A ummi cazin ah kal

A ummi cazin ah kal

 KHRIHFA NUNNING IN NUNNAK

“Paul nih Pathian Sinah Lawmhnak Bia A Chim i Ralṭhatnak A Ngei”

“Paul nih Pathian Sinah Lawmhnak Bia A Chim i Ralṭhatnak A Ngei”

Rom Khrihfabu nih Paul a ra timi thawng an theih tikah Paul va don awkah meng 40 hrawng (km 64) an va kal. Cutin unau pawl nih mahca ṭhatnak an hlawtmi cu Paul cungah zei huham dah a ngeih? “Paul nih a hmuh hna tikah Pathian sinah lawmhnak bia a chim i ralṭhatnak a ngei.” (Lam. 28:15, NW) Paul nih Khrihfabu a tlawn hnanak a ruang cu thapek awkah a si. Asinain mah kong ah kan hmuh bantukin thongtla pakhat in Paul nih midang sinin thapeknak a rak hmuh.—2Kor. 13:10.

Tuchan ah peng zohkhenhtu hna cu unau pawl thapek awkah Khrihfabu pakhat in pakhat ah an tlawng hna. Asinain a dang Pathian salle bantukin peng zohkhenhtu hna zong a caan ah an tha a ba, an lungre a thei i an lung a dong. Peng zohkhenhtu le a nupi nih an in tlawn ṭhan hna tikah ralṭhat awkah zeitindah na bawmh khawh hna? Zeitindah ‘pakhat le pakhat kan i bawmh’ khawh? —Rom 1:11, 12.

  • Lohmun tonnak ah i pum. Peng zohkhenhtu tlawnnak zarh ah thawngthanhtu hna nih mahca ṭhatnak an hlawtmi in ṭhatnak tling hmuh awkah peng zohkhenhtu nih tha a pek hna. (1 Thes. 1:2, 3; 2:20) Peng zohkhenhtu tlawn zarh ah manhcaan hmaikal ṭuan dingin naa tim kho. Peng zohkhenhtu le a nupi he phungchim kalnak ah naa tel kho lai maw asiloah Baibal cawnpiaknak ah na sawm kho hna lai maw? Thawngthanhtu thar asiloah hmual ngei tein phungchim ka thiam lo tiah aa ruatmi i tel in thawngthanhtu dihlak he phungchim kalṭi kha an duh.

  • Khual Dawtnak Langhter. Tlun inn na awnh kho hna lai maw asiloah rawl ei na sawm kho hna lai maw? Peng zohkhenhtu le a nupi na dawt hna kha cutin na langhter khawh. Cuset khaset ti bantuk timhtuahnak kha an i ruahchan lo.—Luk. 10:38-42.

  • Ruahnak cheuhnak le lamhruainak aan pekmi kha cohlang law zul. Jehovah rianṭuannak ah kan sining ṭhancho awkah peng zohkhenhtu nih lungtho tein a kan bawmh. A caan ah fakpi in a kan chimhhrinh men lai. (1Kor. 5:1-5) Mah kha kan cohlan i kan zulhmi nih a lung a lawmhter.—Heb. 13:17.

  • Lunglawmhnak bia chim. Peng zohkhenhtu le a nupi sinah an i zuamnak in ṭhatnak na hmuh ning kha chim hna. Lunglawmhnak bia kha nangmah theng nih na chimh khawh hna asiloah ca tawi tein na ṭial khawh asilaoh card ti bantuk zongin na pek khawh hna.—Kol. 3:15.