A ummi cazin ah kal

A ummi cazin ah kal

Zeizong Vialte a Ngei dihmi Pakhat kha Zeidah Kan Pek Khawh?

Zeizong Vialte a Ngei dihmi Pakhat kha Zeidah Kan Pek Khawh?

“Kan Pathian nangmah cu kan in lawmh i a sunglawimi na min cu kan thangṭhat.”—1 CHAN. 29:13.

HLA: 1, 50

1, 2. Jehovah nih kan cungah zeitindah siannak a langhter?

JEHOVAH cu a siang tukmi Pathian a si. Kan ngeihmi thil vialte hi amah sinin kan hmuhmi a si. Vawleicung i thil mansung vialte hi amah ta an si dih i thilnung pawl bawmhnak caah a hman. (Salm 104:13-15; Hag. 2:8) Jehovah nih a caan ah a sunglawi tukmi mah thil hna kha a mi pawl bawmhnak caah khuaruahhar lam in a hman ning kha Baibal in kan hngalh khawh.

2 Tahchunhnak ah, Jehovah nih Israel mi kha thetse ram i kum 40 chung an um lioah manna changreu le ti a pek hna. (Ex. 16:35) Cucaah Israel mi nih an herhmi paoh cu an rak ngei. (Neh. 9:20, 21) A hnuah Jehovah nih profet Elisha kha zumhfekmi nuhmeinu nih a ngeihmi chiti tlawmte kha karhter khawhnak ṭhawnnak a pek. Pathian sinin a hmuhmi mah laksawng nih a leiba pawl cham dih awk le a fapale he  khua an sak khawh nakhnga a za in tangka ngeih awkah a bawmh. (2 Si. 4:1-7) Jehovah bawmhnak thawngin Jesuh nih khuaruahhar lam in rawl a dangh hna i a herh tikah tangka hmanh a pek hna.—Matt. 15:35-38; 17:27.

3. Hi capar ah zei kong dah kan i ruah hna lai?

3 Jehovah nih a thil sermi pawl bawmh awkah zeipaoh a hman khawh. Asinain a bupi rian bawmh awkah an ti khawh tawkin pek awkah a salle kha a sawm hna. (Ex. 36:3-7; Phungthlukbia 3:9 rel.) Jehovah nih kan chawva kha a sinah pek ṭhan dingin zeicah aa ruahchan? Baibal chan i Jehovah salle nih a rian kha zeitindah an bawmh? Tuchan ah bupi nih thawhlawm kha zeitindah a hman? Mah biahalnak hna a phi kha hi capar ah kan hmuh lai.

Jehovah Sinah Kan Peknak A Ruang

4. Jehovah rian kan bawmh kha zeitindah kan langhter khawh?

Jehovah kha kan dawt caah kan pekmi a si

4 Jehovah kan dawt ca le kan caah a tuahmi thil ruang i kan i lawmh caah kan pekmi a si. Jehovah nih kan caah a tuahmi thil vialte kan ruah tikah kan lung a kan suk tuk. Siangpahrang David nih biakinn sak a herhnak kong a fianter lioah cutin a rak intuar. David nih zeizong vialte hi Jehovah sinin kan hmuhmi an si i kan pekmi thil vialte zong hi amah nih a kan pekciami lawngte an si ko tiah a ti.—1 Chanrelnak 29:11-14 rel.

5. Mahca ṭhatnak hlawt in peknak cu a hmaanmi biaknak ah a biapi tukmi a si ti kha Baibal nih zeitindah a kan cawnpiak?

5 Jehovah sinah kan peknak a ruang pakhat cu amah biaknak lam phunkhat a si caah a si. Lamkaltu Johan nih langhnak ah vancung ah Jehovah salle nih hitin an chimmi kha a theih: “Kan Bawipa le kan Pathian, nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i nangmah duhnak bangin annih cu ser an si i nunnak an ngei.” (Biat. 4:11) Jehovah cu thangṭhatnak le sunparnak vialte hmuh awkah aa tlakmi a si caah a ṭha bikmi pek kan duh. Jehovah nih Moses sinin Israel mi kha kumkhat ah voithum puai tuah dingin nawl a pek hna. Mah puai i Jehovah biaknak ah Jehovah sin peknak zong aa tel. Israel mi cu ‘BAWIPA hmaiah kut ro in nan chuak lai lo’ tiah nawl pek an si. (Deut. 16:16) Tuchan kan biaknak zongah mahca ṭhatnak hlawt in peknak cu a biapi tukmi a si ve. Cuticun Jehovah bupi rianṭuannak kan sunsak le kan bawmh kha kan langhter khawh.

