A ummi cazin ah kal

A ummi cazin ah kal

 CAWN AWK CAPAR 47

Levitikas Baibal Cauk In Kan Cawn Khawhmi

Levitikas Baibal Cauk In Kan Cawn Khawhmi

“Cathiang hi a dihlak in Pathian thawchuah hnawhmi a si i . . . a ṭhahnemmi a si.”—2 TIM. 3:16.

HLA 98 Cathiang—Pathian Thawchuah Hnawhmi

LANGHTERNAK *

1-2. Tuchan Khrihfa hna nih Levitikas Baibal cauk kha zeicah hlathlai kan duh awk a si?

LAMKALTU Paul nih a hawi a simi mino Timote kha “Cathiang hi a dihlak in Pathian thawchuah hnawhmi a si i . . . a ṭhahnemmi a si” ti kha a hngalhter ṭhan. (2 Tim. 3:16) Mah ah Levitikas Baibal cauk zong aa tel. Levitikas Baibal cauk kha zeitindah na hmuh? Mi cheukhat nih atu kan chan he aa pehtlai lomi nawlbia hna aa telmi cauk pakhat in an hmuh men lai, asinain a hmaanmi Khrihfa hna nih cun cutin kan hmu lo.

2 Levitikas Baibal cauk cu a luancia kum 3,500 hrawngah ṭialmi a si nain Jehovah nih mah Baibal cauk kha “kanmah cawnpiaknak caah” a kilven peng. (Rom 15:4) Levitikas Baibal cauk nih Jehovah ruahnak kha hngalhthiam awkah a kan bawmh caah mah kha lungtho tein kan hlathlai awk a si. A tak ti ahcun Levitikas Baibal cauk in kan cawn khawhmi a kong tampi a um. Mah hna lak i a kong pali kha i ruah hna u sih.

Jehovah Cohlanmi Si Khawh Ning

3. Kum fatin tuahmi Remnak Ni ah zeicah raithawinak an pekchanh?

3 Cawn khawhmi pakhatnak: Kan raithawinak kha Jehovah nih a cohlan nakhnga Jehovah cohlanmi kan si a hau. Kum fatin tuahmi Remnak Ni ah Israel mi hna cu hmunkhat ah an i pum i tlangbawi ngan nih saram raithawinak a pekchanh. Mah raithawinak nih Israel mi hna kha sualnak in an i thianh a herh kha a hngalhter ṭhan hna. Asinain mah ni ah tlangbawi ngan  nih saram thi kha a Thiang Bikmi Khaan chung i a luhpi hlanah a dang a tuah hmasa dingmi pakhat a um, mah cu Israel mi pawl an sualnak ngaihthiamnak nakin a biapi deuhmi a si.

(Catlangbu 4 zoh) *

4. Levitikas 16:12, 13 ningin Remnak Ni ah tlangbawi ngan nih a Thiang Bikmi Khaan chung i a hmasa bik a luh lioah zeidah a tuah? (A phaw hmanthlak zoh.)

4 Levitikas 16:12, 13 rel. Remnak Ni ah a cangmi kong kha ruathmanh: Tlangbawi ngan cu puan biakinn chungah a lut. Mah ni ah tlangbawi ngan cu a Thiang Bikmi Khaan chungah voithum tiang a luh a hau, atu hi a voikhatnak a si. A kut khatlei in rimhmui in a khatmi kheng pakhat aa put. A dang khatlei in meiṭil in a khatmi mei laknak kheng pakhat aa put. A Thiang Bikmi Khaan luhnak puanzar hmaiah a dir. Cun upatnak he a Thiang Bikmi Khaan chungah a lut i biakamnak kuang hmaiah a dir. Langhternak in tlangbawi ngan cu Jehovah Pathian hmaiah a dir. Cun tlangbawi ngan nih a thiangmi rimhmui kha ralring tein mei ah khan a paih i a Thiang Bikmi Khaan cu rimhmui khu in a khat dih. * Mah hnuah pekchanhmi saram thi he a Thiang Bikmi Khaan chungah a lut ṭhan lai. Sual ngaihthiamnak caah saram thi a pekchanh hlanah rimhmui a khangh hmasami kha i cinken.

