A ummi cazin ah kal

A ummi cazin ah kal

Pathian “thlichia” a hran caan a naih chin cang caah mi nih ralrin peknak bia kha an theih a hau

Pathian Biaceihnak​—A Hlankan In Ralrinnak A Pe Zungzal Maw?

Pathian Biaceihnak​—A Hlankan In Ralrinnak A Pe Zungzal Maw?

KHUACAAN a dothlattu nih radar nih a langhtermi hmanthlak kha a zoh i mi tampi an umnak hmunlei ah ṭih a nungmi thlichia a hran thluahmah mi kha a hmuh. Cucaah mi pawl an him nakhnga thlichia nih a phanh hna hlanah a si khawh chungin ralrin a pek hna.

Cu bantukin Jehovah nih atu ah khuacaan report kong nakin theih a herh deuhmi ṭih a nung tukmi “thlichia” kong he aa tlaiin vawleicung mi pawl kha ralrin a pek hna. Zeitindah ralrin a pek hna? Mi pawl nih an lehrulh nakhnga a caan a za in a pek hna tiah zeicah kan zumh khawh? A phi hngalh awkah Jehovah nih hlanlio ah ralrin a pekmi hna cheukhat kong kha i ruah hmasa hna u si.

Pathian nih Zeitikah dah Ralrin a Pek Hna?

Baibal chan lioah Jehovah nih hramhram in a nawl a ngai lomi pawl dan a tat hna lainak kong he aa tlaiin “thlichia” he aa lomi a biaceihnak kong kha a hlankan in ralrin a pek hna. (Ptb. 10:25; Jer. 30:23) Mah nawl a ngai lomi hna kha caan saupi ralrin a pek hna i a nawl ngaih awkah zeidah tuah ding a si ti kha a chimh hna. (2 Si. 17:12-15; Neh. 9:29, 30) A herhmi thlennak tuah a duhmi hna bawmh awkah Jehovah nih a biaceihnak kong thanh awk le khulrang in tuah a herhmi thil kha hngalhter awkah vawleicung i zumhawk a tlakmi a salle kha a hman hna.—Amos 3:7.

Mah zumhawk a tlakmi Pathian salle lak i pakhat cu Noah a si. Kum tampi chung a chan lio i ziaza a rawkralmi hna le ralchanh a hmangmi mi hna kha Buanchukcho a tlun lainak kong he aa tlaiin ṭihnak ngei lo tein ralrinnak a pek hna. (Gen. 6:9-13, 17) Noah nih Buanchukcho in luat awkah tuah a herhmi kong zong kha a chimh hna. Cucaah Noah cu a hnuah “dinnak kong a chimtu” tiah auh a si.—2 Pet. 2:5.

Noah cu fakpi in aa zuam ko nain Buanchukcho a tlun hlan tiang cu mi pawl nih Pathian ralrin peknak kha zei ah an rel lo. Zumhnak an ngeih lo kha an langhter. A phichuak cu Buanchukcho “a hung tlun taktak i a fenh dih hna” tikah an thi dih. (Matt. 24:39; Heb. 11:7) An thih lai ah Pathian nih ralrinnak a kan pe lo tiah an chim kho lai lo.

Caan dang zongah Jehovah nih a biaceihnak “thlichia” a hranter hlanah pakhat kip cio kha caan tawite chung ralrinnak a pek hna. An lehrulh nakhnga a caan a za in a pek hna i an ngaih lo ahcun harnak an tong. Tahchunhnak ah, hlanlio Izipt mi hna cungah a tlung dingmi Rai Phunhra he aa tlaiin Jehovah nih ralrinnak a rak pek chung hna. Tahchunhnak ah, Jehovah nih Moses le Aaron kha a pasarihnak rai a simi rial a tlak lainak kong he aa tlaiin Faroah le a salle sinah ralrin pek dingin a thlah hna. A thaizing ah rial cu a tlak caah Pathian nih dornak hmun kawl awk le thlichia in luat awkah a caan a za in a pe hna maw? Baibal nih hitin a ti: “Faraoh bawi a cheu pawl kha cu BAWIPA nih a chimmi kha an ṭih i cucaah an salle le an saṭil kha inn chungah an khumh hna. Asinain a cheu nih cun BAWIPA chimmi kha zeihmanh ah an rel lo i an salle le an saṭil hna kha lo lakah cun an kaltak ko hna.” (Ex. 9:18-21) Jehovah nih ralrinnak a za in a pek hna ti cu a fiang ko. Cucaah mah ralrin peknak a ngai colhmi hna cu a dang bantukin harnak an tong lo.

