A ummi cazin ah kal

A ummi cazin ah kal

Tipil petu Johan—I Nuamh Peng Khawh Ning

Tipil petu Johan—I Nuamh Peng Khawh Ning

KHRIHFABU ah ṭuan na duh tuk ko nain atu ah na ṭuan khawh lomi rian a um maw? Mah cu midang nih an ṭuanmi rian a si men lai. Asiloah hlanah na rak ṭuan balmi rian a si men lai. Asinain atu cu kum upat ruang, ngandam lo ruang, chawlehnak a har ruang asiloah chungkhar zohkhenhnak ruangah rian na ṭuan khawhnak cu ri a ngei men lai. Asiloah bupi thlennawnnak ruangah caan saupi na rak ṭuanmi rian in naa dinh a hau men lai. Zei ruang a si hmanhah Pathian rian ah ṭuan na duhmi dihlak kha ka ṭuan kho lo timi ruahnak na ngei men lai. Cu bantuk thil sining ah a caan ah na ngaih a chia lai ti cu a fiang ko. Cu a si ah lung dong in le thinhun in um zungzal lo awkah zeinihdah aan bawmh khawh? Zeitindah naa nuamh peng khawh?

Tipil petu Johan kong kan ruahnak thawngin i nuamh peng khawh ning kha kan cawn khawh. Johan cu tinvosung tampi a hmumi a si, asinain a nunnak ah a cangmi thil hna cu aa ruahchan lomi an si men lai. Phungchimnak ah caan a hmanmi nakin thonginn ah caan tam deuh ka hman lai tiah a ruat bal men lai lo. Asinain Johan cu aa nuam peng i a nunchung vialte mah lungput kha a rak langhter. Zeinihdah a bawmh? Kan lung a dongh tik hmanhah zeitindah kan i nuamh peng khawh?

Nuamhnak A Pemi Rian

AD 29, April thla hrawngah Johan nih Messiah, hmaikal pakhat in a rian kha ṭuan hram a rak thawk. Mi pawl kha “vancung Pennak cu a nai cang caah nan sualnak kha mertak cang hna u” tiah a ti hna. (Matt. 3:2; Luka 1:12-17) Mi tampi nih an cohlan. A tak ti ahcun Johan chimmi bia ngaih awkah mibu cu lamhlapi in an ra i mi tampi cu an sualnak kha an i ngaichih i tipil an ing. Cun Johan nih anmahle anmah miding in aa hmumi biaknaklei hruaitu pawl kha an nunning an i thlen lo ahcun biaceih an si lainak kong kha ralṭha tein a chimh hna. (Matt. 3:5-12) AD 29, October thla hrawngah Johan nih a phungchimnak rian i a biapi bik a simi thil kha Jesuh tipil a pek lioah a tuah. Mah caan thawkin Johan nih midang kha biakammi Messiah, Jesuh hnu zulh awkah a fial hna.—Johan 1:32-37.

Johan rian a biapitnak kong he aa tlaiin Jesuh nih hitin a ti: “Nu chungin a chuakmi lakah  vawleicung ah hin Johan tlukin a nganmi ahohmanh an um lo.” (Matt. 11:11) Johan cu a hmuhmi thluachuah ruangah aa nuam tuk lai ti kha kan zumh khawh. Johan bantukin tuchan i mi tampi zong thluachuah tampi an hmu ve. Unaupa Terry kong hi ruathmanh. Amah le a nupi, Sandra cu kum 50 leng caantling rian an ṭuan. Terry nih hitin a ti: “A ṭha tukmi tinvo sung tampi ka hmu. Hmaikal, Bethel chungkhar, special hmaikal, peng zohkhehtu le pengkomh zohkhenhtu in Pathian rian ka rak ṭuan i atu cu special hmaikal ka ṭuan ṭhan.” Jehovah rian ah tinvosung kan hmuh tikah kan i nuam tuk, asinain kan sining aa thlen tikah i nuamh khawh zungzal awkah kan i zuam a hau.

