A ummi cazin ah kal

A ummi cazin ah kal

“BAWIPA cu i Bochan U law Ṭhatnak kha Tuah U”

“BAWIPA cu i Bochan U law Ṭhatnak kha Tuah U”

“BAWIPA cu i bochan u law ṭhatnak kha tuah u.”—SALM 37:3.

HLA: 150, 50

1. Jehovah nih minung kha zei bantuk a hleikhunmi thil ti khawhnak in dah a kan ser?

JEHOVAH nih minung kha a hleikhunmi thil ti khawhnak he a kan ser. Buaibainak tawnghtham awk le hmailei ca i timhtuah awkah a bawmmi khuaruah khawhnak a kan pek. (Ptb. 2:11) Kan i tinhmi kan tuah khawh nakhnga le kan hmuitinh kan phak khawh nakhnga ṭhawnnak a kan pek. (Fil. 2:13) Cun a ṭha le a ṭhalo hngalh khawhnak chiaṭha thleidan khawhnak lungthin zong a kan pek. Kan chiaṭha thleidannak lungthin nih sualnak tuah lo awk le kan palhnak i remh awkah a kan bawmh.—Rom 2:15.

2. Jehovah nih kan thil ti khawhnak kha zeitindah an hman lai tiah aa ruahchan?

2 Jehovah nih kan thil ti khawhnak kha a ṭha bikmi lam in an hman lai tiah aa ruahchan. Zeicah? A kan dawt caah le a kan pekmi laksawng kan hman tikah an i nuam lai ti a hngalh caah a si. Tahchunhnak ah, Hebru Baibal ah hitin kan hmuh: “A  hlankan in ṭha tein thil rak ruahchungnak nih duhdimnak kha a chuahter,” i “na tuahmi cu a ṭhat khawh chungin tuah.”(Ptb. 21:5; Pct. 9:10) Greek Baibal zongah hitin kan hmuh: “A caan kan ngeih fate mi cungah ṭhatnak tuah kha i zuam u si law,” “Pathian sinin nan hmuhmi laksawng kha midang ṭhatnak caah hmang cio u.” (Gal. 6:10; 1 Pet. 4:10) Kanmah le midang ṭhatnak a pe khomi thil kha a si khawh chungin tuah hna seh tiah Jehovah nih a duh ti cu a fiang ko.

3. Minung nih zei bantuk ri dah kan ngeih?

3 Jehovah nih kan thil ti khawhnak kha hmanter a kan duh ko nain ri kan ngeihmi kha a hngalh. Tahchunhnak ah, tlinlonak, sualnak le thihnak kha kan hlo kho lo. (1 Si. 8:46) Cun mikip nih zalong tein thimnak nawl an ngeih caah midang kha kan uk kho hna lo. Hngalhnak le hmuhtonnak zeitluk tam in kan ngeih hmanhah Jehovah he tahchunh ahcun ngakchia bantuk kan si zungzal ko lai.—Isa. 55:9.

Buaibainak nan ton tikah “BAWIPA cu i bochan u law ṭhatnak kha tuah u”

4. Hi capar ah zei kong dah kan i ruah hna lai?

4 Jehovah nih a kan bawmh lai i kan tuah khawh lomi thil kha a kan tuahpiak lai ti zumhnak thawngin Jehovah kha lam kan i hruaiter zungzal awk a si. Asinain buaibainak hna tawnghtham awk le midang bawmh awkah kan tuah khawhmi tuah dingin Jehovah nih aa ruahchan. (Salm 37:3 rel.) ‘BAWIPA i bochan in ṭhatnak kan tuah’ a hau. Cutin zeitindah kan tuah khawh? Jehovah i bochan in aa tlak ningin thil a tuahmi Noah, David le a dang zumhfekmi Pathian salle kong kha i ruah hna u sih. An tuah khawhmi le an tuah khawh lomi thil  kha thleidang in aa tlak ningin thil an tuahmi kha kan hmuh lai.

Ṭhatlonak nih a Kan Kulh tikah

5. Noah sining kong kha chim.

5 Noah chan ah “ṭhatlonak cu khuazakip ah a karh” i ziaza rawhralnak in a khat. (Gen. 6:4, 9-13) Jehovah nih a ṭhalomi vawlei hi a hrawh te lai ti kha Noah nih a hngalh ko nain mi nih an tuahmi thil ruangah a lung a ṭha lo. Mah thil sining ah Noah nih a tuah khawhmi thil a um bantukin a tuah khawh lomi thil zong a um ti kha a hngalh.

