A ummi cazin ah kal

A ummi cazin ah kal

 Ṭhen 5

Vawlei Ca I Pathian Tinhmi Cu Zeidah A Si?

Vawlei Ca I Pathian Tinhmi Cu Zeidah A Si?

1. Pathian nih vawlei hi zeicah a ser?

Jehovah nih vawlei cu minung umnak caah a sermi a si. A hmasa bik nuva, Adam le Evi kha vancung i um awkah a sermi hna an si lo, vancung i um awkah vanmi kha a rak ser cang hna. (Job 38:​4, 7) Cucaah Pathian nih hmasa bik mipa kha Eden dum tiah auhmi a nuam tukmi paradis ah a umter. (Genesis 2:​15-​17) Jehovah nih Adam le a tefa hna kha vawlei ah zungzal in nun khawhnak nawl a pek hna.​—Salm 37:29; 115:16 rel.

A hramthawk ah Eden dum lawng hi paradis a rak si. A hmasa bik nuva hna nih vawlei kha an tefa in an khahter lai. A donghnak ah vawlei pumpuluk kha an uk lai i paradis ah an canter lai. (Genesis 1:​28) Vawlei cu zeitikhmanh ah hrawh a si lai lo. A zungzal in minung nih an umnak lai.​—Salm 104:5 rel.

Pathian nih Vawlei hi Zeicah A Ser? timi video kha zoh

2. Atu ah vawlei cu zeicah paradis a si lo?

Adam le Evi nih a nawl an ngaih lo caah Jehovah nih Eden dum in a ṭhawl hna. Cuticun Paradis cu a rak tlau i minung nih an ser ṭhan kho ti lo. Mah hnu cun vawlei ah miṭhalo pawl an hun tam chin.​—Genesis 3:​23, 24 rel.

Jehovah nih minung ca i aa tinhmi kha tuah ti loin a um lai maw? A um lai lo. Jehovah cu a ṭhawng bikmi a si i a tuah khawh lomi zeihmanh a um lo. (Isaiah 45:18) Cucaah minung ca i aa tinhmi kha a tlinter ṭhan lai.​—Salm 37:11, 34 rel.

3. Paradis cu zeitindah ser ṭhan a si lai?

Pathian thimmi Siangpahrang Jesuh nih a uk tikah vawlei cu paradis ah ser ṭhan a si lai. Armageddon tiah auhmi raltuknak ah Jesuh nih  Pathian vancungmi kha a hruai hna lai i Pathian a dotu vialte kha a hrawh dih hna lai. Mah hnuah Satan kha kum 1,000 chung thong ah a thlak lai. Pathian miphun tu cu Jesuh nih lam a hruai hna lai i a huhphenh hna lai caah an luat lai i vawleicung Paradis ah zungzal in an nung lai.​—Biathlam 20:​1-3; 21:3, 4 rel.

4. Sifah harnak cu zeitikah dah a loh lai?

Pathian nih vawleicung i sifah harnak kha zeitikah dah a hloh lai? Donghnak caan a nai cang ti a langhtermi “hmelchunhnak” kha Jesuh nih a rak chim. Atu lio vawlei thil sining cu minung nunnak caah ṭih a nung i mah nih “chan donghnak” ah kan nung ti a langhter.​—Matthai 24:​3, 7-​14, 21, 22 rel.

Jesuh nih vancung in vawlei kha kum 1,000 chung a uk tikah harnak vialte kha a hloh lai. (Isaiah 9:​6, 7; 11:⁠9) Jesuh cu Siangpahrang a si lengah Tlangbawi Ngan zong a si lai i Pathian a dawmi hna kha an sualnak a hlohpiak hna lai. Pathian nih Jesuh thawng in zawtnak, tarnak le thihnak kha a hloh lai.​—Isaiah 25:8; 33:24 rel.

5. Vawlei Paradis ah ahote dah a um lai?

Pathian a daw i zeitindah Pathian lung lawmhter khawh a si timi kong cawn a duhmi hna kha biakinn ah na hmuh hna lai

Pathian nawl a ngaimi hna cu Paradis ah an um lai. (1 Johan 2:​17) Jesuh nih a zultu hna kha aa toidormi minung kawl in Pathian cohlanmi zeitindah si khawh a si timi kong cawnpiak awkah a fial hna. Atu ah, Jehovah nih a ra laimi vawlei Paradis ah nun khawh awkah mi tampi kha a timhtuah hna. (Zefaniah 2:3) Annih cu Jehovah Tehte Hna biakinn ah va ṭha le nupi ṭha si khawh ning le nulepa ṭha si khawh ning kong kha an cawng. Fale le nulepa hna cu hmunkhat ah Pathian an biaṭi i thawngṭha nih an nunning zeitindah a ṭhatter khawh deuh timi kong an cawng.​—Mikah 4:​1-4 rel.