5. Remnak Ni ah rimhmui hmannak in zeidah kan cawn khawh?

5 Remnak Ni ah rimhmui hmannak in zeidah kan cawn khawh? Baibal nih zumhfek tein Jehovah a biami hna thlacamnak cu zihmui asiloah rimhmui bantuk a si tiah a ti. (Salm 141:2; Biat. 5:8) Tlangbawi ngan nih Jehovah hmaiah rimhmui a put tikah upatnak he a putmi kha ruat ṭhan hmanh. Cu bantukin thlacamnak in Jehovah kan naih tikah upatnak he kan naih a hau. Cun Jehovah kha kan ṭihzah tuk. Ngakchia pakhat nih a pa a fuhpanh bantukin van le vawlei Sertu nih amah naihnak le fuhpanhnak nawl a kan awnh caah a cungah kan i lawm tuk. (Jeim 4:8) A hawikom in a kan cohlan. (Salm 25:14) Zeitikhmanh ah Jehovah ngaihchiatter kha kan duh lo caah mah tinvo sung kha kan sunsak tuk.

6. Tlangbawi ngan nih raithawinak a tuah hlanah rimhmui a khangh hmasami in Jesuh kong zeidah kan cawn khawh?

6 Tlangbawi ngan nih raithawinak a tuah hlanah rimhmui a khangh hmasa a hau ti kha philhhlah. Cutin rimhmui a khangh hmasanak thawngin raithawinak a pekchanh tikah Pathian nih a cohlan lai ti kha a zumh khawh. Mah nih Jesuh kong kha a kan cawnpiak. Vawleicung a um lioah Jesuh nih a nunnak kha raithawinak in a pekchanh hlanah minung khamhnak nakin a biapi deuhmi thil kha a rak tuah. Mah cu zeidah a si? Zumhawktlak tein le zumhfek tein a nunnak thawngin Jehovah nih a raithawinak a cohlan nakhnga aa timhtuahmi kha a si. Cuticun Jesuh nih Jehovah duhnak tuah cu a hmaanmi nunning a si ti kha a langhter. Jesuh nih a Pa cungnung bik a sinak asiloah a uk ning cu a dingmi a si ti zong kha a langhter.

7. Vawleicung i Jesuh nunning nih zeicah a Pa lung a lawmhter?

7 Jesuh nih vawleicung a nun chung vialte Jehovah i a dingmi phunglam kha tling tein a rak zulh peng. Hneksaknak le harnak tampi a tong i fahnak in buin ka thi lai ti zong kha a hngalh ko nain a Pa uk ning cu a ṭha bikmi a si ti kha langhter awkah bia a khiah. (Fil. 2:8) Jesuh cu hneksaknak a ton tikah “aihramnak le mitthli he” thla a cam. (Heb. 5:7) Lungtak tein thla a cammi nih Jehovah cungah zumhfek tein a um ti kha a langhter i mah nih  nawlngaih peng a duhnak kha a fehter chin. Jehovah caah Jesuh thlacamnak cu rimhmui bantuk an si. Jesuh nunning nih a Pa cungnung bik a sinak kha a langhter i a lung zong a lawmhter.

8. Jesuh nunning kha zeitindah kan i zohchunh khawh?

8 Kan si khawh chungin Jehovah nawl kan ngaih i a cungah zumhfek tein kan umnak thawngin Jesuh kha kan i zohchunh khawh. Hneksaknak kan ton tikah Jehovah lunglawmhter kan duh caah bawmhnak hmuh awkah a sinah lungtak tein thla kan cam. Cuticun Jehovah uknak kan bawmh kha kan langhter. A huatmi thil hna kha kan tuah ahcun Jehovah nih kan thlacamnak a cohlang lai lo ti kha kan hngalh. Asinain Jehovah phunglam ningin kan nun ahcun kan thlacamnak cu Jehovah caah rimhmui bantuk a si ve lai ti kha kan zumh khawh. Cun kan zumhfehnak le zumhawktlak kan sinak nih vancung kan Pa lung a lawmhter ti zong kha kan zumh khawh.—Ptb. 27:11.