Faroah le a salle pawl cu a hmasa rai phunhra kong he aa tlai zongin cu bantukin ralrin pek an si. Asinain mah ralrin peknak kha hrut ngaiin an rak al. (Ex. 4:22, 23) A phichuak cu an fater pawl an rak thi dih. Zeitluk ngaihchiat awk dah a si. (Ex. 11:4-10; 12:29) A caante ah ralrin pek an rak si maw? An si. Moses nih Israel mi pawl kha rai phunhranak in an luat nakhnga ralrin a pek colh hna i an chungkharmi pawl an him nakhnga lamhruainak a pek hna. (Ex. 12:21-28) Mah ralrin peknak kha minung  zeizat nih dah an lehrulh? lsrael mi, lsrael mi a si lomi “mi dang tampi” le Izipt mi hna i telin minung nuai thum cu Pathian biaceihnak in an luat i Izipt in an chuak tiah mi cheukhat nih an ti.—Ex. 12:38.

Mah tahchunhnak nih ralrin a kan pekmi ṭha tein ngaih awkah Jehovah nih a caan a za in a kan pek zungzal ti kha a langhter. (Deut. 32:4) Cutin tuah awkah Pathian kha zeinihdah a forh? Lamkaltu Peter nih Jehovah nih “pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si” tiah a ti. (2 Pet. 3:9) Pathian nih kan zawn a kan ruah. A biaceihnak a phanh hlanah i ngaichih hna seh law a herhmi thlennak tuah hna seh ti a duh.—Isa. 48:17, 18; Rom 2:4.

Tuchan ah Pathian Ralrin Peknak an Lehrulh Ning

Tuchan zongah vawleicung pumpi ah thanhmi mah a biapi tukmi ralrinpeknak kha an ngaih ve a hau. Jesuh nih vawleicung a um lioah atu chan thil sining hrawh a si lainak kong le “harnak” nganpi chungah a cang dingmi kong he aa tlaiin ralrin a pek hna. (Matt. 24:21) Hmailei biaceihnak kong he aa tlaiin a zultu pawl nih an ton dingmi le mah caan a naih tikah an hmuh dingmi kong kha fiang tein a chimhchung hna. Tuchan ah Jesuh nih a rak langhtermi a biapimi vawleicung thil sining hna a tlinmi kha kan hmuh.—Matt. 24:3-12; Luka 21:10-13.

Mah chimchungbia ningin Jehovah nih atu ah kan dihlak in amah biak awkah i thim ding le a nawlngaih dingin ralrinnak a kan pek. Nawlngaimi hna nih atu ah a ṭha deuhmi nunnak hmu hna sehlaw hmailei ah dinnak in a khatmi vawlei thar ah laksawng hmu hna seh ti a duh. (2 Pet. 3:13) Jehovah nih mi nih a biakam an zumh nakhnga bawmh a duh hna. An nunnak a khamh hngami thawngṭha kong a chimh hnanak thawngin a bawmh hna. Mah thawngṭha cu Jesuh nih “miphun vialte hna ca i tehte si awkah . . . khuazakip ah chim a si lai” tiah a chimchungmi “Pennak kong thawngṭha” kha a si. (Matt. 24:14) Pathian nih mah thawngṭha kong chim awk asiloah “tehte” khaan awkah a hmaanning tein amah a biami hna kha ram 240 ah ningcang tein a dirh hna. Jehovah nih mi tam khawh chung tam nih mah ralrinpeknak kha ngai hna sehlaw “thlichia” bantuk a simi a dingmi a biaceihnak chungin luat hna seh ti a duh.—Zef. 1:14, 15; 2:2, 3.

A biapimi biahalnak cu Jehovah nih ralrin peknak lehrulh awkah a caan a za in a pe hna lai maw, a pe hna lai lo timi kha a si lo. Mah thil sining hna nih a caan a za in a pek zungzal hna ti kha an langhter. Mah canah a biapimi biahalnak cu Pathian ralrin peknak kha mi pawl nih caan a um liote ah an zul lai maw? timi kha a si. Pathian kong a chimtu hna in hi chan ṭhalo donghnak ah mi tam khawh chung tam kha luatnak hmuh awkah bawm zungzal hna u sih.