hngalh dih cikcek. Izipt mi hna sinin chanh . . . awkah ka rung ṭum cang.” (Ex. 3:7, 8) Jehovah nih a miphun cungah zaangfahnak a ngeih caah saltannak in a luatter hna. Kumzabu tampi a rauh hnu, Biakammi Ram ah Israel mi cu an ral nih an rak doh hna. Jehovah nih zeitindah  a lehrulh? “Annih kha a hremtu hna le vansang au in a tuahtu hna ruang i an hrum-ainak nih khan BAWIPA cu an cungah vel a ngeihter.” Atu zongah zaangfahnak nih a miphun bawmh awkah Jehovah kha a forh ṭhan. Israel mi kha an ral pawl kut in khamh awkah biaceihtu tampi a thlah hna.—Biac. 2:16, 18.

6. Jehovah nih a ruahnak a palhmi pakhat intuarnak cungah siaherhnak a langhter ning kha tahchunhnak pe.

6 Jehovah nih a miphun pawl ruahnak cu a palh hmanhah an intuarnak cungah siaherhnak a langhter. Jonah kong hi ruathmanh. Pathian nih Nineveh khua ah biaceihnak kong thanh dingin a thlah. An i ngaihchih tikah Pathian nih a rak hrawk ṭhan hna lo. Asinain Jonah cu Pathian biakhiahnak ruangah aa nuam lo. Nineveh khua a rawk lai tiah a chimchungmi a tlin lo caah “Jonah cu a lung a si hrimhrim lo i a thin a hung.” Asinain Jehovah cu Jonah cungah a lung a sau i a ruahnak kha thlen awkah a rak bawmh. (Jonah 3:10–4:11) A hnuah Jehovah nih a cawnpiakmi kha Jonah nih a hngalhthiam. Cucaah mah kong kha kan caah ṭial ding hmanhin Jonah kha Jehovah nih a rak hman.—Rom 15:4. *

7. Jehovah nih a salle a pehtlaih hna ning nih zeidah a kan zumhter?

7 A miphun a pehtlaih hna ning nih Jehovah cu a salle cungah zaangfahnak a ngeimi a si kha a kan zumhter. Pakhat cio nih kan tonmi fahnak le harnak kha a hngalh. Jehovah nih ‘minung lungthin cu a hngalh.’ (2 Chan. 6:30) Jehovah nih kan ruahnak, kan intuarnak le ri kan ngeihnak kha a hngalh. Cucaah ‘kan inkhawh leng tiangin tukforhnak cu kan cungah a tlunter lai lo.’ (1 Kor. 10:13) Mah biakam cu zeitluk in dah hnemtu a si.

Jesuh nih Midang cungah Siaherhnak a Langhter Ning

8-10. Zeinihdah Jesuh kha midang cungah siaherhnak ngeih awkah a bawmh?

8 Vawleicung a um lioah Jesuh cu midang cungah siaherhnak taktak a ngei. Midang cungah siaherhnak ngeih awkah Jesuh a bawmmi a kong pathum a um. Pakhatnak, a hmasa ah langhter a si bantukin Jesuh nih vancung a Pa sining kha tling tein aa zohchunh. A Pa bantukin Jesuh nih mi kha a dawt hna. Jehovah thil sermi bawmhnak ah aa nuam ko nain a hleiin Jesuh ‘aa nuamhnak cu minung hna chungah khan a si.’ (Ptb. 8:31) Dawtnak nih Jesuh kha midang intuarnak cungah siaherhnak ngeih dingin a forh.

9 Pahnihnak, Jehovah bantukin Jesuh nih lungthin kha a hngalh khawh. Minung lungthin le intuarnak kha a hngalh khawh. (Matt. 9:4; Johan 13:10, 11) Cucaah Jesuh nih mi pawl an ngaih a chiat tukmi kha a hmuh tikah an cungah siaherhnak a ngei i a hnemh hna.—Isa. 61:1, 2; Luka 4:17-21.

10 Pathumnak, Jesuh theng nih minung tonmi zuamcawhnak cheukhat kha a ton ve. Tahchunhnak ah, Jesuh cu sifakmi chungkhar in a ṭhangmi a si. Cawmtu a pa Josef he rian an ṭuanṭi caah pumsalei rianṭuan cu zeitluk in dah a har ti kha a hngalh. (Matt. 13:55; Mar. 6:3) Josef cu Jesuh phungchimnak rian a dongh lai te ah thih dawh a si. Cucaah dawtmi pakhat nih thihtak cu zeitluk in dah a fah ti kha Jesuh nih a hngalh. Cun Jesuh nih zumhnak aa khat lomi rualchan ngeih cu zeidah a lawh ti kha a hngalh. (Johan 7:5) Mah thil sining hna le a dang thil sining hna nih Jesuh kha minung nih an tonmi zuamcawhnak le intuarnak hna hngalhthiam awkah a bawmh.