Lunglawmhnak le Dawtnak nih Jehovah Rian Ṭuan awkah a Kan Forh

(Catlangbu 9 zoh) *

9. Zeicah daihnak thawinak kha pekchanh a si?

9 Cawn khawhmi pahnihnak: Jehovah cungah kan i lawmh caah a rian kha kan ṭuan. Mah kong kha hngalhthiam awkah Israel mi hna nih an tuahmi daihnak thawinak kong i ruah hna u sih. * Levitikas Baibal cauk ah Israel mi pakhat nih ‘lawmhnak caah’ daihnak thawinak a pekchanh khawh ti kha kan hmuh. (Lev. 7:11-13, 16-18) Anih nih mah thawinak kha tuah a hauh caah si loin tuah a duh caah a pekchanhmi a si. Cucaah mah cu Jehovah  Pathian a dawt caah amah lungtho tein a pekchanhmi a si. Raithawinak a petu, a chungkhar le tlangbawi pawl nih raithawinak sa kha an ei lai. Asinain rai an thawimi sa i a cheukhat zawn kha cu Jehovah sinah a dang tein an pekchanh. Mah cu zei zawn dah a si?

(Catlangbu 10 zoh) *

10. Levitikas 3:6, 12, 14-16 ah a langhtermi daihnak thawinak cu Jesuh nih Jehovah rian a ṭuan ning he zeitindah aa lawh?

10 Cawn khawhmi pathumnak: Jehovah kha kan dawt taktak caah a ṭha bikmi kha kan pek. Jehovah nih saram thau kha a ṭha bikmi in a hmuh. Cun a kal le a thin zong a sunsak tuk kha a langhter. (Levitikas 3:6, 12, 14-16 rel.) Cucaah Israel mi hna nih a kal, a thin le a thau kha lungtho tein an pekchanh tikah a hleiin Jehovah cu aa lawm tuk. Israel mi pakhat nih cu bantuk raithawinak a tuah tikah Pathian sinah a ṭha bikmi pek a duh kha a langhtermi a si. Jesuh zong nih dawtnak taktak he lungthin dihlak in Jehovah rian a ṭuannak thawngin a ṭha bikmi kha lungtho tein Jehovah a pek. (Johan 14:31) Jesuh caah Pathian duhnak tuah cu a nuam i Pathian nawlbia kha Jesuh nih a sunsak tuk. (Salm 40:8) Jesuh nih lungtho tein a rian a ṭuanmi kha a hmuh tikah Jehovah cu zeitluk in dah aa nuamh lai.

Jehovah kha kan dawt caah a ṭha bikmi kha kan pek (Catlangbu 11-12 zoh) *

11. Kan rianṭuannak cu daihnak thawinak he zeitindah aa lawh, mah nih zeitindah hnemhnak a kan pek khawh?

11 Lungtho tein Jehovah rian kan ṭuanmi cu daihnak thawinak he aa lo, mah nih Jehovah he aa tlaiin kan lungput kha a langhter. Jehovah kha kan lungthin dihlak in kan dawt caah a ṭha bikmi kha kan pek. Dawtnak taktak he a phunglam ningin lungtho tein a rian a ṭuanmi nuai tampi kha a hmuh hna tikah Jehovah cu aa nuam tuk lai. Kan tuahsernak lawng si loin kan lungput kha Jehovah nih a hmuh i a sunsak ti i cinkennak nih hnemhnak a kan pek khawh. Tahchunhnak ah, nang cu kum upa pakhat na si i na duh tluk in thil na tuah khawh ti lo ahcun Jehovah nih na sining a hngalhthiam ti kha na zumh khawh. Jehovah caah tampi ka tuah kho lo tiah na ruah men lai, asinain Jehovah nih na tuah khawhmi kha tuah awkah aan forhtu dawtnak taktak na ngeih kha a hmuh. Na si khawh tawk in na pekmi kha Jehovah nih a cohlan.

12. Jehovah nih daihnak thawinak a lehrulh ningin zeidah kan zumh khawh?

12 Daihnak thawinak in zeidah kan cawn khawh? A ṭha bikmi saram pum cheubang pawl kha mei in an khangh tikah a khu cu cunglei ah a kai i mah nih Jehovah lung a lawmhter. Cucaah na si khawh chungin le lungtho tein a rian na ṭuan tikah Jehovah cu aa lawm tuk ti kha na zumh khawh. (Kol. 3:23) Zeitluk in dah a lung na lawmhter lai ti kha ruathmanh. Tampi a si ah, tlawmte a si ah dawtnak he thazaang chuah in a rian na ṭuanmi kha Jehovah nih a sunsak tuk i mah kha a zungzal in aa cinken.—Matt. 6:20; Heb. 6:10.

