A ummi cazin ah kal

A ummi cazin ah kal

Mino Hna, Thlaraulei Hmuitinh kha Biapi ah Nan Chia Maw?

Mino Hna, Thlaraulei Hmuitinh kha Biapi ah Nan Chia Maw?

“Na tuahmi vialte cu BAWIPA sinah pe law na khuakhannak cu a tling kho lai.”—PTB. 16:3.

HLA: 11, 24

1-3. (a) Mino dihlak nih zei thil sining dah an ton, mah cu zei he dah tahchunh khawh a si? (A hramthawknak hmanthlak zoh.) (b) Mah thil sining ah mino pawl cu zeinihdah a bawmh khawh hna?

LAMHLA ah a ummi khua pakhat ah tlawn naa tim hei ti u sih. Cuka ah mawṭaw in na kal a hau. Mawṭaw dirnak hmun na phanh tikah mi he, mawṭaw he an tam tuk caah a hmasa ahcun na lung aa tuai. Asinain khoika dah ka kal lai i zei mawṭaw dah kaa cit lai ti kha na hngalh. A dang mawṭaw kaa cit ahcun ka kal duhnak hmun ka phan lai lo ti zong na hngalh.

2 Nunnak cu khualtlawnnak he aa lo i mino pawl cu mawṭaw dirnak hmun i minung pawl he nan i lo. A caan ah thim awk le tinvo sung tampi nan hmuh tikah nan lung aa tuai kho men. Asinain kal na duhnak hmun ṭha tein na hngalh ahcun a hmaanmi thimnak fawi tein na tuah khawh lai. Zei bantuk hmuitinh dah na chiah awk a si?

3 Hi capar nih mah biahalnak hna i a phi hngalh awk le Jehovah mithmai ṭha hmuh awkah i zuam dingin aan bawmh lai. Mah cu fimcawnnak, rian, innchunghawi ngeihnak  le fa ngeihnak ti bantuk nunnak he aa tlaimi biakhiahnak vialte ah Jehovah ruahnak cheuhnak zulh ding tinak a si. Cun thlaraulei hmuitinh phanh awkah i zuam, phundang cun Jehovah he a kan naihtermi hmuitinh chiah awkah i zuam kha a si. Jehovah rianṭuannak kha biapi ah na chiah ahcun Jehovah nih thluachuah aan pek lai i hlawhtlinnak hmuh awkah aan bawmh lai.—Phungthlukbia 16:3 rel.

Zeicah Thlaraulei Hmuitinh Chiah awk a Si?

4. Hi capar ah zei kong dah kan i ruah hna lai?

4 Thlaraulei hmuitinh chiah cu a ṭhami a si. Zeicah? A ruang pathum in zohhmanh hna u sih. Pakhatnak le pahnihnak nih thlaraulei hmuitinh phanh awkah kan i zuam ahcun Jehovah hawi a kan siter lai ti kha a langhter. Pathumnak nih no lio tein thlaraulei hmuitinh chiah a ṭhatnak a ruang kha a langhter.

5. Thlaraulei hmuitinh chiah awkah a biapi bikmi a ruang cu zeidah a si?

5 Thlaraulei hmuitinh chiah awk a sinak a biapi bikmi a ruang cu Jehovah dawtnak le kan caah a tuahmi thil vialte cungah kan i lawmh caah a si. Salm caṭialtu nih hitin a ti: “BAWIPA sinah lawmhnak hla sak cu zeitluk in dah a nuamh! . . . BAWIPA, thil lianngan na tuahmi nih ka lung an ka lawmhter, na tuahmi thil ruangah cun lawmhnak in hla ka sa.” (Salm 92:1, 4) Jehovah nih aan pekmi thil vialte kha ruathmanh. Tahchunhnak ah, na nunnak, na zumhnak, Baibal, Khrihfabu le Paradis ah zungzal nunnak ruahchannak hna kha ruathmanh. Thlaraulei hmuitinh na chiah tikah mah thil vialte ruangah Jehovah cungah naa lawmhnak kha na langhtermi a si. Mah nih Jehovah he aan naihter lai.