6. Peknak cu kan caah zeicah a ṭhat? (A hramthawknak hmanthlak zoh.)

6 Hmuhnak lawng si loin siang ngaiin peknak cu kan caah a ṭhami a si. (Lamkaltu 20:35 rel.) A nu le a pa nih phaisa tlawmpal an ṭhenhmi kha anmah laksawng cawkpiaknak caah a hmangmi ngakchia pakhat khi na mitthlam ah cuanter hmanh. A nu le a pa nih mah laksawng kha zeitluk in dah an sunsak lai. Asiloah a nu le a pa sinah a ummi mino hmaikal pakhat nih inn ca i a herhmi caah tiin tangka tlawmpal a pek hna hei ti u sih. A nu le a pa nih cutin a tuah lai kha an i ruahchan lai lo nain a laksawng kha an cohlan.  Zeicah? Mah cu a caah an rak tuahpiakmi thil vialte a sunsaknak a langhtermi a si caah a si. Cu bantukin kan chawva kan pek tikah kan pekmi cu kan caah a ṭha ti kha Jehovah nih a hngalh.

Hlanlio Pathian Salle Nih An Pekning

7, 8. (a) Baibal chan i Jehovah miphun nih cuset khaset tiin thawhlawm peknak ah zeitindah zohchunh awk ṭha an chiah? (b) Baibal chan i Jehovah miphun nih Jehovah rian bawmhnak caah thawhlawm peknak ah zeitindah zohchunh awk ṭha an chiah?

7 Jehovah miphun nih Jehovah rian bawmhnak caah thawhlawm an pek ti kha Baibal in kan hngalh. A caan ah cun cuset khaset caah tiin an pek. Tahchunhnak ah, Moses nih puan biakinn saknak caah thawhlawm pek dingin Israel mi kha a forh hna. A hnuah Siangpahrang David nih biakinn saknak caah cutin a rak forh ve hna. (Ex. 35:5; 1 Chan. 29:5-9) Siangpahrang Jehoash nih a uk lioah Israel mi nih an pekmi tangka kha hmangin tlangbawi pawl nih biakinn an remh. (2 Si. 12:4, 5) Kumzabu pakhatnak ah Khrihfa hna nih Judia ram ah mangṭam a tlun caah unau pawl cu bawmh an herh ti kha an hngalh. Cucaah Khrihfa pakhat kip cio nih cuka i unau pawl kha an si khawh tawkin bawmh awkah bia an khiah.—Lam. 11:27-30.

8 A dang thil sining zongah Jehovah miphun nih Jehovah rian ah hruaitu a simi hna sinah tangkalei bawmhnak an pek. Tahchunhnak ah, Moses Nawlbia ah Levi mi hna cu a dang miphun bantukin ro an ngei lo. Cucaah a dang Israel miphun pawl nih Levi mi hna sinah an ngeihmi cheuhra cheukhat kha an pek. Mah nih Levi mi kha puan biakinn i an rian ṭha tein ṭuan khawh awkah a bawmh hna. (Nam. 18:21) Cu bantukin siannak a langhtermi nu pawl zong nih Jesuh le a lamkaltu pawl bawmhnak caah an ngeihmi thil kha an rak hman ve.—Luka 8:1-3.

Mirum he, misifak he ahopaoh nih an pek khawh

9. Hlanlio chan ah thawhlawm cu khoika in dah an hmuh?

9 Thawhlawm cu hmun dangdang in pekmi an si. Puan biakinn saknak caah thawhlawm a pemi Israel mi hna nih Izipt ram in an rak i phorhmi chawva pawl an pek men ko lai. (Ex. 3:21, 22; 35:22-24) Kumzabu pakhatnak i Khrihfa cheukhat nih an lei le an inn ti bantuk an ngeihmi thil kha an zuar i lamkaltu pawl sinah tangka an rak put. Lamkaltu pawl nih mah tangka kha a herhmi unau pawl bawmhnak caah an rak hman. (Lam. 4:34, 35) A dang Khrihfa pawl nih Pathian rian bawmhnak caah hmaan tein an tangka kha an khon. (1 Kor. 16:2) Cucaah mirum he, misifak he ahopaoh nih thawhlawm an pek khawh.—Luka 21:1-4.

Tuchan Ah Thawhlawm Kan Pekning

10, 11. (a) Baibal chan i Jehovah salle an siannak kha zeitindah kan i zohchunh khawh? (b) Pennak rian bawmhnak kha zeitindah na hmuh?