Jehovah Nih A Bupi Kha Thluachuah A Pek

13. Levitikas 9:23, 24 ningin Jehovah nih tlangbawi pawl a cohlan hna kha zeitindah a langhter?

13 Cawn khawhmi palinak: Jehovah nih vawlei lei a bupi kha thluachuah a pek. BC 1512, Sinai Tlang hram i Puan thlam chiah a si lioah a cangmi kong hi ruathmanh. (Ex. 40:17) Moses nih Aaron le a fapa pawl tlangbawi rian peknak caah puai pakhat a timhtuah. Israel mi pawl cu tlangbawi nih a voikhatnak saram rai an thawimi kha zoh awkah hmunkhat ah an i pum. (Lev. 9:1-5) Jehovah nih mah tlangbawi thar pawl a cohlan hna kha zeitindah a langhter? Aaron le Moses nih mi pawl kha thluachuah an pek hna tikah Jehovah nih mei a chuahter i biakṭheng cungah a tang rihmi raithawinak kha mei nih cun a kangh dih.—Levitikas 9:23, 24 rel.

14. Jehovah nih tlangbawi in Aaron le a fapa pawl a cohlanmi hna cu atu kan chan ah zeicah a biapit?

 14 Van in a tlami mei nih zeidah a langhter? Jehovah nih tlangbawi in a thimmi Aaron le a fapa pawl a cohlan hna i a bawmh hna ti kha a langhter. Jehovah nih tlangbawi pawl a bawmh hna ti a langhtermi thil kha Israel mi nih an hmuh tikah kan bawmh ve hna awk a si ti kha an hngalh. Jehovah nih Israel tlangbawi pawl a cohlanmi hna cu atu kan chan ah zeicah a biapit? Zeicatiah mah tlangbawi phu nih a ngan deuhmi tlangbawi phu kha a aiawh caah a si. Jesuh cu Tlangbawi Ngan a si i amah he vancung ah tlangbawi le siangpahrang a ṭuanṭi hngami 144,000 zong an um.—Heb. 4:14; 8:3-5; 10:1.

Jehovah nih a bupi kha thluachuah a pek i a hruai. A bupi kha kan lungthin dihlak in kan bawmh (Catlangbu 15-17 zoh) *

15-16. Jehovah nih “zumh awk a tlakmi le a fimmi sal” a cohlan hna kha zeitindah a langhter?

15 1919 ah Jesuh nih chiti thuhmi unaupa phu hmete kha “zumh awk a tlakmi le a fimmi sal” in rian a pek hna. Mah sal nih phungchim rian kha an tlangtlak i Khrih zultu hna kha ‘a caan hmaan tein rawl’ an pek hna. (Matt. 24:45) Pathian nih zumh awk a tlakmi le a fimmi sal a cohlan hna ti a langhtertu thil a um maw?

16 Satan le a mi hna nih zumhawk a tlakmi sal hna rianṭuannak kha ngolter awkah an i zuam. Mah sal nih Jehovah bawmhnak an hmuh lo ahcun an rian kha an ṭuan kho lai lo. Vawlei ralpi pahnih, puarhrang ngaiin hremnak, vawlei pumpi chawlehnak ṭumchuknak le a ding loin pehtlaihnak hna a rak um. Asinain zumh awk a tlakmi le a fimmi sal nih vawleicung i Khrih zultu pawl kha thlarau rawl hmaan tein an pek zungzal hna. Tuchan ah man loin le holhphun 900 lengin thlarau rawl kan hmuh khawhmi hi ruathmanh. Pathian nih a bawmh hna ti kha mah nih a langhter. Cun Jehovah nih thluachuah a pek hna  ti kha phungchim rian zong nih a langhter. Thawngṭha cu “khuaza kip ah” chim a si cang. (Matt. 24:14) Tuchan ah Jehovah nih a bupi kha a hruai i thluachuah tampi a pek ti kha fiang tein kan hmuh.