6. (a) Thlaraulei hmuitinh chiahnak nih Jehovah he nan i pehtlaihnak kha zeitindah a fehter khawh? (b) Na no lio tein na chiah khawhmi hmuitinh cheukhat cu zeidah an si?

6 Thlaraulei hmuitinh chiah awk a sinak a pahnihnak a ruang cu na hmuitinh phanh awk naa zuam tikah Jehovah duhnak na tuahmi a si i mah nih amah he aan naihter lai. Lamkaltu Paul nih hitin bia a kan kamh: “Pathian cu miding lo a si lo. Rian nan rak ṭuanmi le . . . amah nan dawtnak kha a philh lai lo.” (Heb. 6:10) Hmuitinh chiah awkah ka ngakchia tuk rih tiah ruat hlah. Tahchunhnak ah, Christine nih kum 10 a si lioin zumhfekmi Jehovah Tehte Hna i an kong kha hmaan tein rel dingin hmuitinh a chiah. Kum 12 a simi Toby nih tipil a in hlanah Baibal kha rel dih dingin hmuitinh a chiah. Maxim cu kum 11 a si ah tipil a ing i a naunu Noemi cu kum 10 a si ah a ing. An pahnih in Bethel ah rianṭuan dingin hmuitinh an chiah. An hmuitinh philh lo awkah an inn vanpang ah Bethel form kha an taar. Nangtah zeitin? Hmuitinh cheukhat kha chia in mah kha phanh awkah naa zuam kho lai maw?—Filipi 1:10, 11 rel.

Na hmuitinh ṭha tein na hngalh ahcun a ṭhami biakhiahnak kha fawi tein na tuah khawh lai

7, 8. (a) Hmuitinh chiahnak nih biakhiahnak tuah awkah zeitindah a fawiter? (b) Kumhra fai a simi pakhat nih sianghleiruun kai lo awkah zeicah bia a khiah?

7 No lioah thlaraulei hmuitinh chiah awk a sinak a pathumnak a ruang cu zeidah a si? Na no lioah biakhiahnak tuah awk tampi na ngei ko lai. Fimcawnnak asiloah rian le a dang kongkau ah biakhiahnak na tuah a hau lai. Mah cu na khualtlawnnak lam ah lamṭe tampi a umnak hmun na phanhmi bantuk a si. Khoika dah ka kal lai ti na hngalh ahcun  zei lam dah ka zawh lai ti kha fawi tein bia na khiah khawh lai. Cu bantukin na hmuitinh ṭha tein na hngalh ahcun a ṭhami biakhiahnak fawi tein na tuah khawh lai. Phungthlukbia 21:5 nih “teimaknak le a hlankan in ṭha tein thil rak ruahchungnak nih duhdimnak kha a chuahter” tiah a ti. A ṭhami hmuitinh kha tuan tein na chiah ahcun hlawhtlinnak tuan deuh ah na hmu ve lai. Kumhra fai a si lioin a biapimi biakhiahnak a tuahmi Damaris cu cutin a rak si.

8 Damaris cu siangsangruun a awn tikah a mark a ṭha tuk. Cucaah upadi major in sianghleiruun kai awkah bawmhnak a rak hmu. Asinain bank ah rianṭuan ding tu kha aa thim. Zeicah? Hitin a ti: “Ka ngakchiat lio tein hmaikal ṭuan awkah hmuitinh ka chiah. Mah ruangah caancheu in rianṭuan a hau. Upadi in sianginn ka dih ahcun tangka tampi ka hmu ko lai. Asinain caancheu in rianṭuan awkah a har lai.” Damaris cu hmaikal a ṭuannak kum 20 a si cang. Kumhra fai a si lioah a rak chiahmi hmuitinh le a tuahmi biakhiahnak kha a hmaanmi in a hmu maw? A hmuh. Rian a ṭuannak bank ah sihni tampi a hmuh hna. Anih zong sianghleiruun rak kai ve sehlaw anmah bantukin sihni a ṭuan ve lai. Asinain an lak i tam deuh cu an rian ah an i nuamh lomi kha a hmuh. Damaris nih hmaikal ka ṭuan caah anmah bantukin lungretheihnak ka ngei lo i nuamhnak tampi ka hmu tiah a ti.