Phungchimnak ah ralchanhnak(Catlangbu 6-9 zoh)

6, 7. (a) Noah nih zeidah a tuah khawh lo? (b) Noah sining le kan sining cu zeitindah aa lawh?

6 Noah nih a tuah khawh lomi: Noah nih Jehovah ralrin peknak bia kha zumhawktlak tein a chim ko nain mah bia cohlan awkah mi kha a hnek kho hna lo. Cun buanchukcho a tlun zokzok nakhnga zong a tuah kho lo. Jehovah nih ṭhatlonak ka donghter lai tiah bia aa kammi kha aa tlakmi caan ah a tuah lai tiah Noah nih a zumh.—Gen. 6:17.

7 Kannih zong ṭhatlonak in a khatmi vawlei ah kan nung ve, mah vawlei hi Jehovah nih ka hrawh lai tiah bia aa kammi kha kan hngalh. (1 Johan 2:17) Mah caan chungah “Pennak kong thawngṭha” kha cohlan awkah mi kha kan hnek kho hna lo. Cun “harnak” nganpi tuan deuh in a rak nakhnga zong zeithil hmanh kan tuah kho lo. (Matt. 24:14, 21) Noah bantukin a rauhhlan ah Pathian nih ṭhatlonak vialte a hrawh dih cang lai timi a fekmi zumhnak kan ngeih a hau. (Salm 37:10, 11) Jehovah  nih ṭhatlonak hna hi a herhmi lengin nikhat hmanh umnak nawl a awnh lai lo ti kha kan zumh.—Hab. 2:3.

Noah bantukin a rauhhlan ah Pathian nih ṭhatlonak vialte a hrawh dih cang lai timi a fekmi zumhnak kan ngeih a hau

8. Noah nih zei ah dah a lungthin a pek? (A hramthawknak hmanthlak zoh.)

8 Noah nih a tuah khawhmi: Noah nih a tuah khawh lomi ruangah lungdongh loin a tuah khawhmi tu ah lungthin a pek. Noah nih Jehovah ralrin peknak bia kha zumhfek tein a chim. (2 Pet. 2:5) Mah rian nih a zumhnak feh awkah a bawmh ko lai. Phung a chim lengah lawng sak awkah Jehovah nih lamhruainak a pek ningin a tuah.—Hebru 11:7 rel.

9. Zeitindah Noah kha kan i zohchunh khawh?

9 Noah bantukin “Bawipa rian” kha teima tein kan ṭuan. (1 Kor. 15:58) Tahchunhnak ah, Biakinn le Civui tuahnak Inn saknak asiloah remhnak ah kan i tel men lai, civui ah mah lungtho tein rian kan ṭuan men lai asiloah zung ṭengnge le lamhla ah a ummi calehnak zung ah rian kan ṭuan men lai. A biapi bikmi cu phungchim rian ah kan rian a tammi hi a si, mah nih hmailei ca kan i ruahchannak kha a fehter lai. Zumhfekmi unaunu pakhat nih midang kha Pathian Pennak thluachuah kong ka chimh hna tikah annih cu ruahchannak an ngei lo ti le an tonmi buaibainak cu zungzal ca in an hmuh ti kha ka hun hngalh tiah a ti. Mah unaunu nih a chim bantukin kannih cu ruahchannak kan ngei i midang sinah mah kong kan chim tikah kan zumhnak a fek chin. Mah ruahchannak nih nunnak tlikzuamnak i tlik peng awkah a kan bawmh.—1 Kor. 9:24.

Sualnak kan Tuah tikah

10. David sining kong kha chim.

10 Siangpahrang David cu zumhfekmi pa a si i Jehovah nih a dawt tuk. (Lam. 13:22) Asinain David cu Bath-sheba he sualnak ngan a simi nupa sualnak an tuah. Mah nakin a ṭha lo deuhmi cu a sualnak thuh awkah Bath-sheba a vapa Uriah kha raltuknak ah a thih nakhnga a timhtuah. Uriah a thih nakhnga a timhtuahnak ca kha amah Uriah sinin a kuat hna. (2 Sam. 11:1-21) A donghnak ah, David a sualnak cu mi zapi hngalh a hung si. (Mar. 4:22) Mah tikah David nih zeitindah a lehrulh?