Jesuh nih a hna a chet i a holh kho lomi pa kha mibu sinin lamhla nawn ah a kalpi i a damter (Catlangbu 11 zoh)

11. Zeitik ah dah Jesuh siaherhnak kha a hleiin kan hmuh? Fianter. (A phaw hmanthlak zoh.)

11 Jesuh siaherhnak kha a hleiin khuaruahhar  thil a tuah lioah hmuh khawh a si. Jesuh nih khuaruahhar thil kha tuah a hauh ca men ah a tuahmi a si lo. Harnak a tongmi hna kha ‘a zaangfah’ hna caah a si. (Matt. 20:29-34; Mar. 1:40-42) Tahchunhnak ah, a hna a chet i a holh kho lomi pa kha mibu sinin lamhla nawn ah a kalpi i a damter lio asiloah nuhmeinu fapa ngeihchunte a thawhter lioah Jesuh cu zeitindah a um lai ti kha na mitthlam ah cuanter hmanh. (Mar. 7:32-35; Luka 7:12-15) Jesuh cu mah mi hna cungah zaangfahnak a ngei i anmah kha bawmh a duh hna.

12. Jesuh nih Martha le Mary cungah zaangfahnak a ngeih kha Johan 11:32-35 nih zeitindah a langhter?

12 Jesuh nih Martha le Mary cungah zaangfahnak a langhter. An ṭapa Lazaruh a thih lioah an ngaih a chiatmi kha a hmuh tikah “Jesuh cu a ṭap.” (Johan 11:32-35 rel.) A hawikom ṭha a thih ca men ah a ṭahmi a si lo. Lazaruh cu ka thawhter ṭhan lai ti kha a hngalh. Mah canah a dawtmi a hawile zeitluk in dah an ngaih a chiat ti kha a hngalh caah a ṭahmi a si.

13. Jesuh cu mi cungah zaangfahnak a ngei ti hngalh cu zeicah thazaang petu a si?

13 Jesuh cu mi cungah zaangfahnak a ngei ti hngalhnak nih thazaang a kan ngeihter. Kannih cu Jesuh bantukin mitling kan si lo ti cu a hmaan ko. Asinain midang kha zaangfahnak he a pehtlaih hna caah Jesuh kha kan dawt. (1 Pet. 1:8) Atu ah Pathian Pennak Siangpahrang in a uk cang ti hngalhnak nih thazaang a kan ngeihter. A rauhhlan ah sifah harnak vialte a donghter cang lai. Jesuh cu minung pakhat in vawlei ah a nung balmi a si caah Satan uknak nih a chuahtermi harnak le fahnak in kan luat nakhnga bawmtu ṭha bik a si. ‘Kan santlaihlonak ah kan cung i zaangfahnak a ngei khomi’ Uktu kan ngeihmi cu thluachuah taktak a si.—Heb. 2:17, 18; 4:15, 16.

Jehovah le Jesuh an Nunning kha i Zohchunh

14. Efesa 5:1, 2 ningin kan intuarnak nih zei tuah awk ah dah a kan forh?

14 Jehovah le Jesuh an nunning kong kan ruah tikah mah nih zaangfahnak tam deuh langhter awkah a kan forh. (Efesa 5:1, 2 rel.) Anmah bantukin lungthin kha kan hngal kho lo. Asinain midang intuarnak le herhbaunak kha hngalhthiam awkah kan i zuam. (2 Kor. 11:29) Hi vawlei i mah zawn lawng aa ruatmi hna he i lo loin ‘midang duhning kha hmuhthiam kan i zuam i kanmah duhnak lawng kha ka ruat lo.’—Fil. 2:4.

(Catlangbu 15-19 zoh) *

15. Ahote nih dah a hleiin zaangfahnak an langhter a herh?

15 Khrihfa upa hna nih a hleiin zaangfahnak an langhter a hau. Jehovah tuu pawl zohkhenh awkah rian an ngei. (Heb. 13:17) Unau pawl bawmh awkah Khrihfa upa hna nih zaangfahnak an ngeih a hau. Khrihfa upa hna nih zaangfahnak kha zeitindah an langhter khawh?

16. Zaangfahnak a ngeimi Khrihfa upa nih zeidah a tuah, mah cu zeicah a biapit?

16 Zaangfahnak a ngeimi Khrihfa upa cu unau pawl he caan a hmangṭi. Bia a hal hna i an chimmi kha lungthin a pek i lungsau tein a ngaihpiak hna. Mah cu a hleiin tuu pakhat nih a ruahnak le a intuarnak chim a duh nain chim awkah aa harh tikah a biapi tuk. (Ptb. 20:5) Khrihfa upa pakhat nih unau pawl he lungtho tein caan a hmanṭi tikah an karlak ah zumhnak, hawikomhnak le dawtnak a um deuh.—Lam. 20:37.