9. Mino unau pawl caah zeicah kan i uanthlar?

9 Vawleicung pumpi i mino unau tampi cu thangṭhat awkah an i tlak. Jehovah he an i pehtlaihnak le thlaraulei hmuitinh kha an nunnak ah pakhatnak an chiah. Mah mino pawl nih fimcawnnak, rian le innchungkhar ti bantuk ah Jehovah lamhruainak kha an zulh caah lawmhnak an hmu. Solomon nih hitin a ti: “BAWIPA kha na lung chung dihlak in i bochan . . . Na kalnak lam kip ah amah kha hngal law amah nih na lam kha a tluanter hna lai.” (Ptb. 3:5, 6) Mino hna, Jehovah nih aan dawt tuk hna. Nannih cu a caah nan sunglawi tuk i aan huhphenh hna lai, lam aan hruai hna lai i thluachuah aan pek hna lai.

Midang Jehovah Kong Cawnpiakawkah Ṭha tein I Tim

10. (a) Phungchim rian cu kan caah zeicah a biapi tukmi a si? (b) Hmualngei tein na zumhnak kong a chim khotu zeitindah na si khawh?

10 Jehovah mithmaiṭha hmuh na duh ahcun midang sinah a kong kha chim na duh ko lai. Jesuh Khrih nih “thawngṭha bia cu . . . chim hmasa a si lai” tiah a ti. (Mar. 13:10) Cucaah phungchimnak rian cu a biapi tukmi a si i thildang vialte nakin biapi deuh ah kan chiah awk a si. Phungchim rian ah tam deuh in i tel awkah hmuitinh na chia kho lai maw? Hmaikal na ṭuan kho lai maw? Asinain phungchimnak ah naa nuamh theng lo ah tah zeitin? Hmualngei tein na zumhnak kong a chim khotu zeitindah na si khawh? Aan bawm khomi thil pahnih a um: Ṭha tein i tim, cun na hngalhmi  Jehovah kong kha midang sin chim awkah na lung dong hlah. Mah tikah phungchimnak ah nuamhnak tampi na hmu lai.

Jehovah kong midang chimh awkah zeitindah naa timhtuah? (Catlangbu 11, 12 zoh)

11, 12. (a) Jehovah kong midang sin chim khawh awkah zeitindah naa timhtuah khawh? (b) Mino unaupa pakhat nih sianginn ah Jehovah kong kha zeitindah a chim khawh?

11 Na sianginn kaiṭi hawi nih an in hal khawhmi, “Zeicah Pathian na zumh?” ti bantuk biahalnak cheukhat caah i tim. Mah biahalnak hna i a phi hngalh awkah jw.org website ah a kan bawmmi capar tampi a um. BAIBAL CAWNPIAKNAK > KUMHRA FAI timi tangah zoh. Mah ah “Pathian a Um ti kha Zeicah Ka Zumh?” timi tuahchunhnak catlap kha na hmuh lai. Mah nih biahalnak kha phit khawh awkah aan bawmh lai. Cun na hman khawhmi Baibal caang pathum na hmuh lai: Hebru 3:4, Rom 1:20 le Salm 139:14. Mah tuahchunhnak catlap hna kha hmangin biahalnak tampi na phit khawh lai.—1 Peter 3:15 rel.