17. Jehovah nih a hmanmi a bupi kan bawmh kha zeitindah kan langhter khawh?

17 Hitin kan i hal awk a si, ‘Vawlei lei Jehovah bupi ah kaa tel khawhmi kha ka sunsak maw?’ Moses chan lioah Jehovah nih rian a pekmi pawl a cohlan hna kha langhter awkah van in mei a tlakter. Cu bantukin tuchan zongah a bupi a hman ti a langhtermi thil kha a kan pek. A bupi ah kan i tel khawh caah Jehovah cungah kan i lawmh tuk awk a si. (1 Thes. 5:18, 19) Jehovah nih a hmanmi a bupi kan bawmh kha zeitindah kan langhter khawh? Kan cauk, pumhnak, peng civui le pengkomh civui hna in kan hmuhmi Baibal hrambunhmi lamhruainak kan zulhnak thawngin a si. Mah lengah phungchimnak le cawnpiaknak rian ah kan si khawh chungin kan i telnak thawng zongin kan bawmh kha kan langhter khawh.—1 Kor. 15:58.

18. Zei tuah awkah dah bia na khiah?

18 Levitikas Baibal cauk in kan cawnmi kha zulh awkah bia khiak hna u sih. Kan raithawinak kha Jehovah nih cohlang seh ti kan duh. Jehovah cungah kan i lawmh tuk caah a rian kha kan ṭuan. Kan lungthin dihlak in Jehovah kha kan dawt caah a ṭha bikmi kha kan pek zungzal. Cun tuchan ah Jehovah nih a hmanmi a bupi bawmh awkah kan tuah khawhmi vialte kha kan tuah. Cuticun a Tehte in a rianṭuannak tinvo sung kan hmuhmi kan sunsak kha Jehovah hmaiah kan langhter khawh.

HLA 96 Pathian Cauk—Ro Sung

^ cat. 5 Levitikas Baibal cauk ah Jehovah nih hlanlio Israel mi pawl a pekmi hna nawlbia tampi aa tel. Khrihfa pawl cu mah nawlbia hna tangah kan um ti lo nain nawlbia in ṭhatnak kan hmu kho. Hi capar ah Levitikas Baibal cauk in kan cawn khawhmi, man a ngei tukmi kong pawl kan i ruah hna lai.

^ cat. 4 Puan biakinn ah an khanghmi rimhmui cu a thiangmi in ruah a si i hlanlio Israel mi hna nih mah kha Jehovah biaknak lawngah an rak hman. (Ex. 30:34-38) Kumzabu pakhatnak i Khrihfa hna nih biaknak caah rimhmui an khangh tiah Baibal ah a langhtermi a um lo.

^ cat. 9 Daihnak thawinak kong kha tam deuh in hngalh awkah Insight on the Scriptures, Volume 2, ca. 526 ah zoh.

^ cat. 54 HMANTHLAK FIANTERNAK: Remnak Ni ah a Thiang Bikmi Khaan cu rimhmui khu in a khah nakhnga Israel tlangbawi ngan cu rimhmui le meiṭil he mah khaan chungah a lut. A hnuah sual ngaihthiamnak caah pekchanhmi saram thi he a Thiang Bikmi khaan chungah a lut ṭhan.

^ cat. 56 HMANTHLAK FIANTERNAK: Israel mi pakhat nih an chungkhar in Jehovah cungah an i lawmhnak langhter awkah tuu pakhat kha tlangbawi sinah daihnak thawinak caah a pek.

^ cat. 58 HMANTHLAK FIANTERNAK: Vawleicung phungchim rian a ṭuan lioah Jesuh nih Pathian nawlpekmi a zulh zungzalnak thawngin le a zultu pawl zong cutin tuah ve awkah a bawmh hnanak thawngin Jehovah a dawt taktak kha a langhter.

^ cat. 60 HMANTHLAK FIANTERNAK: Kum upa unaunu pakhat cu a ngan a dam lo nain cakuat in tehte a khaannak thawngin Jehovah kha a ṭha bikmi a pek.

^ cat. 62 HMANTHLAK FIANTERNAK: 2019, February ah, Uktu Bu chungtel a simi Unaupa Gerrit Lösch nih Germany holh in remh ṭhanmi Vawlei Thar Lehnak Baibal chuah a sinak kong kha a thanh. Atu ah mah unaunu pahnih bantukin Germany ah a ummi thawngthanhtu hna nih phungchimnak ah chuah tharmi Baibal kha lungtho tein an hman.