Hlanah rak tuahmi sualnak(Catlangbu 11-14 zoh)

11, 12. (a) David nih sualnak a tuah hnuah zeidah a tuah khawh lo? (b) Kan i ngaihchih ahcun kan caah Jehovah nih zeidah a tuah lai?

11 David nih a tuah khawh lomi: David nih a rak tuahmi thil kha a khirh ṭhan kho ti lo. A sualnak ruangah a chuakmi thil cheukhat kha a nunchung a rak in. (2 Sam. 12:10-12, 14) Cucaah zumhnak a ngeih a hau. Kaa ngaihchih taktak ahcun Jehovah nih a ka ngaihthiam lai i ka tuahsernak ruangah a chuakmi thil kha inkhawh awkah a ka bawmh lai ti kha a zumh a hau.

12 Mitlinglo kan si caah kan dihlak in sualnak kan ngei dih. Asinain palhnak  cheukhat cu a dang nakin an ngan deuh i thil sining cheukhat ahcun kan palhnak kha kan khirh ṭhan kho ti lo. Cucaah kan tuahsernak ruangah a chuakmi fahnak kha kan in a hau. (Gal. 6:7) Asinain kan i ngaihchih ahcun kanmah palhnak ruangah a chuakmi harnak kan ton caan hmanhah Jehovah nih a kan bawmh lai ti kha kan zumh khawh.—Isaiah 1:18, 19; Lamkaltu 3:19 rel.

13. David nih Jehovah he an i pehtlaihnak kha zeitindah a ṭhatter ṭhan?

13 David nih a tuah khawhmi: David nih Jehovah he an i pehtlaihnak kha ṭhatter ṭhan a duh. Zeitindah a rak tuah? David nih Jehovah bawmhnak kha a cohlan. Tahchunhnak ah, profet Nathan sinin Jehovah nih a chimhhrinhmi kha a cohlan. (2 Sam. 12:13) Cun Jehovah sinah thla a cam i a sualnak kha a phuan, cuticun Jehovah mithmai ṭha hmuh a duh ṭhan kha a langhter. (Salm 51:1-17) Ka sual timi ruahnak kha i nenhter loin mah in fimnak aa lak. Cu bantuk a nganmi sualnak kha zeitikhmanh ah a tuah ṭhan ti lo. Kum tampi hnuah zumhfekmi pakhat in a thi. David a zumhfehnak kha Jehovah nih aa cinken.—Heb. 11:32-34.

14. David sinin zeidah kan cawn khawh?

14 David sinin zeidah kan cawn khawh? Sualnak ngan kan tuah sual tikah lungtak tein i ngaihchih, Jehovah sinah kan sualnak phuan le ngaihthiamnak hal a hau. (1 Johan 1:9) Cun Jehovah he kan i pehtlaihnak a ṭhat ṭhan khawh nakhnga Khrihfa upa sinah bawmhnak hal zong a hau. (Jeim 5:14-16 rel.) Jehovah bawmhnak kan cohlan tikah kaan ngaihthiam hna lai timi a biakam kan zumh kan langhter a si. Mah lengah kan palhnak in fimnak kan i lak a hau i zumhnak he Jehovah kan biak zungzal a hau.—Heb. 12:12, 13.

A Dang Thil Sining Ah

Zawtnak(Catlangbu 15 zoh)

15. Hannah sinin zeidah kan cawn khawh?

15 A harmi thil sining ah Jehovah i bochan in an tuah khawhmi thil a tuahmi a dang zumhfekmi Pathian salle kong kha na ruah khawh. Tahchunhnak ah, Hannah cu fa a rak ngei kho lo. Mah thil sining kha a tawngtham kho lo. Asinain Jehovah nih a ka hnemh lai tiah a rak zumh. Cucaah puan biakinn ah Jehovah biak awk le thlacam awkah a kal zungzal i a intuarnak kha a phuan. (1 Sam. 1:9-11) Kan caah zohchunh awk ṭha taktak a si. Kan zawt tik asiloah kan tawnghtham khawh lomi a dang harnak hna kan ton tikah kan lungretheihnak kha Jehovah sinah kan ap i a kan bawmh lai kha kan zumh. (1 Pet. 5:6, 7) Jehovah bupi nih a kan pekmi Khrihfabu pumhnak le a dang a kan timhpiakmi hna in ṭhatnak hmuh awkah kan tuah khawhmi kha kan tuah.—Heb. 10:24, 25.