10 Tuchan zongah cuset khaset tiin thawhlawm pek awkah forh kan si ve men lai. Nan Khrihfabu ah nan Biakinn remh ṭhan awk asiloah a thar sak awkah timhtuahnak nan ngei men lai. Asiloah nan hmunhma ah a ummi zung ṭengnge cu remh a hau men lai. Civui tuahnak caah a dihmi tangka zong na bawmh khawh men ko lai. Asiloah hmun dang i a ummi unau pawl cu leiser ral an ton  ruangah bawmh an hau men lai. Kan pekmi thawhlawm nih vawleicung pumpi i a ummi missionary, special hmaikal, peng zohkhenhtu, kan zungpi le zung ṭengnge ah a ṭuanmi unau pawl kha a bawmh hna. Vawleicung pumpi ah a ummi Civui tuahnak Inn le Biakinn saknak caah nan Khrihfabu in hmaan tein thawhlawm nan kuat men lai.

11 Kan dihlak in hi donghnak caan chungah Jehovah bupi rianṭuannak bawmhnak caah thil cheukhat kan pek khawh. Thawhlawm tam deuh cu min langhter loin pekmi a si. Biakinn i thawhlawm kuang ah tangka kan thlak tik asiloah jw.org hmangin thawhlawm kan pek tikah zeizat dah kan pek ti kha ahohmanh kan hngalhter hna lo. Asinain thawhlawm na pekmi cu a tlawm tuk tiah na ruah ah tah zeitin? Bupi nih an hmuhmi thawhlawm tam deuh cu mi tlawmte nih tampi in an pekmi nakin mi tampi nih tlawmtete in an pekmi a si. A si a fakmi unau hmanh nih Masidonia i a hmasa Khrihfa hna kha an i zohchunh hna. Annih cu “an si a fak ngaingai” ko nain thawhlawm pek awkah an nawl hna i siang ngaiin an pek.—2 Kor. 8:1-4.

12. Bupi nih thawhlawm kha a ṭha bikmi lam in hman awkah zeitindah aa zuam?

12 Uktu Bu nih thawhlawm kha zumhawktlak te le fim tein an hman. (Matt. 24:45) Uktu Bu chungtel pawl nih a ṭhami biakhiahnak an tuah khawh nakhnga thla an cam i tangka kha ralring tein an hman. (Luka 14:28) Baibal chan ah thawhlawm a zohkhenhmi zumhfekmi pa hna nih Jehovah biaknak ca lawng ah thawhlawm kha ṭha tein an rak hman. Tahchunhnak ah, Ezra Jerusalem i a kir lioah Persia siangpahrang nih a pekmi thawhlawm ah sui, ngun le a dang mansung thil hna an i tel. Mah cu tuchan (U.S) $ nuai 100 leng man a si. Ezra nih mah thawhlawm kha Jehovah sinah pekmi laksawng in a hmuh. Cucaah ral ram hna an rak tan lioah mah kha ṭha tein kilven awkah lamhruainak a pek hna. (Ezra 8:24-34) Kum tampi hnuah lamkaltu Paul nih Judia ram i a chambaumi unau pawl bawmhnak caah tangka a rak kholh hna. Tangka a thawhmi hna kha “kan i tinhmi cu, Bawipa hmuh lawng ah si loin minung mithmuh zongah a dingmi thil tuah kha a si” tiah a ti hna. (2 Korin 8:18-21 rel.) Tuchan ah bupi nih Ezra le Paul kha i zohchun in thawhlawm kha ralring tein an hman.

13. Bupi nih naiah zeicah thlennak cheukhat a tuah?

13 Chungkhar pakhat nih an hmuhmi nakin tangka tam deuh an hman nakhnga lo tangka an hmanning he aa tlaiin thlennak an tuah men lai. Asiloah Jehovah rian tam deuh in an ṭuan khawh nakhnga nunning sawhsawh in nun khawhnak lam an kawl men lai. Jehovah bupi zongah cutin a si ve. Nai hrawngah lungthawh awk ngai a simi ṭuan awk rian thar tampi a um i a caan ahcun an hmuhmi nakin tangka tam deuh a dih tawn. Cucaah bupi nih chungkhar pakhat bantukin tangka khonnak lam asiloah a sawhsawh tein rian ṭuan khawhnak lam kha an kawl, cun siang ngaiin kan pekmi thawhlawm kha thilṭha tampi tuahnak caah an hman.

Kan Pekmi Thawhlawm In Hmuhmi Ṭhatnak

Na pekmi thawhlawm nih vawleicung pumpi rian kha a bawmh (Catlangbu 14-16 zoh)

14-16. (a) Thawhlawm cu zei caah dah hman a si? (b) Mah rian hna nih zeitindah aan bawmh?

14 Biatak chungah kum tampi chung a um cangmi unau tampi nih a hlan nakin atu ah  bupi sinin laksawng tam deuh kan hmu tiah an ti. Atu ah jw.org le JW Broadcasting kan ngei. Holh tampi in Vawlei Thar Lehnak Baibal zong kan ngei cang. 2014/2015 ah nithum chung tuahmi “Pathian Pennak Kha Hmasa Bik Ah Chia U!” timi Ramkomh Civui kha vawleicung pumpi ah a ummi a ngan bikmi lente celhnak hmun 14 ah tuah a si. Mah civui i aa pummi vialte cu an i nuam tuk.