17. Khrihfa upa nih an ngeihmi ziaza lakah unau tampi nih zeidah an duh bik? Tahchunhnak pe.

17 Unau tampi nih zaangfahnak cu Khrihfa upa ngeihmi ziaza lakah kan duh bikmi a si tiah an ti. Zeicah? Adelaide nih “a kan hngalhthiam ti hngalhnak nih anmah he biaruah kha  a fawiter deuh” tiah a ti. Cun hitin a ti chap: “Anmah he bia nan i ruah tikah an in lehrulh ningin na cungah zawnruahnak an ngeih kha na hngalh khawh.” Unaupa pakhat nih aa lawmhnak kha hitin a chim: “Khrihfa upa pakhat kha ka kong ka chimh tikah a mitthli a haa dihmi kha ka hmuh. Mah kha ka lungthin ah a cam peng.”—Rom 12:15.

18. Midang cungah zaangfahnak kha zeitindah kan langhter khawh?

18 Zaangfahnak kha Khrihfa upa lawng nih an langhter dingmi a si lo. Kan dihlak in mah ziaza kha kan langhter khawh. Zeitin in dah? Chungkhar mi le unau pawl nih an tonmi harnak hna kha hngalhthiam awkah i zuam. Khrihfabu i kumhra fai, kum upa, a zawmi le dawtmi nih thihtaknak a tongmi hna cungah siaherhnak langhter. Zeidah an lawh ti kha hal hna. An intuarnak kong an chim tikah ṭha tein ngaihpiak hna. An sining na hngalhthiam taktak kha langhter. Na tuah khawhmi zei lam paoh in bawm hna. Cutin kan tuah tikah dawtnak taktak kan langhtermi a si.—1 Johan 3:18.

19. Midang bawmh dingin kan i zuam tikah zeicah a tlarimi kan si a herh?

19 Midang bawmh awkah kan i zuam tikah a tlarimi kan si a hau. Zeicah? Mi nih harnak kha lam a phunphun in an lehrulh caah a si. Mi cheukhat nih cun an tonmi buaibainak kong kha chim an duh lo. Cucaah bawmh kan duh hna hmanhah an ning a zahter khomi biahalnak kha kan hal hna awk a si lo. (1 Thes. 4:11) Midang nih an intuarnak kong a kan chimh tik hmanhah an chimmi kha a zungzal in cun kan cohlang men lai lo. Asinain mah cu anmah intuarmi a si ti kha kan hngalh a hau. Bia theih duhnak ah a khul a rangmi le biachimnak ah a khul a nuarmi kan si a hau.—Matt. 7:1; Jeim 1:19.

20. A hnu capar ah zei kong dah kan i ruah hna lai?

20 Khrihfabu lawngah si loin phungchimnak zongah zaangfahnak langhter kan duh. Zultu siternak rian ah zeitindah zaangfahnak kan langhter khawh? Mah kong kha a hnu capar ah kan i ruah hna lai.

HLA 130 I Ngaithiam U

^ cat. 5 Jehovah le Jesuh cu midang intuarnak cungah siaherhnak an ngei. Hi capar ah an sinin kan cawn khawhmi kong kan i ruah hna lai. Cun zeicah zaangfahnak kan langhter a herh ti le zeitindah kan langhter khawh timi kong zong kan i ruah hna lai.

^ cat. 1 BIAFANG FIANTERNAK: ‘Zaangfahnak’ langhter timi cu midang intuarnak hngalhthiam awkah i zuam le an intuar ningin tuar ve kha a chim duhmi a si. (Rom 12:15) Hi capar chung i ‘zaangfahnak’ le “siaherhnak” cu a sullam aa khat.

^ cat. 6 Jehovah nih a lung a dongmi asiloah ṭihnak a ngeimi zumhfekmi pakhat cio cung zongah zaangfahnak a rak langhter. Hannah (1 Sam. 1:10-20), Elijah (1 Si. 19:1-18) le Ebed-melek (Jer. 38:7-13; 39:15-18) kong kha ruat.

^ cat. 65 HMANTHLAK FIANTERNAK: Biakinn ah i pumhnak nih zaangfahnak langhter khawhnak caanṭha tampi a kan pek. (1) Khrihfa upa pakhat nih mino thawngthanhtu le a nu kha nem tein bia a ruah hna, (2) Pafa hna nih kum upa unaunu kha mawṭaw pawng tiang an thlah, (3) Khrihfa upa pahnih nih lamhruainak a kawlmi unaunu pakhat kha lungthin pe in a bia an ngaihpiak.