12 Sianginn na kaiṭi hawi pawl kha anmah tein jw.org ah a phi kawl khawh ning kong kha chim hna. Luca nih cutin a rak tuah. An khaan ah biaknak kong an i ruah tawn. Sianginn cauk nih Jehovah Tehte Hna he aa tlaiin a chimmi cu a hmaan lo ti kha Luca nih a hngalh. Luca nih a ṭih pah ko nain mah kong kha fianter awkah sayamah nu kha nawl a hal. A sayamah nu nih a zumhnak kong chim awkah a awnh i a khaanhawi pawl kha kan website zong a hmuhsak khawh hna. Mah lengah sayamah nu nih Nehsawhtu Kha Kuttum Hmang Loin Lehrulh Ning timi video kha inn ah rak zoh cio dingin siangngakchia vialte kha a fial hna. Luca cu sianginn ah Jehovah kong a chim khawh caah aa nuam tuk.

13. Harnak kan ton tikah zeicah kan lung a dongh awk a si lo?

 13 Harnak na ton tikah na lung dong hlah. Na hmuitinh phanh khawh awkah i zuam peng. (2 Tim. 4:2) Katharina nih cutin a rak tuah. Kum 17 a si ah a rianṭuanhawi kip sinah phungchim dingin hmuitinh a chiah. Pakhat nih cun atu le atu a nihsawh. Asinain a hmuitinh kha a thlahdorh lo. A ṭhami a tuahsernak nih a dang a rianṭuanhawi a simi Hans kha a lung a suk tuk. Cucaah Hans nih kan cauk pawl kha a rel, Baibal a hlathlai i tipil a hung ing. Katharina cu a dang ah aa ṭhial caah mah kong kha a hngal lo. Kum 13 a rauh hnuah Katharina le a chungkhar cu pumhnak pakhat ah an i pum i cuka i zapi ca phungchimtu cu Hans a si. Mah tikah a khuaruah a har tuk. Rianṭuanṭi hawi sinah phungchim ding timi a hmuitinh kha a rak ngol lo caah aa nuam tuk.

Na Hmuitinh Kha Philh Hlah

14, 15. (a) Midang nih an in hnek tikah zeidah naa cinken awk a si? (b) Ṭhirual hneknak kha zeitindah na al khawh?

14 Hi capar nih Jehovah mithmai ṭha hmuh dingin i zuam awk le thlaraulei hmuitinh chiah awkah aan forh lai. Asinain na ṭhirual a simi mino tampi nih anmah he nuam tein caan hmanter an in duh. Cucaah an tuahmi tuah ve awkah an in hnek men lai. Mah tikah na hmuitinh phanh cu na caah zeitluk in dah a biapit ti kha na langhter a hau. Midang hneknak ruangah na hmuitinh kha philh hlah. Capar a thawknak ah langhtermi tahchunhnak i mawṭaw dirnak hmun kha ruat ṭhan hmanh. Midang an i nuamhmi na hmuh ca men ah zei bantuk mawṭaw cung paohah na kai lai maw? Na kai hrimhrim lai lo.

15 Ṭhirual hneknak kha zeitindah na al khawh? Lemsoinak a chuahtermi thil sining hna kha hrial. (Ptb. 22:3) Thilṭhalo na tuah ahcun a chuak khomi thil hna kha ruat. (Gal. 6:7) Ruahnak cheuhnak hal na herh kha toidor tein cohlang. Na nu le na pa, cun Khrihfabu i hmuhtonnak a ngeimi unau pawl nih an in chimhmi kha cohlang.—1 Peter 5:5, 6 rel.