Sunsak Zungzal

Tipil petu Johan cu a hmuhmi tinvosung kha a sunsak caah aa nuam peng. Tahchunhnak pakhat hi ruathmanh. Jesuh tipil a in hnuah Johan a phungchimnak cu a ṭumchuk i Jesuh a phungchimnak cu a hung ṭhangcho. Johan zultu pawl cu mah kong ah an lungre a thei i hitin an ti: “Kha pa kha atu hi tipilnak a pe ve hna i mikip nih an fuh.” (Johan 3:26) Mah tikah Johan nih hitin a leh hna: “Ṭhitmi ngaknu cu a ṭhitu tlangval ta pei a si cu. Nupi ṭhitu tlangval kawipa cu a pawng khan a dir i nupi ṭhitu aw a theih tikah khan a lung aa lawm. Kei ka lunglawmhnak tlinter a sining zong cuticun a si ko.” (Johan 3:29.) Johan nih Jesuh kha a zuamcawh lo i Jesuh rian cu a biapi tukmi a si caah ka rian cu santlai lo a si ti zongin a ruat lo. Mah canah “nupi ṭhitu tlangval kawipa” bantukin Johan nih a rian kha a sunsak peng caah aa nuam peng.

A rian cu a fawimi a si lo nain a lungput nih Johan kha i nuamh peng awkah a bawmh. Tahchunhnak ah, Johan cu a chuahka in Nazir mi pakhat a si i zu din kha thlauh a si. (Luka 1:15) Johan a nunning he aa tlaiin Jesuh nih hitin a ti: “Johan cu a ra i rawl a ul i zu zong a ding lo.” Asinain Jesuh le a zultu pawl cu cu bantuk khenkhamnak tangah an um lo caah midang bantukin an nung kho. (Matt. 11:18, 19) Cun Johan cu khuaruahhar thil a tuah kho lo. Asinain Johan nih a zultu a rak si balmi cheukhat i telin Jesuh zultu pawl nih cun khuaruahhar thil an tuah khawh ti kha a hngalh. (Matt. 10:1; Johan 10:41) A zultu le Jesuh zultu an i dannak kong kha ruah canah Jehovah sinin a hmuhmi rian kha lungtho tein a ṭuan.

Atu ah kan ṭuanmi Jehovah rian kha kan sunsak ve ahcun kan i nuam kho zungzal lai. A hmasa ah a kong chimmi Terry nih hitin a ti: “Pek ka simi rian pakhat kip cio cungah lungthin ka pek.” Caantling rian a ṭuan lio kong kha a ruah ṭhan tikah hitin a ti: “Nuamhnak tampi ka rak hmuh caah i ngaihchih awk ka ngei lo.”

Jehovah rianṭuannak ah kan hmuhmi zei rian paoh a biapimi in kan hmuh ahcun mah nih nuamhnak a kan hmuhter lai. “Pathian rianṭuanṭi hawi” si cu tinvo sung taktak a si. (1 Kor. 3:9, NW) A sunglawi tukmi thil pakhat cu aa dawh peng khawh nakhnga ṭha tein zohkhenh zungzal a hau. Cu bantukin kan i nuamh peng khawh nakhnga Jehovah he rianṭuanti cu zeitluk in dah a sunlawi ti kha kan ruah zungzal ve a hau. Cun kan i zuamnak kha midang he kan i tahchunh awk a si lo. Jehovah nih midang a pekmi hna rian cu kanmah a kan pekmi rian nakin a sunglawi deuh ti zongin kan ruah awk a si lo.—Gal. 6:4.

Thlaraulei Thil Ah Lungthin Pe

Johan nih phungchim rian kha caan saupi ka ṭuan kho lai lo ti kha a hngalh men lai, asinain a phungchim rian zeitindah a dongh lai ti tu cu a hngal men lai lo. (Johan 3:30) AD 30, Jesuh tipil a in dih hnu thlaruk hrawngah Johan cu Siangpahrang Herod nih thong ah a thlak. Asinain Johan nih a hmaanmi kong kha a chim zungzal. (Mar. 6:17-20) Mah bantuk thlennak hna lakah i nuamh zungzal dingin Johan kha zeinihdah a bawmh? Thlaraulei thil ah lungthin a pek zungzal caah a si.