15 Mi tampi nih Jehovah bupi sinin an hmuhmi mah laksawng cung i an i lawmhnak kha an langhter. Tahchunhnak ah, Asia ram i Pathian rian a ṭuanmi nuva tuahkhat nih hitin an ṭial: “Kan ṭuannak cu khua hmete ah a si. Cucaah a dang tein a ummi bantukin a caan ah kan i ruat i Jehovah rian a kauhnak kha kan philh tawn. Asinain JW Broadcasting i program a phunphun kha kan zoh tikah vawleicung pumpi unaurual lakah kan i tel ve ti kha kan hun hngalh ṭhan. Kan umnak hmun i unau pawl cu JW Broadcasting an zoh tikah an lung a cawlcang tuk. Thla fatin JW Broadcasting an zoh dih hnuah Uktu Bu chungtel pawl he kan i naih deuh tiin kan ruah tiah an chimmi kha kan theih tawn. Atu cu Pathian Bupi ah an i telmi kha an i uangthlar tuk.”

16 Vawleicung pumpi i Biakinn 2,500 hrawng cu naiah sakmi asiloah remhmi an si. Honduras i Khrihfabu pakhat ah a ummi unau pawl nih kanmah pumpak in Biakinn ngeih cu kan saduhthah a rak si i atu ahcun kan ngei taktak cang tiah an ti. Hitin an ṭial: “Jehovah i van le vawlei a chungkhar ah le a ṭha tukmi vawleicung pumpi unaurual lakah kan i tel khawh caah kan i lawm tuk.” Unau tampi zong nih Baibal le bupi chuahmi cauk pawl anmah holh in an hmuh tik, leiser ral a tongmi unau pawl an bawmh hna tik asiloah zapi lak phungchimnak in lehrulhnak ṭha hna an hmuh tikah cutin an intuar ve.

17. Jehovah nih tuchan i a bupi a bawmh kha zeitindah kan hngalh khawh?

 17 Jehovah Tehte a si lomi nih mah vialte kha lungtho tein pekmi thawhlawm in kan ṭuanmi a si kha an hngalthiam kho lo. A ngan ngaimi company pakhat ah tlangtlatu a simi pakhat cu cauk kan namnak hmun pakhat ah a va leng. Mah lungtho tein aa pemi hna nih tangka lak loin lungtho tein pekmi thawhlawm hmangin rian vialte an ṭuanmi kha a hmuh tikah a khuaruah a har tuk. Nan ṭuanmi cu a si kho lomi a si tiah a ti. Mah cu kan hna a tla ko. Jehovah bawmhnak lawnglawng in ṭuan khawhmi a si ti kha kan hngalh.—Job 42:2.

Jehovah Sin Peknak In Hmuhmi Thluachuah

18. (a) Pennak rian bawmhnak caah kan pek ahcun zei thluachuah dah kan hmuh lai? (b) Kan fale le mithar pawl kha cutin tuah awkah zeitindah kan cawnpiak khawh hna?

18 Jehovah nih Pennak rian bawmhnak caanṭha a kan pek. Cutin kan bawmh ahcun thluachuah kaan pek hna lai tiah bia aa kam. (Mal. 3:10) Siang ngaiin nan pekṭhenh hna ahcun thluachuah nan hmu lai tiah Jehovah nih bia a kan kamh. (Phungthlukbia 11:24, 25 rel.) “Pek leiah hin hmuh lei nakin lunglawmhnak a um deuh” caah mi kan pek hna ahcun kan i nuam lai ti zongin a ti. (Lam. 20:35) Kan biachim le kan tuahsernak in kan fale le mithar pawl kha Pathian rian caah zeitindah thawhlawm pek khawh a si i thluachuah tampi hmuh khawh a si ti kha kan cawnpiak khawh hna.

19. Hi capar nih zeitindah thazaang aan pek?

19 Kan ngeihmi vialte cu Jehovah sinin a rami an si. A sinah kan pek ṭhan tikah amah kan dawt le kan ca i a tuahmi thil vialte kan sunsak kan langhter a si. (1 Chan. 29:17) Israel mi nih biakinn saknak caah thawhlawm an pek tikah “mi cu an i lawm, zeicahtiah annih nih lungtho tein an pek, lung ṭengnge lo tein, siang tein BAWIPA kha an pek.” (1 Chan. 29:9) Jehovah nih a kan pek ciami thil kan pek ṭhannak thawngin lawmhnak le lungsi hnangamnak kawl zungzal hna u sih.