Hannah nih Jehovah kha aa bochan, cucaah puan biakinn ah Jehovah biak awk le thlacam awkah a kal zungzal

Jehovah a bia ti lomi fale(Catlangbu 16 zoh)

16. Nulepa nih Samuel sinin zeidah an cawn khawh?

16 An fale nih Jehovah a bia ti lomi  zumhfekmi nulepa tah zeitin? Profet Samuel nih a cuza cangmi a fale kha Jehovah cung zumhawktlak tein um awkah a forh kho hna lo. (1 Sam. 8:1-3) Mah thil sining kha Jehovah kut ah a ap. Asinain Samuel nih Jehovah cung zumhawktlak tein um awk le Pathian lungton awkah a tuah khawhmi kha a rak tuah. (Ptb. 27:11) Tuchan i Khrihfa nulepa tampi zong cu bantuk thil sining an tong. Jesuh chimmi fapa tlau bianabia i pa bantukin Jehovah cu sualnak a tuahmi aa ngaichihmi hna kha cohlan awkah timhcia tein a um zungzal ti kha nulepa hna nih an zumh. Mah caan chungah an tuahsernak nih an fale kha Jehovah sin kir ṭhan awkah a forh hna lai timi ruahchannak he Jehovah cung zumhawktlak tein um zungzal awkah an i zuam.

Tangkalei chambaunak(Catlangbu 17 zoh)

17. A si a fakmi nuhmeinu kong cu zeicah thazaang petu a si?

17 A dang zohchunh awk ṭha pakhat cu Jesuh chan i a si a fakmi nuhmeinu kha a si. (Luka 21:1-4 rel.) Nuhmeinu nih biakinn ah a ummi ziaza rawhralnak kha zeiti hmanhin a tuah kho lo, cun a si a fahmi zong kha a thleng kho lo. (Matt. 21:12, 13) Asinain a ngeihmi dihlak a simi “phaisa sen pahnih” kha thawhlawm a rak pek. Pathian Pennak pakhatnak ah ka chiah ahcun Jehovah nih a ka bawmh lai ti kha a hngalh caah Jehovah kha aa bochan. Mah nih a hmaanmi biaknak bawmh awkah a rak forh. Cu bantukin kannih zong Pathian Pennak kha pakhatnak ah kan chiah ahcun Jehovah nih kan herhmi kha a kan pek hrimhrim lai ti kha kan zumh.—Matt. 6:33.

18. A hmaanmi lungput a ngeimi unaupa pakhat kong kha chim.

18 Tuchan i unau tampi nih an tuah khawh lomi kha si loin an tuah khawhmi tu ah an lungthin an peknak thawngin Jehovah an i bochannak kha an langhter. 2015 i a thih tiang zumhfek tein a ummi unaupa Malkam kong hi ruathmanh. A nupi he kum tampi chung Jehovah rian an ṭuan chungah thilṭha he, thilṭhalo he an ton caan a um. Malkam nih hitin a ti: “Kan nunnak ah zeidah kan ton lai kha zeitikhmanh ah ṭha tein kan hngal chung kho lo. A caan ah harnak hna kan tong kho i kan nunnak cu a fiang lomi a si kho. Asinain mahle mah i bochan loin Jehovah aa bochanmi cu Jehovah nih thluachuah a pek hna.” Malkam nih zei ruahnak cheuhnak bia dah a chim? “Jehovah rian ah na si khawh chung i tel law hlawhtlinnak hmuh awkah thlacam. Na tuah khawh lomi ah si loin na tuah khawhmi tu ah na lungthin chia.” *

19. (a) 2017 caah thimmi kumcaang Baibal cu zeicah aa tlak tuk? (b) 2017 kumcaang Baibal kha na nunnak ah zeitindah na hman khawh?

19 Hi vawlei ṭhalo cu “a ṭhalo chin lengmang,” cucaah harnak a tam chin lengmang lai tiah kan i ruahchan khawh. (2 Tim. 3:1, 13)A biapi deuhmi cu mah harnak hna ruangah lungdongh lo kha a si. Mah canah kan tuah khawhmi kha tuah in Jehovah cungah a fekmi zumhnak kan ngeih a hau. Cucaah 2017 caah thimmi mah kumcaang Baibal hi aa tlak tukmi a si: “BAWIPA cu i bochan u law ṭhatnak kha tuah u.”—Salm 37:3.

“BAWIPA cu i Bochan U law Ṭhatnak kha Tuah U” 2017 kumcaang Baibal.—SALM 37:3.

^ cat. 18 2013, October 15, Vennak Innsang, cahmai 17 in 20 ah zoh.