A ummi cazin ah kal

A ummi cazin ah kal

 PHUNGCHIM RIANṬUANNAK AH HMANG

Holh Phun Tampi A Hmangmi Hna Sin Phungchimnak Ah Rianṭuanṭinak

Holh Phun Tampi A Hmangmi Hna Sin Phungchimnak Ah Rianṭuanṭinak

Mi nih thawngṭha kha anmah holh in an theih tikah cohlan an i fawih deuh. AD 33, Pentekos ni ah “vawleicung khuazakip in a rami Judah mi” hna cu Hebru asiloah Grik ti bantuk mi tampi hmanmi holh kha an thiam ko nain an i “chuahkehpimi holh” in thawngṭha an theih khawh nakhnga Jehovah nih a timhtuah. (Lam. 2:5, 8) Tuchan zongah holh tampi an hmannak hmun ah a ummi Khrihfabu hna nih holh phun aa lomi sang pakhat lawngah phung an chim men lai. Cu bantuk Khrihfabu ah a ummi thawngthanhtu hna nih atu le atu an len ṭhan hna caah inn-ngeitu pawl an thin a hun nakhnga lo zeitindah an tuah khawh?

  • Ruahnak Cheuhnak (Ptb. 15:22): Krihfabu hna nih a ṭha bikmi lam in thawngṭha an chim khawh nakhnga rianṭuannak zohkhenhtu hna cu an i ruahceihṭi awk a si. Phungchimnak lohmun cu atu le atu liim a si ahcun Khrihfabu i thawngthanhtu hna nih holh dang a hmangmi inn hna kha an lanhtak men lai. Asinain sang cu a kau i liim awkah a har ahcun holh dang a hmangmi inn hna kha lanhtak awk a si lo, lungthawhnak a ngeimi kha an holh aa khatmi Khrihfabu he pehtlaihnak kan tuahpiak hna awk a si. (od-BU 93 ¶37) Asiloah Khrihfabu pakhat nih anmah holh a hmangmi hna kha kawl dingin bawmhnak a kan hal men lai, mah tikah kan hmuhmi hna address kha kan pek khawh hna. (km 7/12 5, rinli kulh) Cheukhat inn hna ah holh phunkhat leng an hman men lai, mah inn hna kha i cinken. Sang liim khawh awkah timhtuahmi program hna cu upadi he aa tlakmi a si awk a si.

  • Rianṭuanṭinak (Efe. 4:16): Rianṭuannak zohkhenhtu sinin a rami lamhruainak vialte kha ṭha tein zul. A dang holh a hmangmi pakhatkhat he Baibal cawnpiaknak a tuahmi na si maw? Baibal a cawngmi kha amah holh a hmangmi Khrihfabu asiloah phu he pehtlaihnak na tuahpiak ahcun khulrang in a ṭhangcho deuh men lai.

  • Timtuahnak (Ptb. 15:28; 16:1): A dang holh a hmangmi inn-ngeitu he nan i ton tikah thawngṭha kha na si khawh chungin chim. Phungchimnak ah na ton khawhmi hna holh kha tlawmpal in cawng, holh tampi in lehmi Baibal le video hna kha download tuah law i timtuah. Cun holh tampi chawnhbiak ning kha JW Language app hmangin na cawn khawh.