16. Christoph hmuhtonnak nih toidornak ngeih a biapitnak kha zeitindah a langhter?

16 Toidornak nih Christoph kha ruahnak cheuhnak cohlan awkah a bawmh. Tipil a in hnu tlawmpal ah exercise tuahnak inn ah hmaan tein a kal peng. Cuka i mino cheukhat nih zaang lentecelhnak phu ah i tel ve dingin an sawm. Mah kong kha Khrihfa upa pakhat a chimh tikah biakhiahnak a tuah hlanah a chuak khomi pakhat le pakhat i zuamnak ti bantuk ṭih a nungmi kong kha ruah awkah a forh. Asinain Christoph cu zaang lentecelhnak phu ah a hun i tel. Tlawmpal ah zaang lentecelhnak cu a puarhrang i ṭih a nung ti kha a hun hngalh. Khrihfa upa pawl kha a chimh ṭhan hna i Baibal in ruahnak an cheuh. “Jehovah nih a ṭhami ruahnak cheutu pawl ka sinah a rak thlah ko hna nain ka cohlang colh lo” tiah Christoph nih a ti. Nangtah ruahnak cheuhnak cohlan awkah toidornak na ngei maw?

17, 18. (a) Jehovah nih mino pawl kha zeidah a duhpiak hna? (b) Kan upat tikah kan biakhiahnak he aa tlaiin i ngaihchihnak kha zeitindah kan hrial khawh? Tahchunhnak pe.

17 Baibal nih hitin a ti: “Maw tlangval hna, nan tlanvalnak kha lawmhnak in hmang ko u, nan tlanval lioah hin nan lung nih lawmhnak hmu ko seh.” (Pct. 11:9) Jehovah  nih mino pawl kha nuam tein umter a duh hna. Cutin i nuamh khawh awkah zeidah tuah a herh ti kha hi capar nih a fianter. Thlaraulei hmuitinh chia in kan tuahsernak kip ah Jehovah lamhruainak kha kan zulh awk a si. Cutin tuan tein na tuah ahcun Jehovah lamhruainak, huhphenhnak le thluachuahnak kha tuan tein na hmuh ve lai. Baibal hmangin Pathian pekmi ruahnak cheuhnak hna kha ruat law zul: “Nan tlanval lioah hin nanmah aan sertu kha philh hlah u.”—Pct. 12:1.

18 Mino pawl cu khulrang in an hung ṭhang i upa an hung si. Ngaihchiat awk ngai a simi cu mino cheukhat cu an biakhiahnak a palh caah a hnuah an i ngaichih. Cheukhat tu cu an no lioin zei hmuitinh hmanh an chiah lo caah an lung a rawk. Asinain thlaraulei hmuitinh a chiami hna cu an upat tikah an biakhiahnak cungah an i lawm. Kumhra fai a si lioah zaang lentecelhnak ah a thiam tukmi Mirjana zong cutin a si. Khuasik caan ah tuahmi Olympic Lentecelhnak ah i tel ding hmanhin sawm a rak si. Asinain caantling in Jehovah rianṭuan dingtu kha aa thim. Kum 30 a rauhhnu tiang a vapa he caantling in Pathian rian an ṭuan rih. Mi nih an duhmi minthannak, thangṭhatnak, nawlngeihnak le rumnak hna nih nuamhnak taktak a chuahpi lo tiah Mirjana nih a ti. A ṭha bikmi hmuitinh cu Pathian rianṭuan le a kong hngalh awkah midang bawmh kha a si tiah a ti chap.

19. No lio tein thlaraulei hmuitinh chiah cu zeicah a ṭhat?

19 Harnak ton buin Jehovah rianṭuannak kha biapi ah a chiami mino pawl cu thangṭhat awkah nan i tlak taktak. Thlaraulei hmuitinh nan chiah i phungchim rian kha biapi bik in nan chiah. Cun hi vawlei ruangah nan hmuitinh philh lo awkah bia nan khiah. Nan i zuamnak vialte cu pakpalawng a si lai lo. Unau pawl sinin dawtnak le bawmhnak nan hmu lai. Cucaah “na tuahmi vialte cu BAWIPA sinah pe law na khuakhannak cu a tling kho lai.”