Johan nih thong a tlak lioah Jesuh phungchim rian a kauh chinnak kong kha a theih. (Matt. 11:2; Luka 7:18) Johan nih Jesuh cu Messiah a si ti kha a zumh, asinain Messiah nih a tuah dingmi kong he aa tlaiin Baibal chimmi vialte Jesuh nih zeitindah a tlinter lai ti kha hngalh a duh men lai. Johan nih Messiah cu siangpahrang a si lai ti kha a hngalh caah a rauhhlan ah Jesuh cu siangpahrang a ṭuan cang lai maw ti kha hngalh a duh men lai. Cun Jesuh  nih thong in a ka luatter lai maw, luatter lai lo ti zong kha hngalh a duh men lai. Jesuh nih a tuah laimi kong kha tam deuh in hngalh a duh caah a zultu pahnih kha Jesuh sinah a thlah hna i hitin a halter hna: “Nangmah hi a ra lai timi cu na si maw; asiloah a dang dah kan orh rih lai?” (Luka 7:19) Cun Jesuh nih “mitcaw nih khua an hmuhnak le, kebei nih an kal khawhnak le thinghmuimi nih thiannak an hmuhnak le hnachet nih khua an theihnak le a thimi hna nunter ṭhan an sinak le sifakmi hna sinah thawngṭha chim a sinak kong” kha Johan cu va chim u tiah a ti hna. (Luka 7:20-22) An kir ṭhan tikah Jesuh nih khuaruahhar lam in mi a damter hnanak kong an chimhmi kha Johan nih ṭha tein a ngaih.

Johan cu a zultu pawl nih an chimmi in thazaang a hmu lai ti cu a fiang ko. Mah nih Messiah kong chimchungbia kha Jesuh nih a tlinter ti a langhter. Jesuh nih thong in a luatter lo nain Johan nih a phungchimnak rian cu a biapi tukmi a si ti kha a hngalh. Zeibantuk thil a ton hmanhah i nuamh khawhnak a ruang a ngei.

Vawleicung pumpi phungchim rianṭuannak i a ṭhami report cungah lungthin peknak nih i nuamh peng awkah a kan bawmh khawh

Johan bantukin thlaraulei thil ah lungthin kan pek ahcun nuamhnak le lungsaunak he kan inkhawh lai. (Kol. 1:9-11) Baibal relnak le ruahnak thawngin kan inkhawh lai, mah nih Pathian caah kan tuahmi vialte cu man a ngei tuk ti kha a kan hngalhter lai. (1 Kor. 15:58) Sandra nih hitin a ti: “Nifatin Baibal dal khat ka relmi nih Jehovah he i naih deuh awkah a ka bawmh. Mah nih keimah le keimah si loin Jehovah tu kha lungthin pek awkah a ka bawmh.” Pennak rianṭuannak report cung zongah lungthin kan pek khawh, mah nih kanmah kong lawng ruat loin Jehovah nih a liimmi thil kong tu kha ruah awkah a kan bawmh lai. “Thla fatin chuahmi JW Broadcasting® nih bupi he i naih deuh awkah le kan rian ah i nuamh peng awkah a kan bawmh” tiah Sandra nih a ti.

Tipil petu Johan cu caan tawite phung a chim chungah “Elijah bantukin a fekmi le a ṭhawngmi a si.” Cun Elijah bantukin anih zong “kanmah bantuk minung a si ve ko.” (Luka 1:17; Jeim 5:17) Johan nih a rian a sunsakmi le thlaraulei ah lungthin a pekmi kha kan i zohchunh ahcun kannih zong zei bantuk thil kan ton hmanhah Pennak rianṭuannak ah kan i nuam kho zungzal lai.